At Nafasure 7

144,000 Taw at ke Fagtoglagan Sit Angas

1Ay fadogan ku nalag ufat tagfabarita nu malindug sis ufat suluk sis fagdaul daga. Ay kanya igsalag nu gtagmara, laman nus ngandaginan at tagmara di mdasug sas fagdaul daga, ay sas dagat, ay anggan sa sangay kayu. 2Ay nalag akyangay fiya sadi yak tagfabarita nu kasure siginans fakamenitan. Ay kanya nauba tam tagleleg fag Diyus at fagtoglagan. Ay kanya nauro sa ka fag ufat tagfabarita ke fagmadaragangun laman gfarasras fagdaul daga ay dagat. 3Kanya glong te, “Agi yap gfarasras fagdaul daga, ay dagat, ay ngay kayu yap ngay tam nafatayuk tam Diyus at fagtoglagan sit ngay fanuguwan at angas.” 4Ay e nalong angku te, “Nu fagayu wan at ke fagtoglagan, 144,000k taw siginans fagayu Israel at baguwama at kadagdagan:

5Siginans Uda at kadagdagan, 12,000k taw at ke fagtoglagan.

Ay siginans Rubin at kadagdagan, 12,000k taw.

Ay siginans Gad at kadagdagan, 12,000k taw.

6Ay siginans Asir at kadagdagan, 12,000k taw.

Ay siginans Naptali at kadagdagan, 12,000k taw.

Ay siginans Manasis at kadagdagan, 12,000k taw.

7Ay siginans Simyun at kadagdagan, 12,000k taw.

Ay siginan Lebi at kadagdagan, 12,000k taw.

Ay siginan Isakar at kadagdagan, 12,000k taw.

8Ay siginans Sibulun at kadagdagan, 12,000k taw.

Ay siginans Use at kadagdagan, 12,000k taw.

Ay siginans Benamin at kadagdagan, 12,000k taw.”

Sik ngay Taw e Lanbung Malagsi

9Ay rodi, manlag akdi sik ngay taw ayuwayu, we mangatap at kayuwan. Kanya siginan fagayu fulan taw sas fagdaul daga tagsadsamanan at ngay fanlong. Kanya fagayu malindug sa taglabi nu masine fag faglunggungan ay sis Tupa at akbang, ay glanbungan malagsi ay ngaba ay gbitbitanan sik ngay don dario. 10Kanya fagayu gbiya nu gelongan te, “At nafalangfe antam tam Diyus at malunggung sit faglunggungan ay anggan tam Tupa.” 11Ay fagayu tagfabarita nlindug insafung sa ka fag faglunggungan, ay sa ka fag 24k tagmagurang, ay anggan sa ka fag ufat tagleleg. Ay kanya nlub nafatayuk at angas sas daga sas faglunggungan at akbang ay naseg sas Diyus te, 12“O wan at tiba tungud at ke fagmasineun ay at ke fagsafulun. Gfauseganan ay galang ami emu. O wan at madaragang fiya fiya. Gseg tuwa ami emu faggugat ban. Kin, katanyai tuwa!”

13Ay rodi ka fag 24k tagmagurang at sadi nainto angku te, “Sinu kanya fag ngay taw ke balukas malagsi ay ngaba? Ay daginan?” 14Ay nabalus aw te, “Em magurang, o way tagsaful.” Ay kanya nalong angku te, “Kanya fag ngay taw nadalan mason fag fagatakanun. Ay nalaba ay nafalagsi at balukas sas Tupa at taguk. 15Katanya at faginlindugun sis Diyus at faglunggungan akbang. Ay dewa mamenit ay dewa mayabi, kanya gfagbulun tuwa sas Diyus sit bale. Sanya at malunggung sit faglunggungan at tagfatvngvdun anya. 16Ay ka fag ngay taw di ban kalunus ay di ban kadanum. Ay tam menit di ban gfasugba ay di ban e gfafangenit anya, 17anway Tupa tagsis taglabi nu masine fag faglunggungan, kanya ban tagulit ka fag ngay taw, ay nantaban sa sangay bulbug tagfon leleg. Ay Diyus rumarus wan fagayu at luwon sit ngay mata.”

Currently Selected:

At Nafasure 7: TAWEAST

Highlight

Copy

Compare