At Nafasure 3

Sik Rirukan sas Fulan Sardis

1“Riruki sas tagfabarita tagulit ngay tagafanud sas fulan Sardis te:

“At ke fagmasadiun sat Masine fag Falad ke fituk ugali masine, ay at tagbitbitan fituk galeme, glong te: Nasaful akwan ay ngay fagbulun. Dewa e gamatangan te, gafanud yay am gugat sa angku, roro kata way am sik ngay matean. 2Famasadani wan, ay fatvngvduni at sawad fag ugali at masine tagsi ayu anway gakalyamun wan. Nu glag aw ay fagbulun ya kasakan sa ku Diyus at fakaumsigun. 3Nu katanya, amatangani tuwa te, setain ay nadungug fafaninguni tuwa katanya. Ay ubuni wan ay ngay asalanan. Nu dway am mafamasadan ay maning, umdasug aw kata sik takamul nu kadasug. Ay wam sumaful nu an aw umdasug. 4Dewa katanya, sanya sis fulan Sardis gsadsadian e sawad yay at yud nafaningan tibak taw at mauri at fagbulun. Ay kanya ban fag ngay taw gufud ban angku gbalukasan malagsi, teway kasakan tuwa nu gufud angku. 5Nus nga sinu at nababo, e fasulun ban sa anya sik balukas malagsi. Ay faggugat dakdi ban rumarus at ngayan siginan ka fag fafil at ngayan te, Gleleg Faggugat. Ay nanfoyung ban aw sa ku Mama ay sat ngay tagfabarita te, kanya ku taw.

6“Nu e talinga tuwam, dungugani at Masine fag Falad at longan sa sangay tagafanud.

Sik Rirukan sas Fulan Filadelfiya

7“Riruki sas tagfabarita tagulit ngay tagafanud sas fulan Filadelfiya te:

“At ke ngayan Masine ay Mafanud, tagted Dabid at fanluwang. Ay kanya nu naluwang wan, we mafadingding, ay nu nadingding wan, we mafaluwang. Kanya glong te: 8Nasaful akwan ay ngay nafagbulun. Ay naluwang aw sakbawan laman masakbo wam, ay we taw mafadingding. Nasaful akwa te, ya kasakan ay fagmabitsugun. Dewa katanya, gfaning tuwam ku foyungan ay di am kamayud angku. 9Ay amatangani tuy ku longan: Ka fag ngay taw tagfaning Satanas nanfalub kban sa ay daga salubangan, laman kanya sumaful ban te, kesug aw ayu. Kanya fag ngay taw glong te, ‘Ami, sik taw Udyu wami.’ Ay roro at matuyan, kanya sik ngay takamuwagan way. 10Nafaning tuwam ku longan te, sungatani tuwa, nu katanya, nanfatvngvdun aw ayu ginanya fag ngay menit e ngay fagatakanun sas fagdaul daga, fanfaskud ban sas fagayu taw. 11Dwa ban glugo nu kadasug aw. Nu katanya, fatvngvdi tuwa ay fagafanudun sa angku, laman di ban e mago ayu at nafon ayu fag sangbo. 12Nus nga sinu at nababo, gfakata ban aw anya sik turuk sa ku Diyus bale. Ay kanya wa ban umyayu sanya ginan faggugat. Ay nanriruk aw sa anya ku Diyus at ngayan, ay ku Diyus at fulan at ngayan te, Bagu fag Erusalem. Ka fag fulan takadaga siginans banwa siginan ku Diyus. Ay anggan rumiruk aw ku ngayan bagu sanya fag ngay taw.

13“Nu e talinga tuwam, dungugani at Masine fag Falad at longan sa sangay tagafanud.

Sik Rirukan sas Fulan Laudisiya

14“Riruki sas tagfabarita tagulit ngay tagafanud sas fulan Laudisiya te:

“Ay at ke ngayan te, Kin, at mafanud ay at matuyan fag tagfatuyan, at fakasigadan Diyus at awatan fagayu, glong te: 15Nasaful akwan ay ngay fagbulun. Di am matis ay di am masugba. At masine masugbai tuwa, ay ate matisi tuwa. 16Ay kata way am sik safa at malukme. Nu katanya, mulub akwa ayu. 17Glong am te, ‘Mabalan wami. Ay e kwa wami. Ay wami e fagayudanun.’ Roro wam nasaful te, e fagafanawaun yay am. Ay sik mafanyu yay am, ay wam e kwa, ay wam glag, ay wam e balukas. 18Ay katanya wayay, iglong aw ayu te, bilii siginan angku sik gintu at nafasine sad afuy, laman e kwa tuwa ban am. Ay bilii yangay sik ngay balukas malagsi, laman di am kapla ay iba te, malanu way am. Ay bilii yangay sik fanrarus ay famafiya sa ay mata laman glag tuwa ban am. 19Fagayu ku nesugan fag taw igbaya aktuwa anya ay igfegan aw sigon anya. Ay anway katanya, maseganamai tuwa sat masine fag ugali ay ubuni ay ugali at mauri. 20Dungugani, malindug aw katuk sis day sakbawan bale. Nus nga sinu at nadungug angku ay lumuwang at sakbawan bale, sumakbo aw sanya fag bale. Ay rodi gasfuwan wami gfangon. 21Nus nga sinu at nababo, gfalunggung ban aw anya gfasfuwan angku sa ku faglunggungan, kata yangay nu gbabo aw at mauri ay malunggung gasfuwan sa ku Mama faglunggungan.

22“Nu e talinga tuwam, dungugani at Masine fag Falad at longan sa sangay tagafanud.”

Currently Selected:

At Nafasure 3: TAWEAST

Highlight

Copy

Compare