At Nafasure 20

Sik Libuk Banwa

1Ay rodi, nalag akyangay sik tagfabarita nu kadaga siginans banwa. Ay kanya gbitbitanan sik kadina tagbvt ay sik fanluwang sa at ngabasad fag tabyu at yud e bangsi. 2Ay ka fag tagfabarita nagamat yaw daul, ebi ebi taguna fag yaw daul at ngayan te, Tagfansalag ay ate Satanas. Ay kanya nasiyuk dawdaw ka fag yaw, laman ban sik libuk banwa wa malfas. 3Ay naukas ka fag yaw sas tabyu at yud e bangsi. Ay nadingding wan ka fag tabyu, ay anggan nadafut sik fagtoglagan laman we namaskud nanluwang. At fagnasungsungun laman ban kanya wa mafafanluk sas fagayu talun at ngay taw, yap ngay umlangfe ka fag libuk banwa. Ay nu mlangfe wa ban, gfalfas yay ban ka fag yaw sik kadugayun.

4Ay rodi, nalag aw sik ngay faglunggungan. Ay e nafon fagmadaragangun sat ngay malunggung sanya laman igfili te, go sinu at fagfauriun ay go sinu at fagfalangfeun. Ay nalag akyangay sik ngay falad, ebi at kinkate at nalifungan at liug. At fagnafateun, anway kanya gfoyung Isus at fagbulun ay anggan Diyus at longan. Ay kayunya at yud naseg sa ka fag mangimut tagfangagat ay anggan sat aninu, ay at yud e rirukan ka fag mangimut at ngayan sit angas ay ate sit daluwap. Ay rodi kayunya gdog yay gleleg ay gmagurang gfasfuwan Isus kadugenya fag libuk banwa. 5Ay at tiba at kinkate, ya ban gdog kaleleg yap ngay ban umlangfe ka fag libuk banwa, kata aro at taguna at kinleleg. 6Guseganan tuwa Diyus at ngay taw at taguna nadog gleleg. Ay at faduwak fakateun we fagmadaragangun sa ka fag ngay taw. Ay kanya ban tam Diyus ay tam Fun Isus ban at ngay taganyun. Ay kayunya nanmagurang yangay ban gfasfuwan tam Fun Isus kaduge sik libuk banwa.

Satanas Nalabawan wan

7Nu mlangfe wa ban ka fag libuk banwa, e falfas yay ban Satanas siginan at fagmasungsunganan. 8Fagnafalfasunun, nanfanluk ngay taw sas fagayu talun sas fagdaul daga, at masuwad te, Gug ay Magug fag ngay talun. Satanas nanfaful laman nanfabarangyan sa sangay tagafanud. Ay at ngay taw at kayuwan, kayus lagnas sas tigyangan dagat. 9Ka fag ngay taw umrapyag ban sas fagdaul daga ay umsafung Diyus at ngay taw at fagbanwanan, at masuwad te, Diyus at nesugan fag fulan. Ay sik afuy umtong siginans banwa ay nanfamin kanya fag ngay taw. 10Ay Satanas, at nafanluk fag ngay taw, e mukas ban sas lino afuy at ke asupri, sas fakukasan ka fag mangimut tagfangagat ay anggan ka fag taglong at yud matuyan. Ay e gfauri ban anya kayu menit ay yabi, faggugat faggugat ban.

Taguyan fag Faurianan

11Ay rodi nalag aw sik taglabi nu masine fag faglunggungan daul malagsi, ay anggan at malunggung sanya. Ay fagdaul daga ay banwa malyam wan. Ay we nalag wan sanya. 12Ay nalag aw at ngay kinkate nu malindug, at madaragang ay at yud madaragang. Kanya malindug sa taglabi nu masine fag faglunggungan akbang. Ay sanya nalunggab sik ngay fafil, ay anggan fag fafil at ngayan te, Kayu Tagleleg Faggugat. Ay sanya fag ngay fafil marirukan at ngay kinkate at fagbulun te, go masine ay go mauri, anway fagayu at kinkate at fagbulun fagayu e nariruk wa sanya. 13Ay dagat ay daga nafasure at ngay kinkate sanya ginan, ay natap fagayu at kinkate at ngayan kata at nafagbulun fagayu te, go masine ay go mauri. 14Ay naukas fakateun ay talun matean sas lino afuy. Ka fag lino afuy at masuwad te, anwa at faduwak fakateun. 15Ay kayu at yud marirukan at ngayan sis fafil at ngayan te, Kayu Tagleleg Faggugat e naukas sas lino afuy.

Currently Selected:

At Nafasure 20: TAWEAST

Highlight

Copy

Compare