Filimun 1

Pablu Longan at Famasigad at Rirukan

1Tuy fag rirukan, siginan angku, Pablu. Katsi masungsungan akway. Ku faginsungsungun, teway igfaning aw tam Fun Isus. Ay kaduge aw igfariruk tuy fag longan, e ufud aktuwa iste. Kanya tam usama Timutiyu. Kanya tam fadugsay yangay. Sik tagafanud yangay sa tam Isus.

Ay ku fagfadasugan tuy fag rirukan, sa emu, ku fagwes Filimun. Sama, guseganan aw te, igfagbulun yangay o tam Diyus at fagbulun, kata emi.

2Ay ku fagfadasugan tuy fag rirukan, sa tuwa sigon tam usena Apya. Kanya tam fadugsay yangay. Ay sa tam usama Arkipu. Kanya sik maseganama yangay fag taw. Dewa gdalan at ngay mataka, igtunglus tuwa nu gfoyung sas Isus baliwa. Ay at sadi ya ku fagfadasugan tuy fag rirukan, sa tam ngay fadugsay at nangadal sanya sa ay bale.

3Ay katsi, igdarangin aw sa tam Tama sis banwa, ay sa tam Fun Isus, tam Fagsegan. Igdarangin aw te, laman kanya falag tuwa nu kafanyu ayu, ay fanabayan tuwa ayu.

Pablu Fagusegananun sas Filimun

4-5Sama, katsi e fagalongun aw sa emu. Nadungug aw te, kesug tuwo tam Diyus at ngay taw fagayu. Ay gdungug kyangay te, matvngvd tuwa nu an o gafanud sa tam Fun Isus. Nu katanya, kayu ginan aw gdarangin emu, guseganan aw sa tam Diyus.

6Ay gdarangin aw emu te, laman kaugat yay nu gtarabang o tam ngay fadugsay sanya, teway katanya tuwa fag ngay fagbulun at fakalagan te gafanud watam fiya sa tam Isus. Teway nu sik tagafanud watam, tam Diyus igtarabang dawdaw antam. Ay nu gsaful tuwa tam tam Diyus at tarabang antam, mafafatarabang yangay tam tibak taw, laman sumaful yangay tam Fun Isus.

7Sama, nasaful aw te, kesug wo fiya tam Diyus at ngay taw. Ay igfabitsug tuwo at ngay amatanganan. Anggan ngani angku ku amatanganan inbitsug yangay, nu nadungug aw katanya am ngay nafagbulun ayuwayu. Guseganan aw dawdaw katanya am ngay ugali.

Pablu Fagetun sas Filimun

8-10Sama, katsi e fagetun aw emu, sa baliwa am fanuguwan Unisimu. Saful wata te, kanya ebi, nalagyu wemu. Ay dewa katanya at nafagbulun, get aw te, am fanuguwan ban gina ndasug sanya, masinei tuwa am fagbulun sa anya.#8-10 Ebi, gina Pablu fag fulan taw, sik fanuguwan galay nalagyu at fun, ay nagamatan yay, at fun matvngvd nu gfaurianan. Tiba ginan igfate wan.

Ay dewa aw glong katanya, dakdi gfabulun, te masinei wa fiya am fagbulun sam fanuguwan. Nasaful wo te, nu kaumsig kway ro, mafafabulun kway long emu, teway aw wan at sadi Isus filian tagfadasug at fagalongun sa sangay taw. Ay roro yaya. Dakdi gfabulun. Igfoyung kway emu ku amatanganan.

Sama, nu gamatangan aw sa am fanuguwan baliwa, kata wa ku unga. Teway fakatanyaun, ebi kaduge aw gugat masungsungan ste, kanya indasug stiye. Ay nafoyung aw tam Diyus fanlongan. Ay kanya gafanud wa fiya. Nu katanya, katsi, kanya bilang wa ku unga.

Nu katanya, sama, get aw emu te, nu kafanyu tuwo angku, afanyui yangay ku unga, kata nu kafanyu o tibak taw ebi ginan. Teway aw, gatakan akway katsi. Kafufuwama kwan, ay masungsungan kya, teway igfaning aw tam Fun Isus. Ay nu gsaful wo te, am fagwes Pablu katvngvd wa anya nu gatakan, igfanseg aw te, umfanyu tuwo ku unga.

11Sama, igsaful aw te, ebi am fanuguwan we fanambagun sa emu. Ay roro katsi, igtarabang tuwa dawdaw angku. Ay gafanud kyangay te, nu sanya wa ban, igtarabang yangay dawdaw emu.

Pablu Igfoyung Filimun te, “Dewa Aw Kesug Am Fanuguwan, Igfauli Aktuwa sa Emu”

12-14Sama, gurungan wan, kesug kwa fiya dawdaw kanya am fanuguwan. Satu ro, kwa gfauli sa emu. Teway aw ngani masungsungan kwayay, teway tibak taw kalimata nu kamoyung aw at Masine fag Barita. Nu katanya, gamatangan aw te, am fanuguwan nu gtunglus di ste si angku, igtunglus tuwa nu gtarabang angku. Ay am fanuguwan nu gtarabang tuwa angku, kanya bilang yangay emu am tarabang angku.

Ay dewa aw glong katanya, roro dakdi nafaning katanya ku amatanganan, teway kwa mafalong sam fanuguwan te “Stei way si angku”, kway naet emu. Nu katanya, an akwa fiya gfauli sa emu kanya am fanuguwan. Teway ku fagsegun, nu tumarabang o angku, siginan tuwa emu am fasadan fiya fiya, bundi siginan angku ku fasadan.

Pablu Igfanseg te Filimun Kesug wa ban Unisimu

15Sama, ebi, tam Diyus nafabayan am fanuguwan nu glagyu ayu. Ay labon fakatanyaun Diyus fagbulun, roro kanya e fasadan masine sa am fanuguwan. At fasadan, laman am fanuguwan umdasug stiye ay dumungug wa tam Diyus fanlongan, ay fasigad gafanud sa tam Isus, kata nu gafanud o. Ay nu katanya, kanya deyud gufud ayu ebi sik kadugayun, katsi long ban, nu gudgufudan am, di katabu. Anggan wa ban sas banwa. 16Ay di ban o gamatangan te, kanya am fanuguwan way gugat. Antuwo gamatangan te, kanya bilang wa am fadugsay, teway kanya sigon gafanud yangay sa tam Isus.

Ay katsi ban, nu kesug o tam usama, glabi yay nu kesug aw anya. Kesug o dawdaw anya teway kanya am fadugsay wan, bundi fagtvngvd am fanuguwan.

Pablu Glong sas Filimun te, “Am Fagbulun ban sas Unisimu, Kata tuwa Nangus Am Fagbulun sa Angku”

17Sama, igsaful aw te, gurungan tuwo kesug angku, teway aw wan am fagwes tagfagbulun kata am fagbulun. Ay nu aw di ro at kumdasug sanya sa ayu, saful aw te, igfatvngvdun tuwa long ro o angku. Ay katsi ku fagetun sa emu, dewa ro tam usama Unisimu at kumdasug sanya sa ayu, katanya yangay am fagbulun. Igfatvngvdun yangay o.

18Sama, labon tam usama ebi gina glo sanya ginan e tiba yayk nafagbulun mauri sa emu. Labon e nabul yay am ngay fanandigun. Ay glong aw emu te, kanya fagayu at nabul aw wan tagsali. 19Ay ku famatvngvd ku longan te aw wan tagsali, aw wa fiya fiya Pablu tagriruk ste fag lungud rirukan. Ay dewa aw glong katanya, gamatang yay ro o te, ebi gina ta gaygaluwanan e nafon kwemu sik mafanud dawdaw. Nafoyung aw emu tam Diyus longan, ay inlangfe tuwo siginans faurianan. Kanya wan ebi at namafanud dawdaw ku nafon emu. Kanya glabi yay kamafanud tam usama nabul am ngay fanandigun.

20Sama, ita duwa, kata wata sik dugsay, teway tam Fun Isus wata at taw. Nu katanya, gamatangan aw te, masine ro nu mfanyu o tam usama, kata ku fagetun sa emu. Teway nu nfanyu di ro o, ku amatanganan umbitsug tuwa, teway guseganan aw dawdaw sa tam Fun Isus. 21Ay roro dewa aw glong aro ginan te, masine nu mfanyu o nangus tam usama, gsaful kwa te, roro ngap, umfanyu wa ban o fiya. Ay igfagbulun yangay o tibak masine, ayu yap aro ku nalong.

Pablu Fagetun at Sadi

22At sadi ya ku fagalongun sa emu, sama, nu masine di sa emu, famasadani yangay sik fagtiyugan sanya si ay bale laman ban e fagtiyugan aw gina aw indasug sanya. Teway fakatanyaun, gafanud aw te, tam Diyus malus wa ban tam ngay darangin. Falfas wa ban angku iste ginan, laman mafasibo aktuwa ayu, fadi fadi sa tam Diyus.

At Fakatabuwan fag Longan

23Sama, e ufud aktuwa iste sik ngay mangama. Ay kanya fagayu kaumsig igfariruk at ngay ngayan iste fag rirukan, laman sumaful o te kanya sigon fagayu di kalyaman emu. At sadi ku ufud, tam usama Epafras. Kanya ku ufud fiya fiya iste si ku fagmasungsunganan. Kanya sigon at faginsungsungun, teway igfaning tam Fun Isus. 24Ay tiba ku ufud, Markus, Aristarku, Demetrius, ay Lukas. Kanya fagayu kata yangay angku, tagfagbulun yangay Diyus fagbulun.

25Ste way kabat ku rirukan. Tam Fun Isus, tam Fagsegan, kanya fatunglusi nangus tarabangi ayu.

Currently Selected:

Filimun 1: TAWEAST

Highlight

Copy

Compare