Titu 3
3
Tagafanud at Ugali
1Faamatangi tuwa sat ngay tagafanud te, faningi tuwa sat ngay fun ay sat ngay tagmagurang si at talun. Ay mafamasadani tuwa gugat nu gfaning sat masine fag fagbulun. 2Ay foyungi anya te, lag gelongan mauri sa tiba baliwa ay lag kamaringangan, fangkabat, marani tuwa nu glong ay malukmei tuwa sas fagayu taw. 3Anway ebi anggan itam ya nsak tam nasaful sat matuyan fag foyungan, kamabo yay tam, ay igfaning yay tam tagfanluk. Ay gfaning yay tam dawdaw sa tam bilug at fakaumsigun ay at fagalabianun. Ay fagayu menit tam fagbulun mauri yay ay galabian yay tam tam iba. Ay tanan yay tam kadkadotaman sa tam iba. 4Ay gina Diyus tam Tagfalangfe nafasure at fakafanyuun ay at fakesugun, 5kanya nafalangfe antam, bundi sa tam nafagbulun at masine, antuwa, teway kanya kafanyu tuwa antam. Ay at Masine fag Falad nafegus tam asalanan, laman sik bagu tuwa tam fag taw.
6Diyus madaragang nu nafatsi antam at Masine fag Falad siginan tam Fun Isus tam Tagfalangfe at fagbulun, 7laman sa at fakafanyuun tumap antam kata at yud e asalanan, ay laman gfabul ban tam leleg faggugat, tam fagsegun.
8Matuyan wa fiya kanya fag foyungan. Ay kaumsig aw nu gfoyung o takatanya fag foyungan, laman ban at ngay tagafanud sas Diyus gugatan tuwa gfagbulun sat matuyan. Nu katanya, masine tuwa faggugat ay e fanambagun tuwa sas fagayu taw.
9Ay saruyi at yud e masuwad fag ngay longan, ay anggan at tagamatangan at ngay aguyangan nu gtalagtagan, ay nu garingangan sa baliwas Muisis at Suguwan, anway fagayu takatanya we masuwad ay we fanambagun. 10Bayai nu e taw gfasaruwayan ay fagmasadiun. Ay kanya nu dway kabali, dewa duwa ginan am glong, lag wa gfaygaluwan kanya fag taw. 11Anway nasaful wo te, mauri takatanya fag taw, ay at asalanan wan tagfatuyan te, umfaurianan wa ban fiya.
Pablu at Fakatabuwan fag Longan
12Sumugu ban aw sanya nus nga sinu at sadi tuy fag duwama, Artemas ay Tikiku. Ay nu ndasug wa sanya, o, loi wa mafali ste sa angku sas Nikupulis, anway ku fasadan ste wan nu gfalangfe aw at matis fag ngay magdanun.
13Tarabangi tuwa dawdaw Senas, kanya sik abugadu, ay Apulus nu glo laman di e fagayudanun sat ngaba dalan. 14Ay foyungi tam ngay fadugsay te, faugati yap nu gfagbulun sat masine, laman kanya gtarabang tuwa ban sa nus nga sinu at ke fagayudanun, ay laman umke fanambagun tuwa ban at ngay nafagbulun.
15Fagayu ku ufud ste ginto emu te, “Go tain o sanya?” Ay o, intoi yangay tam ngay fadugsay sanya, at tagafanud at takafanyu emi ste, “Go tain am?”
Igdarangin aw sa tam Diyus te, famanyuni ayu fagayu.
Currently Selected:
Titu 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
