Titu 2

Titu at Foyungan ay at Ugali

1Ay o Titu, am foyungan fadiyuganani tuwa sas Diyus at longan. 2Foyungi sa sangay fufuwama te, maamatanganani tuwa nu gfagbulun am, matuyani tuwa, ay asafuli tuwa nu gfili at masine ay at mauri, ay matvngvdi tuwa nu gafanud sas Diyus, ay afanyui tuwa at tiba, ay sungatani tuwa.

3Ay foyungi yangay sa sangay fufuyna te, ugaliani tuwa sat masine bilang sik tagafanud, ay di glong mauri sa tiba baliwa, ay di ginum fangaranug. Ay foyungi sa tiba at masine, 4laman mafafoyung tuwa sat yud mafufuyna fag ngay mangena te, afanyui tuwa at ngay mangama anggan at ngay sisiyan, 5ay asafuli tuwa nu gfili at masine ay at mauri, ay malayuni tuwa sat masine, ay masinei tuwa at fagbulun fagayu si at bale, ay ugaliani tuwa sat masine, ay faningi tuwa sat mangama. Nu katanya tuwa at fagbulun, tibak taw di e longan mauri sa tam Diyus at longan baliwa.

6Ay foyungi yangay sa sangay baguwama te, asafuli tuwa nu gfili at masine ay at mauri. 7Ay o, Titu, fasineuni tuwa am ugali laman sik fagulitan tuwo sa sangay tagafanud nus nga setaw am fagbulun. Ay am foyungan, matuyani tuwa ay lag o gfanlamangan. 8Ay matuyani tuwa fagayu am longan, laman di e kafayud, ay at yud gfadiyuganan antam mapla, anway di e foyungan te, mauri way tam.

9Foyungi yangay sa sangay fanuguwan te, mafanfaningi tuwa sat fun, laman at fun guseganan tuwa sat nafagbulun. Ay di kamalusan sat fun, 10ay di kamul, fangkabat, falagani tuwa te, masine tuwa fagayu at fagbulun. Nu katanya, tibak taw kaumsig tuwa ban dawdaw sas Diyus tam Tagfalangfe at foyungan, anway nalag at fagbulun at masine.

11Anway Diyus at fagnafasureun at fakafanyuun laman fagayu taw nangus umlangfe. 12Ka fag fakafanyuun nafoyung antam te, ubuni wan at dan fag ugali. Ay ugaliani ste swa daga at masine ay matuyan, ay mafanfaning sas Diyus at fakaumsigun, 13kaduge tam gfanya ste swa daga tam fagfanyaun fag menit tam Diyus tam Tagfalangfe tam Fun Isus nu kadasug. 14At faginkateun, laman umlangfe tam dewa tam e asalanan, ay laman itam Diyus at taw at masine ay mafasadanan gfagbulun sat matuyan.

15Foyungi sa ka fag ngay taw takatanya, ay fabitsugi at amatanganan. Ay salagi tagasalanan, anway e fagmadaragangun tuwo. Ay masinei tuwa am ugali, laman tibak taw di gfalingun emu.

Currently Selected:

Titu 2: TAWEAST

Highlight

Copy

Compare