At Nafasure 2

Sik Rirukan sas Fulan Efesu

1“Riruki sas tagfabarita tagulit ngay tagafanud sas fulan Efesu te:

“At tagbitbitan fituk galeme sit siyun fag take ay glo sad buknga fituk salung gintu glong te: 2Nasaful akwan ay ngay fagbulun. Madaragang wa fiya nu gfagbulun am. Ay maasungatan yangay am. Ay nasaful kyangay te, kalimata tuwam at mauri fag ngay taw. Nafaskud wam sik fulan taw tagelongan te, ‘Ami, Diyus wami at nasugu.’ Sa ay nafaskudan, nalag wam te, kanya sik takamuwag way. 3Ay nasaful akyangay te, nabaris tuwam ngay fagatakanun, teway gafanud tuwam sa angku, ay di mafanalo ay amatanganan. 4Dewa katanya, tuy ku fagyudun kaumsig si ayu, katsi wa katvngvd ebi taguna nu kesug am angku. 5Amatangani tuwa te, go inda fag ugali nu gsalan am. Ubuni wan ay ngay asalanan ay faningi yap kata ebi ay ugali. Nu dway am mubun, kadasug aw ay mul akwan ay salung. 6Dewa katanya, ku fagusegananun si ayu, kalimata tuwam taw Nikulaita at ugali. Ay anggan aw, kalimata akyangay ka fag ngay taw at ugali.

7“Nu e talinga tuwam, dungugani at Masine fag Falad at longan sa sangay tagafanud. Nus nga sinu at nababo, nanfon ban aw anya at fagmadaragangun, laman mafaon ka fag kayu buwadan tagfon leleg sas Diyus at fagbanwanan.”

Sik Rirukan sas Fulan Esmirna

8“Riruki sas tagfabarita tagulit ngay tagafanud sas fulan Esmirna te:

“At taguna ay fakatabuwan, at kinkate ay indog gleleg, glong te: 9Nasaful akwan ay fagatakanun. Ay nasaful kyangay te, wam e kwa. Ay dewa katanya, mabalan tuwam. Ay nasaful akyangay te, e fulan taw gfalingun ayu. Kanya fag ngay taw glong te, ‘Ami, sik taw Udyu wami.’ Ay roro at matuyan, kanya sik ngay takamuwagan way ay Satanas way at ngay fanuguwan. 10Lag am kalimu sat kumdasug fag faurianan am fagdumalanun ban. Amatangani, Satanas gfasungsung ban ayu tiba, laman gfaskud ay fagafanudun. Ay safulu bank menit gfauri ayu. Sungatani tuwa, nus nga am umkate. Ay mon ban aw ayu leleg yud e fakatabuwan.

11“Nu e talinga tuwam, dungugani at Masine fag Falad at longan sa sangay tagafanud. Nus nga sinu at nababo, wa ban dumalan sas faduwak fakateun.”

Sik Rirukan sas Fulan Fergamu

12“Riruki sas tagfabarita tagulit ngay tagafanud sas fulan Fergamu te:

“At ke fiso at duwa tigyangan maruk, glong te: 13Nasaful kwa te, ay fagbanwanan sanya si yay Satanas at fagmagurangan. Dewa katanya, gafanud tuwam sa angku. Ay di am naubun ay fagafanudun sa angku, dewa ebi Antipas, ku takamoyung at matuyan, e nafate anya si ay buknga, sis Satanas at talun. 14Dewa katanya, tuy ku fagyudun kaumsig si ayu: at tiba sanya gfaning way Balaam at foyungan. Kanya ebi at nafoyung sas Balak gfe asalanan taw Israel, laman umon at nafon sa sangay tawtawan, ay anggan kamayun. 15Ay anggan at tiba gfaning taw Nikulaita at foyungan. 16Ubuni wan takatanya ay ugali. Nu dway am mubun, kadasug kwa daw mafali sa ayu. Ay tagsiginan ku bibig fag fiso, kanya ku famabarangyan sanya fag ngay taw.

17“Nu e talinga tuwam, dungugani at Masine fag Falad at longan sa sangay tagafanud. Nus nga sinu at nababo, nanfon ban aw sik fakonun siginans banwa. Ay nanfon kyangay anya sik batu malagsi, ay sanya fag batu e rirukan at bagu fag ngayan. Ay we gsaful ka fag ngayan, dasday ka fag taw at fabul ka fag batu.”

Sik Rirukan sas Fulan Tiatira

18“Riruki sas tagfabarita tagulit ngay tagafanud sas fulan Tiatira te:

“Diyus at Baguwama, at ke mata kata sik afuy gigang, ay at darafa kata sik tansu madalus, glong te: 19Nasaful akwan ay ngay fagbulun. Ay nasaful akyangay te, kesug tuwam, ay gafanud tuwam, ay gtarabang tuwam, ay gsungatan tuwam. Ay nasaful akyangay te, ay ugali katsi amasine yap ebi gina am bagu gafanud. 20Dewa katanya, tuy ku fagyudun kaumsig si ayu: gfabayan way am ka fag mangena Esebel nu glong te, ‘Aw wan Diyus at taglong at sadi.’ Ay roro dewa glong katanya, at foyungan igfanluk way ku ngay fanuguwan laman kamayun ay kon at anyun at nafon sa sangay tawtawan. 21Nafanya akyama ka fag mangena nu gubun at ugali at mauri. Yaya, kanya wa kaumsig gubun nu kamayun. 22Ay katanya wayay, nanfe daylan ban aw dawdaw anya, ay anggan at natsa anya fag ngay mangama, faurianan kyangay ban dawdaw, nu dway ban mubun at ugali at mauri. 23Ay gfate akwa ban tagfaning ka fag mangena, laman fagayu tagafanud sumaful te, gsaful akway taw at amatanganan ay at fakaumsigun. Ay nanfagbulun ban aw sa ayu bawat sadi kata ay ngay nafagbulun.

24“Ay am tiba sis fulan Tiatira, at yud gfaning ka fag mangena at foyungan at mauri, ay at yud gdungugan sas Satanas at matvngvd nu masuksukan fag mauri, glong aw sa ayu te, dakwa gfamut ku suguwan sa ayu. 25Dewa katanya, fatvngvduni tuwa ay fagafanudun sa angku anggan aw mdasug. 26Nus nga sinu at nababo ay at nafaning ku fakaumsigun anggan sas fakatabuwan, nanfon ban aw anya at fagmadaragangun, laman mafamagurang ban sas fagayu talun at ngay taw. 27Katvngvd ebi ku nabul fag fagmadaragangun siginan ku Mama. Ay kanya gina ban igmagurang ka fag ngay taw, e famalang ban sik bakal. Ay kanya nu gfalang sa sik takamabo, katvngvd nu nafayamas sik bisu daga. 28Ay mon kyangay sa anya at tagurabas.#2:28 tagurabas: Tiba nu glong, galeme daul sbalabag. Sis Fanginglis, morning star.

29“Nu e talinga tuwam, dungugani at Masine fag Falad at longan sa sangay tagafanud.”

Currently Selected:

At Nafasure 2: TAWEAST

Highlight

Copy

Compare