At Nafasure 9

1Ay at falimak tagfabarita nauyup at fagbudyungan. Ay nalag aw sik galeme intong sas wa daga siginans banwa. Ay e nafon sa ka fag galeme sik fanluwang sa at fandingding sa ka fag sulat tabyu at yud e bangsi. 2Ay ka fag galeme nu naluwang wa ka fag tabyu dingding, sik anus dawdaw nalfas siginan sad tabyu, ay at kadaulan kadaw sik labian nu kanus. Ay nu katanya tam menit inkarum wan kadaulan wa fag anus at nalfas sanya ginan fag tabyu. 3Ay sik ngay liyung nafangalfasan sanya ginan fag anus ay inrapyag sas wa daga. Ay e nafon sanya fag ngay liyung sik fagmadaragangun kagat, kamasait sik agipan nu kagat. 4Ay e nasalag sanya fag ngay liyung te, “Lag grabrab ngay makmak, ay fagayu nus nge wain at melo, ay anggan fagayu kayu. Ay fagfauriun kayu yakman at yud nafatayuk Diyus at fagtoglagan sit angas.” 5Ay nalong yangay sanya fag ngay liyung te, “Lag gfate ka fag ngay taw, fatakani way dawdaw at kadugayan limak magdanun.” At katvngvdan nu gfatakan, kamasait sik agipan nu kagat sa sik taw. 6Ay ginanya fag ngay magdanun, ka fag ngay taw igsarap ban at faran laman umkate. Ay roro yaya, we nalag at fangate.

7Ka fag ngay liyung kata daw sik kabayu nu gananfabarangyanun. Ay si at ngay alfuyu kata e sangbo gintu. Ay sit wa mata kata sik taw at mata. 8Ay at buk kata sik mangena buk. Ay at ngay bagang kata sik liyun at ngay bagang. 9Ay sit dubdub e kata famalabag bakal. Ay at ngay fakfak nu gfatfatan, kata sik ngay kabayu nu e guyudan karwai gina glo sas fagbarangyanan. 10Ay ka fag ngay liyung at iyug e kagat kata sik agipan nu kagat. Ay at fagmadaragangun siginan at iyug, at famasayitan sa sangay taw limak magdanun. 11Ay ka fag ngay liyung e fun tuwa. Ay at fun sik tagfabarita tagmagurang ka fag tabyu at yud e bangsi. Ay at ngayan sis Fangebriyu, Abadun, ay sas Grigu, Apulyun.#9:11 Abadun ... Apulyun: at masuwad ka fag duwak ngayan, tagrasras.

12Inlangfe wan at taguna fag fanfauri. Ay amatangani. Duwa ya ro at kumdasug.

13Ay rodi at faunumk tagfabarita nauyup at fagbudyungan. Ay nadungug aw nu gelongan siginans ufat suluk sas ke fagyagoan at fangawat gintu, tagsis Diyus at akbang. 14Ay glong sa ka fag faunumk tagfabarita at ke fagbudyungan te, “Falfasi wan ka fag ufat tagfabarita at masiyukan sanya sas tagbiya fag safa Iyupratis.” 15Ay e nafalfas wa fiya ka fag ufat tagfabarita. Kanya fag ufat nafamasadan ebi wan gina ban umdasug fag lungud menit, magdanun, banwa, laman nanfate at fatuluk afud taw sas fagdaul daga. 16Ay e nalong angku te, kayunya at ngay sundalu tagsakay sis kabayu, at kayuwan 200,000,000k sundalu. 17Katanya at mata at nafalag angku fag ngay kabayu ay at ngay tagsakay: At ngay tagsakay e famalabag maraska sit dubdub kata sik afuy. Ay at tiba manyang. Ay at tiba madilaw. Ay ka fag ngay kabayu at alfuyu kata sik liyun. Ay siginan at bibig kasure afuy, ay anus, ay asupri. 18Ay sanya ginan fag tuluk faurianan, afuy ay anus ay anggan asupri, siginan ka fag ngay kabayu at bibig, at nafate at fatuluk afud taw sas daga. 19Ay ka fag ngay kabayu at fagmadaragangun si at bibig ay si at iyug. Ay at ngay iyug e alfuyu kata sik ubyanun, ay kanya wan at fangagat sa sangay taw.

20Ay at ngay sawad, kayu at yud inkate sa ka fag tuluk faurianan, wa naubun nu gseg sat awatan fag ngay fagsegan. Kanya fagayu gseg wa gugat sa sangay mafurat fag falad, ay sat awatan fag ngay fagsegan gintu, ay pilak, ay tansu, ay batu, ay kayu, dewa ka fag ngay fagsegan yud glag, ay yud gdungug, ay yud glo. 21Ay anggan wa naubun nu kamate tibak taw, ay nu gbara, ay nu kamayun, ay anggan nu kamul.

Currently Selected:

At Nafasure 9: TAWEAST

Highlight

Copy

Compare