At Nafasure 5
5
Uan Nalag sik Fafil at Mafabilugan ay sik Tupa
1Ay nalag aw sik fafil at mafabilugan. Ay at malunggung sa ka fag faglunggungan gbitbitan ka fag fafil sit siyun fag take. Ay sanya fag fafil e rirukan gsumbalian. Ay nadafut sanya fituk fandafut laman we rumafad. 2Ay nalag akyangay sik madaragang fag tagfabarita, ay gbiya nu gelongan te, “Sinu at kasakan laman mafafalunggab at ngay fandafut ay mafafarafad ka fag fafil at mafabilugan?” 3Ay we nalag nus di sadi, dewa tagsas banwa, ay dewa tagsas daga, ay dewa tagsas sad daga, at mafafarafad ka fag fafil at mafabilugan laman tumap. 4Ay nauyway aw dawdaw, anway kabalu aw te, we nalag at mafafarafad ka fag fafil at mafabilugan laman tumap. 5Ay rodi sanya fag ngay tagmagurang at sadi nalong angku te, “Lag guyway. Amatangani. Kanya at ke ngayan te, Liyun, siginans Uda fag fulan taw, ay siginans fun Dabid at kadagdagan nababo wan, laman rumafad ka fag fafil at mafabilugan at ke fituk fandafut.”
6Ay nalag aw sik Tupa, kata nu e nafate anya. Kanya malindug sad buknga ka fag faglunggungan, ay e ufat tagleleg ay 24k tagmagurang igsafung anya. Ka fag Tupa fitu at sunge ay at mata. Ka fag fituk mata at masuwad te, Diyus at fituk falad, at nasugu sas fagdaul daga. 7Ay kanya nkakbang sat faglunggungan ay nabul ka fag fafil at mafabilugan siginan at siyun fag take at malunggung sanya. 8Ay nu nabul wan ka fag fafil, ka fag ufat tagleleg ay ka fag 24k tagmagurang natudan gseg sas Tupa. Ay kanya fagayu e bitbitan sik gintu fag taya mapnu famabebanglu. Ka fag famabebanglu at masuwad, Diyus at ngay taw at darangin. Ay kanya gfaawangan at famaawangan 9ay gdanyu sik danyu bagu sas Tupa te,
“Kasakan o gbul ka fag fafil at mafabilugan, ay mafabul o at fandafut,
anway ebi e nafate emu, ay am taguk at fansali laman at ngay taw sas wa daga Diyus tuwa at ngay taw.
Nafili wo anya siginan fagayu fulan taw sas fagdaul daga tagsadsamanan at ngay fanlong.
10Ay nafili wo ka fag ngay taw,
laman tam Diyus at ngay taganyun,
ay kanya tagmagurang ban sas fagdaul daga.”
11Ay rodi nalinggat aw, ay nadungug aw sik ngay tagfabarita ayuwayu nu gelongan. Kanya fagayu masafung sa taglabi nu masine fag faglunggungan, ay sa ka fag ufat tagleleg, ay anggan sigon sa ka fag 24k tagmagurang. 12Ay kanya fagayu gbiya nu gdanyu te,
“O fag Tupa at kinkate ebi, kasakan tuwo e gseg emu te,
madaragang tuwo, ay mabalan, ay at ke fagsafulun, ay mabitsug. Guseganan gseg tuwami emu.”
13Ay nadungug aw fagayu at ngay awatan sis banwa ay sis daga ay anggan sisad daga ay sis dagat, fagayu gdanyu te,
“Sa emu at malunggung sa taglabi nu masine fag faglunggungan ay anggan sas Tupa, guseganan gseg tuwami ayu. Madaragang o faggugat faggugat ban.”
14Ay ka fag ufat tagleleg glong yangay te, “Kin, katanyai tuwa.” Ay kanya fag tagmagurang namalub ay naseg sas Diyus ay sas Tupa.
Currently Selected:
At Nafasure 5: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
