At Nafasure 4
4
Uan Nalag Taglabi nu Masine fag Faglunggungan sis Banwa
1Ay rodi, manlag akdi sik sakbawan sis banwa maluwangan wan. Ay ka fag longan aro ku nadungug takata sik budyung, katsi gdog yay fiya glong sa angku te, “Sakboi stiye. Ay nanfoyung aw emu at kumdasug ban.” 2Ay rodi tv, at Masine fag Falad nafaamatanganan angku. Ay nalag aw sis banwa sik faglunggungan ay e malunggung sanya. 3Ay at malunggung sanya at kamasuloan katvngvd sik mafanud ay masulo fag batu. Ay sanya fag faglunggungan e gsafungan balango masulo nu kalag. 4Ay e 24k faglunggungan yay gsafungan sanya, ay at malunggung sanya 24k tagmagurang. Ay kanya gbalukasan malagsi ay gsangboan gintu. 5Ay sad buknga fag faglunggungan nafangkilat way sigad, ay natadtalafunan ay naadgawangan. Ay sfagunan ka fag faglunggungan e fituk salung gigang. Kanya fag ngay salung, Diyus at Masine fag Falad at fitu. 6Ay sanya yangay sfagunan ka fag faglunggungan e sik lino maliyo way ngap kata sik batu tagtalfusan nu kalag.
Ay sanya fag faglunggungan e masafungan yangay sas ufat suluk, ufat tagleleg. Ngayu at mata sat ngaba bilug, dewa sat salubangan ay dewa sat guyuy. 7At taguna tagleleg kata sik liyun. Ay at faduwak tagleleg kata sik baka. Ay at fatuluk tagleleg at mata kata sik taw. Ay at faufat tagleleg kata sik biyo glayug. 8Ay ka fag ufat tagleleg e unumk fakfak. Ay ngayu at mata sa at ngaba bilug. Ay dewa mayabi, ay dewa mamenit, kanya wa katuwas nu gdanyu te,
“Malayun sat Masine tam Fun tam Diyus, at Tiba Tungud at Madaragang.
Tam Diyus ebi, ay katsi, ay anggan faggugat ban.”
9Ay ka fag ufat tagleleg igseg guseganan tuwa sat malunggung sanya sas faglunggungan, sa tagleleg faggugat faggugat. 10Ay kayu ginan ka fag ufat tagleleg igseg, ka fag 24k tagmagurang gtudan gseg yangay sat malunggung sanya sas faglunggungan, sa tagleleg faggugat faggugat. Ay ka fag ngay tagmagurang gfatungkud at ngay sangbo fag gintu sa ka fag akbang faglunggungan. Ay kadugenya, gdanyu te,
11“Kasakan o, em Fun em Diyus,
laman e gseg tuwa sa emu te,
o wan at Tiba Tungud at ke fagmasineun,
ay Tagkasakan fag fagsegan,
ay anggan at madaragang,
anway o wan at naawat fagayu.
Am fasadan wan am fagnaawatun
ay am fagnafasteun fagayu.”
Currently Selected:
At Nafasure 4: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
