At Nafasure 21

Sik Bagu fag Banwa ay sik Bagu fag Daga

1Ay rodi, nalag aw sik bagu fag banwa ay sik bagu fag daga, anway at taguna fag banwa ay anggan at taguna fag daga nalyam wan. Ay anggan dagat nalyam wan. 2Ay nalag akyangay sik Mafilian fag Fulan, at bagu fag Erusalem, nu kababa siginans banwa, siginans Diyus. Ay ka fag fulan mafamasadan wan kata sik fasad mangena nu nafasineun anya anway galadlaganun wan sat fasad mangama. 3Ay rodi, nadungug aw nu e gelongan dawdaw siginans faglunggungan te, “Katsi Diyus at fagbanwanan si wa at ngay taw. Diyus igbanwan wa ban maful at ngay taw. Ay kanya Diyus at taw wan. Ay Diyus wan tagufud anya faggugat. 4Ay Diyus rumarus ban fagayu taw at luwon si at mata. Ay di ban e fakateun, ay di ban kabalu, ay di ban guyway, ay anggan di ban e fakasayitun, teway ebi mandi fagayu nalyam wan.”

5Ay at malunggung sis faglunggungan iglong angku te, “Linggati, nafabagu akwan fagayu nus nge wain!” Ay kanya nalong yay te, “Riruki fagayu aro ku longan teway kanya mafanud ay matuyan.” 6Ay kanya nalong yangay te, “In-gurungan wan! Aw wan taguna ay taguyan, ay at fagsigadan ay at fakatabuwan. Nanfainum aw sa nus nga sinu takadanum safa tagfon leleg yud e fansali. 7Nus nga sinu at nababo, kanya aro ku longan fagayu umgurungan wa fiya sa anya. Ay aw wa ban at Diyus. Ay kanya wa ban ku ngay unga. 8Ay fagayu tagfangalimu nu gfaning angku, ay fagayu at yud gafanud angku, ay fagayu at mafurat siginan at asalanan, ay fagayu takamate taw, ay fagayu takamayun, ay fagayu at mabara, ay fagayu tagseg sas tawtawan, ay anggan fagayu takamuwag, kayunya at ke afud sas lino afuy at ke asupri. Sanya at faduwak fakateun.”

At Bagu fag Erusalem

9Ay at sadi ka fag fituk tagfabarita at ke ba taya, at ke suwadan fanfauri, inkakbang angku ay glong te, “Glo wata, nanfalag aw emu Tupa at fasad mangena.” 10Ay gina at Masine fag Falad igfaamatanganan angku, ka fag tagfabarita nataban angku sa tagbiya ay ngabat fag bugsul. Ay kanya nafabantay angku Diyus at fulan, Erusalem, gina kadaga siginans banwa, siginans Diyus. 11Ay Diyus at fagmasineun sanya wa fag fulan, ay at kamasuloan katvngvd sik mafanud ay masulo fag batu tagtalfusan nu kalag. 12Ay ka fag fulan maaladan matukba ay ngabat, ay at alad e labi duwak sakbawan, ay kayu sakbawan e sik tagfabarita tagulit. Ay si sangay sakbawan marirukan sanya Israel fag labi duwak baguwama at ngay ngayan. 13Ay tulu at sakbawan sas fakamenitan baliwa fag tigyangan alad. Ay tulu yangay sas fakayabian fag tigyangan. Ay tulu sas siyun fag tigyangan. Ay tulu yangay sas wala fag tigyangan. 14Ay sanya fag alad sit daga e labi duwak batu tagfatvngvd, ay sanya fag labi duwak batu nafafafud nariruk Tupa at labi duwa at ngay nasugu at ngayan.

15Ay aro fag tagfabarita at nafasulitanan angku, e bitbitan sik fansukat at fangawat gintu, laman nansukat ka fag fulan, ay anggan at ngay sakbawan, ay at alad. 16Ay nasukat ka fag fulan, ay at kadaulan, ay at kabaan, ay at kabatan, kaba way at sadi, 2,400 kilumitru. 17Ay nasukat yangay at alad, 64 mitru at kabatan. At fansukat kata yangay ste swa daga sik taw at fansukat. 18Ka fag alad at fangawat sik mafanud ay masulo fag ngay batu. Ay ka fag fulan at fangawat gintu wa tanan kata sik bubug nu tagtalfusan. 19Si at fagfatvngvdan at alad e ngay famasinean: sik ngay mafanud fag batu. At fasadi, sik batu mafanud ay masulo. At faduwa, sik batu ganyang mafayasan. At fatulu, sik batu gradraskaun mafayasan. At faufat, sik batu melo mafayasan. 20At falima, sik batu maraska ladlagsiun madalusan. At faunum, sik batu maraska madalusan. At fafitu, sik batu galagsiun mafayasan. At fawalu, sik batu melo gaanyangun mafayasan. At fasiyam, sik batu melo galagsiun mafayasan. At fasafulu, sik batu melo gamalayungun mafayasan. At falabi sadi, sik batu garaskaun mafayasan. At falabi duwa, sik batu maubian mafayasan. 21Ay at labi duwak sakbawan alad, at fangawat siginans tagbvt fag ale batu. Ay at dalan fulan tanan wa gintu kata sik bubug nu tagtalfusan.

22Kwe nalag sanya Diyus bale, teway tam Diyus tam Fun, at Tiba Tungud at Madaragang, ay Tupa, kanya wa fiya at ngay taw at fagnansegan. 23Ay sanya fag fulan wa gayudan menit ay magdanun at damlag, anway Diyus wa at fagmasineun tagdamlag sanya, ay Tupa wan at salung sanya. 24At salung at damlag mafafayamag sa sangay taw sas fagdaul daga. Ay ngay fun sas fagdaul daga muba ban sanya at ngay fagmabalanun. 25At ngay sakbawan alad maluwangan wa gugat. Mamenit way ban gugat; wa ban kayabi. 26Ay fagayu talun at ngay taw muba ban ayuwayu sanya at ngay fagmabalanun. 27Ay faggugat wa ban maasakbo sanya nus nge wain at mafurat. Ay sik taw at mafurat at fagbulun, ay anggan takamuwagan. At maasakbo ban sanya kayu way at marirukan at ngayan sas Tupa at fafil at ngayan te, Kayu Tagleleg Faggugat.

Currently Selected:

At Nafasure 21: TAWEAST

Highlight

Copy

Compare