At Nafasure 22

Sik Safa Tagfon Leleg

1Ay aro fag tagfabarita nafalag angku sik safa tagfon leleg, ay kalimus siginans Diyus ay Tupa at faglunggungan. Ay ka fag safa maliyo kata sik bubug tagtalfusan nu kalag. 2Ay kalimus yangay sa sangaba dalan sis fulan. Ay sis duwa tigyangan safa sanya ka fag kayu tagfon leleg. Ay ka fag kayu labi duwa ginan gbuwadan sik banwa; kayu magdanun gbuwadan wan. Ay at don e fanambagun yangay laman at famafiya sas fagayu talun at ngay taw. 3Faggugat we mdasug sanya fag fulan Diyus at ngay nalimatan. Ay sanya wan Diyus ay Tupa at faglunggungan. Ay at ngay fanuguwan gseg ban anya. 4Ay at ngay fanuguwan lumag wa ban at mata, ay at ngayan marirukan ban si at ngay fanuguwan at angas. 5Ay wa ban e yabi sanya. Ay at ngay taw sanya wa ban gayudan at damlag siginan sik salung ay siginan tam menit, anway tam Fun tam Diyus tagyamag ban sanya. Ay kanya fagayu gmagurang ban faggugat faggugat.

6Ay rodi ka fag tagfabarita nalong angku te, “Mafanud ay matuyan ste at ngay longan. Ay tam Fun tam Diyus, tagfon at Masine fag Falad sat ngay taglong, kanya nasugu at tagfabarita sat ngay fanuguwan, laman igfoyung sa anya at ngay takagurungan ban.”

Isus nu Gadasugun

7Amatangani! Makbang wan nu kadasug aw. Guseganan wan nus nga sinu tagfaning at foyungan at marirukan ste fag fafil.

8Aw Uan. Nadungug aw ay nalag takatanya fagayu. Ay nu nadungug aw ay nu nalag aw takatanya, inlub aw sa ka fag tagfabarita at daga salubangan laman gseg anya. Ka fag tagfabarita at nafalag angku takatanya fagayu. 9Ay kanya nasalag angku te, “Lagi, lag katanya! Sik fanuguwan akyangay kata emu, ay anggan kata am ngay fadugsay fag ngay taglong, ay fagayu tagfaning at marirukan ste fag fafil. Sas Diyus tuwa nu gseg o.” 10Ay kanya nalong yangay sa angku te, “Lag gsuksuk at foyungan ste fag fafil, teway makbang wan ka fag foyungan nu kagurungan. 11At mauri fag taw, gfaugat yay gfabulun sat mauri. Ay at mafurat fag taw, gfaugat yay gfagbulun sat mafurat. Ay at matuyan fag taw gfaugat yay gfagbulun sat matuyan. Ay at malayun fag taw, laman gfaugat yay gfagbulun sat malayun.”

12Ay tam Fun Isus nalong te, “Amatangani! Makbang wan nu kadasug aw. E fagafonun aw sa sadi sadik taw at natvngvdan sat nafagbulun. 13Aw wan taguna ay taguyan, ay at fagsigadan ay at fakatabuwan.

14“Guseganan tuwa sik taw nu glaba tuwa at ngay balukas, laman umke afud sa ka fag fun kayu tagfon leleg, ay umsakbo sasad sakbawan alad fulan. 15Ay roro fagayu tagfaning at bilug fagalabianun at mauri, ay at ngay mabara fag taw, ay at ngay takamayun, ay at ngay tagfate taw, ay at ngay tagseg tawtawan, ay anggan fagayu taw takaumsig gfatunglus sas fakamuwaganun, takatanya kafamato way ban sis day alad fulan.

16“Aw wan Isus, nasugu aw ku tagfabarita laman nanfoyung ku longan sa sangay tagafanud. Aw wan Fun Dabid at kadagdagan. Ay aw wan at madamlag fag tagurabas.#22:16 tagurabas: Tiba nu glong, galeme daul sbalabag. Sis Fanginglis, morning star.”

17Ay at Masine fag Falad ay Tupa fasad mangena nalong te, “Istei!” Ay fagayu at nadungug, lumong yangay te, “Istei!” Fagayu takadanum, akbangi. Ay nus nga sinu takaumsig, buli ka fag safa tagfon leleg, at yud e fansali.

18Aw wan Uan, gfatagak aw sas fagayu tagdungug at foyungan at marirukan ste fag fafil. Nus nga sinu at nafamut sat foyungan, Diyus mamut yangay ban sa anya at ngay fanfauri sat nafoyung ste fag fafil. 19Ay nus nga sinu at nafasirut sat foyungan at marirukan ste fag fafil, Diyus igsalag yangay ban anya laman wa mafaon ka fag kayu tagfon leleg at buwadan. Ay anggan igsalag yangay ban anya laman wa mful sas Diyus at fulan at nalong ste fag fafil.

20Ay Isus at tagfatuyan sas fagayu at foyungan ste fag fafil. Kanya glong te, “Gurungan makbang wan nu kadasug aw!” Kin, katanyai tuwa. Adasugi wan, em Fun Isus!

21Igdarangin aw sa tam Fun Isus te, famanyuni ayu fagayu, Diyus at taw. Kin, katanyai tuwa.

Currently Selected:

At Nafasure 22: TAWEAST

Highlight

Copy

Compare