At Nafasure 8

At Fafituk Fandafut

1Gina Tupa nalunggab at fafituk fandafut, we mawang sas banwa at kadugayan 30k minutu. 2Ay rodi, nalag akyangay ka fag fituk tagfabarita nu malindug sis Diyus at akbang, ay e nafon sas bawat sadi sik fagbudyungan. 3Ay e sadi ya fiyak tagfabarita at kindasug ay namalindug sis akbang fagyagoan, e bitbitan sik fagsuwadan at fangawat gintu, at suwadan bebanglu. Ay e nafon anya ngayuk bebanglu laman nanganyun sas fagyagoan at fangawat gintu, sis Diyus akbang faglunggungan. Nu ganyun gfasfuwan Diyus at ngay taw at darangin. 4Ay siginan ka fag tagfabarita at daluwap ka fag bebanglu at anus gfasfuwan Diyus at ngay taw at darangin kaabat sas Diyus at akbang. 5Ay ka fag tagfabarita nabul ka fag bebanglu at fagsuwadan ay nafapnu sanya sik ngay baga siginan fagyagoan, ay naukas sas wa daga. Ay nafangkilat ayuwayu, ay natadtalafunan, ay naadgawangan, ay nafaleleg.

Fituk Tagfabarita at ke Fagbudyungan

6Ay at fituk tagfabarita at ke fagbudyungan kamasadan gabudyungun. 7Ay at fasadik tagfabarita nauyup at fagbudyungan. Ay namoyan yelu ay afuy gfasagbatan taguk. Ay at fatuluk afud daga nbatas wan. Ay at fatuluk afud kayu inbatas yangay, ay anggan fagayu makmak.

8Ay at faduwak tagfabarita nauyup at fagbudyungan, ay kata sik bugsul daul at ke afuy intong sasad dagat. 9Ay at fatuluk afud dagat igtaguk wan. Ay at fatuluk afud at ngay tagleleg sad dagat inkate wan. Ay at fatuluk afud at ngay balutu inrasras wan.

10Ay at fatuluk tagfabarita nauyup at fagbudyungan, ay sik galeme daul gigang kata sik salung intong siginans banwa. Ay ka fag galeme at fakatongan sas fatuluk afud ngay safa ay ngay bukbuwan. 11Ay ka fag galeme at ngayan, Mayat. Ay at fatuluk afud ngay mamam inkayat wan. Ay ngayuk taw inkate wan nu nainum ka fag safa.

12Ay at faufat tagfabarita nauyup at fagbudyungan, ay at fatuluk afud menit, ay anggan at fatuluk afud magdanun, ay anggan at fatuluk afud galeme infanggalutan wan. Ay nu katanya, ka fag tuluk afud inkarum wan.

13Kaduge aw glinggat, nalag aw sik biyo nu glayug sis kiwang. Ay nadungug aw nu gelongan dawdaw te, “E fanfauri ban! E fanfauri ban! E fanfauri ban sa sangay tagbanwan sas fagdaul daga gina ban at tuluk tagfabarita muyup at fagbudyungan.”

Currently Selected:

At Nafasure 8: TAWEAST

Highlight

Copy

Compare