Titu 1

1Tuy fag rirukan siginan angku, Pablu. Aw, Diyus at fanuguwan at sadi, ay tam Fun Isus at Nasugu at sadi. Ay Diyus nasugu angku laman nanfatvngvd aw at nafili fag ngay taw at fagafanudun ay nanfayamag at matuyan fag longan, sa baliwa nu gleleganan tam sas Diyus. 2Ay e fagsegun ban tam leleg faggugat at yud katabu. Diyus matuyan tuwa gugat, ay kanya at nafatuyanan fag leleg siginan ngay ebi ebi. 3Ay katsi wan at lungud at fagnafiliun angku, laman gfoyung aw tam Diyus tam Tagfalangfe at longan.

4Griruk aw sa emu Titu, at matuyan ku unga sas fagafanudun.

Igdarangin aw sa tam Diyus tam Tama ay sa tam Fun Isus tam Tagfalangfe te, famanyuni ay fanabayani emu.

Titu nu Gfili at ngay Tagfangguna sas Furu Kreta

5Naubun aw emu sis Kreta laman gfatabu o ku yud nafatabu fag fagbulun. Kata ku suguwan emu te, filii sik ngay tagfangguna sa sangay bale fakafulan sas fagayu fulan. 6Am fagfiliun at yud tuwa e fagbulun mauri, ay sadi way at mangena, ay at ngay sisiyan gafanud tuwa, ay tiba di e longan te, at sisiyan kamabo way ay wa mafafatawad at amatanganan. 7Sik tagfangguna nafanusetaw wa sas Diyus at fagbulun, nu katanya, sik tagfangguna di e fagbulun mauri, ay di gfandaragang, ay di gfangadotama, ay di ginum fangaranug, ay di gyafaayuun at singku. 8Ay kanya gfasakbo tuwa sat bale at bagu kadasug fag taw, ay kaumsig tuwa sat masine, ay mamatanganan tuwa nu gfagbulun, ay matuyan tuwa, ay gfaning tuwa fiya fiya sas Diyus, ay gsaful tuwa gbaris. 9Ay kanya matvngvd tuwa nu gafanud sat matuyan fag foyungan laman mafabitsug tuwa at ngay iba at fagafanudun ay mafasalag tuwa ngay takauri sat matuyan fag foyungan.

10Anway ngayuk taw wa gafanud sat matuyan fag ngay foyungan, kaugat wan ngay taw taglong te, fatulii tuwa. Kanya fag ngay taw takamabo way ay tagfanluk. 11Salagi takatanya at fagbulun. Anway at foyungan wa matuyan ay igfasaruwayan way tibak talanan at fagafanudun. At fagfoyungun at masuwad, nanfaayu way at singku. 12Dewa at taglong at sadi nafatuyan fiya fiya te, “Faggugat taw Kreta kamuwagan way. Ay at ugali kata way tagfangagat fag balan. Ay gfalufuyun way ay manga gfadaulun way nu kon.” 13Matuyan wa fiya ka fag taglong at longan. Ay nu katanya, matvngvdi nu gsalag o kanya fag ngay taw, laman gugalian tuwa fiya fiya at fagafanudun, 14ay laman wa gdungugan taw Udyu at ngay foyungan at naawat way mandi, ay anggan at ngay taw at naubun at fagafanudun at ngay suguwan at naawat way mandi.

15Sik taw nu masine tuwa at amatanganan, nus nge wain masine tuwa. Ay roro sik taw nu mauri way at amatanganan ay wa gafanud, nus nge wain mauri way, anway at amatanganan mauri way. 16Ay kanya fag ngay taw at mauri glong te, “Nasaful wami Diyus.” Ay roro ngap wa kalag sit fagbulun. Kanya mauri wa dawdaw, ay kamabo way, ay wa mafafabulun at masine.

Currently Selected:

Titu 1: TAWEAST

Highlight

Copy

Compare