1 Wakorintho 3

Watumishi wa Mlungu

1Wana wakwetu, Imi sidimile kuhelea nenyo sa wandu wewo na roho, ela nanahelee nenyo sa wandu wa urumengu, na sa wanake wakoo kele idumusi lya Kristo. 2Nanamulyisile mazia, simuhawile chakulya chikulile, kwa kukala simwoketi kuchilya. Na hata indakwenyi simuketi kuchilya, 3kwa kukala mwanatulagha mkekala sa wandu wa urumengu. Ngera kuo na iziso na marashano ghati yenyu, iyi siyendeonyeza kamba ninyo wandu wa urumengu wakalagha kiurumengu? 4Ngelo mundu mumoju eghoragha, “Imi nimi wa Paulo”, na mzima, “Imi nimi wa Apolo”, simondeonyeza sa wandu wa urumengu?

5Apolo nani? Na Paulo nani? Isi nisi watumishi wa Mlungu tu, timlongoze mudumuse. Kila mumoju wetu wanadeagha kazi Mlungu atihawile kudea. 6Imi nanawandile mbeu, Apolo kazitiila meji, ela ni Mlungu azideile zikazeguwa. 7Kwa hung'u, uyu ewandagha na ulya esikililagha meji si kindu chingi. Mlungu uyu ezeguisagha niye woliko. 8Ulya mundu ewandagha na ulya mundu engizagha meji wanakatane. Mlungu ujemhawa kila mumoju inosi kuirimana na kazi yake. 9Kwani isi nisi wadei kazi ngila mojori na Mlungu, na inyo ninyo mbuwa ya Mlungu. Inyo ninyo iwaghali lya Mlungu.

10Imi nanatumie mbazi nihawilo ni Mlungu kudea kazi ya mundu wa wuya. Nikawaghala msingi, mundu mzima wanajilewaghala ighulu yake. Ela kila mumoju ni suti azighane selyi ewaghalagha. 11Kwani sikuwesi msingi ghungi mzima mundu edimagha kuwaghala kuchumba ghulya ghuwaghalo, nagho ni Jesu Kristo. 12Wamoju, wejewaghala ighulu ya msingi kwa zahabu ango feza ango mawe gha zoghori mbwaa; wazima wejewaghala na miti ango nyasi ango matasa. 13Ubora ghwa kazi ya kila mundu ghujeonekana ngelo ijefunukulo Ijua lya Kristo. Kwani Ijua ilyo moto ghujeifunukula kazi ya kila mundu, moto ghujetima kuonyeza ubora ghwake. 14Ikakala kazi awaghale mundu kele msingi, siyeiyagha na moto, ujepata inosi. 15Ela ilyi kazi ya mundungi yaiya na moto ujesowa inosi, ela iye mwenyi ukilagha sa mundu ekilagha kele moto.

16Ado simuweni kamba ninyo hekalu ya Mlungu na kamba Roho wa Mlungu wanakalagha amweni kwenyu? 17Kwa hung'u ilyi mundungi ahakila hekalu ya Mlungu, Mlungu naese ujemuhakila. Kwani hekalu ya Mlungu ni ya Kuela, na inyo wenyi ninyo hekalu yake.

18Mundungi sakuembeembe mwenyi. Ilyi ungi wenyu akughelela kukala na suku ghati yenyu kwa gha urumengu bora akale mzimu, eri akale na suku ya fulo. 19Kwani agha gheghelelogho ni urumengu kukala suku ni uzimu hambiri ya Mlungu. Selyi Mawandiko gha Kuela gheghoragha, “Mlungu wanawawatisagha walachu kele ulachu ghwawe.” 20Na Mawandiko mazima ghaghora, “Bwana wanaweni kamba maghelelo gha walachu sighafweni.” 21Kwa hung'u mundungi sakukase na wandu. Kwani vindu vose ni venyu. 22Paulo, Apolo na Kefa, ughu urumengu, ubanana na kifwa, gha indakwenyi na ghekujagha, agha ghose ni ghenyu, 23nenyo ninyo wa Kristo, na Kristo ni wa Mlungu.

Currently Selected:

1 Wakorintho 3: SAGALLANT

Highlight

Copy

Compare