At Nafasure 6

Nu Glunggab ka fag Fituk Fandafut

1Ay nalag aw Tupa nu nalunggab ka fag fituk fandafut at fasadi. Ay nadungug aw ka fag ufat tagleleg at sadi nu gelongan kadaul sik talafun, glong te, “Istei!” 2Ay nalinggat aw, ay ku nalag sik kabayu malagsi. Ay at tagsakay sanya gbitbitan sik busuy, ay e nafon sa anya sik sangbo. Ay kanya nalo wan laman nanfabarangyan, ay gbabo wa gbabo.

3Ay Tupa nu nalunggab at faduwak fandafut, nadungug aw ka fag ufat tagleleg at faduwa nu gelongan te, “Istei!” 4Ay insure sadi yak kabayu, ay ka fag kabayu maraska. Ay e nafon sik fagmadaragangun sa tagsakay, laman nanfalyam sas fagdaul daga at fagmanabayanun, laman at ngay taw gfadfatean wan. Ay e nafon yangay sa tagsakay sik fiso dawdaw.

5Ay Tupa nu nalunggab at fatuluk fandafut, nadungug aw ka fag ufat tagleleg at fatulu nu gelongan te, “Istei!” Ay manlag akdi, sik kabayu malayung. Ay at tagsakay sanya gbitbitan sik kiluwan. 6Ay nadungug aw kata sik aringang sanya ginan fag ufat tagleleg nu glong te, “Faayui at fansali ngay fakonun, sik kilu arina fatugani way sa sik menit at nafagbulunan. Ay roro lag gfaayu bantika nu kasali ay at maranug fag safa.”

7Ay Tupa nu nalunggab at faufat fandafut, nadungug aw ka fag ufat tagleleg at faufat nu gelongan te, “Istei!” 8Ay manlag akdi, sik kabayu kalagsi. Ay at tagsakay sanya at ngayan, Fakateun. Ay at taguyan anya, at ngayan, Matean at Talun. E nafon sanya fag duwa sik fagmadaragangun gfate at faufat kafud sas fagdaul daga at taw. At famate sik fiso ay sik fanlunus dawdaw ay sik daylan ay sik ngay mangimut tagfangagat.

9Ay Tupa nu nalunggab at falimak fandafut, manlag akdi sik ngay taw at falad sis daga fagyagoan. At fagnafateun anway kanya matuyan nafoyung Diyus at longan. 10Ay kanya gbiya nu guro te, “Em Fun, o wan at madaragang, ay at malayun sat masine, ay at matuyan! Seduge ya ban nu gfauri o at ngay taw sas fagdaul daga anway sa at nafatean emi?” 11Ay rodi e nafon sas bawat sadi sik balukas ngaba malagsi. Ay nalong te, “Fanyai yap sirut yap ngay insak at kayuwan ay ufud fag ngay fanuguwan, ay ngay fadugsay at tiba nu e fate kata yangay ayu.”

12Ay Tupa nu nalunggab at faunumk fandafut, tam daga nauwigan dawdaw. Ay manlag akdi, tam menit inlayung katvngvd sik lanbung malayung. Ay gina tam magdanun mabalulang, inraska katvngvd sik taguk. 13Ay tam ngay galeme nafangatongan wan, kata sik buwadan at yud intaba nafangarabasan gina natagmara dawdaw. 14Ay wa kalag tam kiwang, nalyam wan kata wa sik fafil nu nafabilug. Ay kayu bugsul ay kayu furu wa sit fagtungkudan. 15Ay rodi fagdaul daga at ngay fun, ay at ngay tagmagurang, ay at ngay tagfangguna sundalu, ay at ngay mabalan fag taw, ay at madaragang fag ngay taw, ay anggan nus nga sinu fag taw, dewa sik fanuguwan ay dewa yud sik fanuguwan, kanya fagayu nasuksuwan wa sa sangay luwib ay sa sangay buknga batu daul sa sangay bugsul. 16Ay ka fag ngay taw nauro sanya fag ngay bugsul ay fag ngay batu daul te, “Atongi wa ngap sa emi laman ro wami glag at malunggung sit faglunggungan. Ay anggan Tupa at fandotaman wa mdasug sa emi. 17Anway at malimu fag menit, at fandotaman indasug wan. Ay nu katanya, we taw maasalubang sat daga salubangan.”

Currently Selected:

At Nafasure 6: TAWEAST

Highlight

Copy

Compare