At Nafasure 19

Gseg Watam Tam Diyus

1Ay rodi, nadungug aw kata sik ngay taw ayuwayu nu gelongan dawdaw siginans banwa, ay iglong te, “Gseg watam tam Diyus! Tam Diyus wan tagfalangfe taw. Ay kanya tuwa at madaragang ay at ke fagmasineun. 2Diyus nu gfauri tagasalanan matuyan ay kasakan. Kanya nafauri sa ka fag mangena tagfabili at bilug at madaragang, anway kanya nafafurat sas fagdaul daga at taw anway sat nafamayunan, ay kanya nafate wayay Diyus at ngay fanuguwan. Diyus nafauri ka fag mangena.” 3Ay ka fag ngay taw gdog yay fiya gelongan te, “Gseg watam tam Diyus! Sanya ginan fag mangena at madaragang at anus kaabat faggugat faggugat ban.” 4Ay ka fag 24k tagmagurang ay anggan ka fag ufat tagleleg namalub ay naseg Diyus, at malunggung sat faglunggungan. Kanya fagayu glong te, “Kin, katanyai tuwa! Gseg watam tam Diyus!”

5Ay siginans faglunggungan e naelongan te, “Segi tam Diyus, fagayu am at ngay fanuguwan, ay fagayu am at ngay takalimu anya, dewa at madaragang ay at yud madaragang!” 6Ay rodi nadungug aw kata sik ngay taw ayuwayu nu gelongan, katvngvd sik safa nu gfawas gbararusan, ay katvngvd yangay sik ngay fangalung ayu daw. Ay iglong te, “Gseg watam tam Diyus, teway tam Fun tam Diyus at Tiba Tungud at Madaragang tagmagurang fagayu! 7Fagayu tam, useganani ay segi anya, teway katsi wan Tupa nu kadaduwa. Ay at fasad mangena mafamasadan wan; 8nafasulun wa sa anya sik namasine ay masulo fag balukas.” (Ka fag namasine fag balukas, at masuwad te, Diyus at ngay taw at masine fag fagbulun.)

9Ay sik tagfabarita nalong angku te, “Riruki katatuy te: Guseganan at nagewan fag taw nu nanlag sas Tupa at fakadaduwan fag yafun.” Ay ka fag tagfabarita nafamut yay te, “Kanya ku longan, Diyus at ke longan fiya.” 10Ay inlub aw sat daga salubangan laman nanseg anya. Ay kanya nasalag angku te, “Lagi, lag katanya! Sik fanuguwan akway kata emu, ay anggan kata am ngay fadugsay tagafanud tagfoyung sa baliwas Isus. Sa tuwas Diyus nu gseg o, anway Isus at foyungan, kanya wan Diyus at ngay taglong at foyungan.”

Sik Tagsakay sis Kabayu Malagsi

11Ay rodi nalag aw sik sakbawan sas banwa nu maluwangan. Ay manlag akdi sanya sik kabayu malagsi. Ay at tagsakay at ngayan, Mafanud ay Matuyan, madyay matuyan nu gfili sinu at fagfauriun ay at yud fagfauriun ay anggan nu gfabarangyan. 12Ay at ngay mata kata sik afuy nu gigang. Ay ngayu at ngay sangbo sit alfuyu. Ay e marirukan sik ngayan si anya, ay we taw gsaful at masuwad, nu bunway kanya mandi. 13Ay at balukas nafasurung sas taguk. Ay nu gngayan anya, “Diyus at longan.” 14Ay ngay sundalu sis banwa galo anya, masakayan yangay sa sangay kabayu malagsi, ay gbalukasan masine ay malagsi fag balukas. 15Ay siginan aro taguna fag tagsakay e nsure siginan at bibig sik fiso maruk, at fanbabo sas fagayu talun at ngay taw. Ay kanya nanmagurang ban, ay at famalang ban sik bakal. Ay kanya sumiyad ban sas Diyus at fagturisan buwadan. Ay ka fag buwadan safa at masuwad te, Diyus at Tiba Tungud at Madaragang at mason fag fandotaman. 16Ay si at balukas ay si at balangbang e marirukan te, “Tiba Tungud fag Fun at Madaragang.”

17Ay rodi nalag akyangay sik tagfabarita nu malindug sis menit. Ay gbiya dawdaw nu guro sas fagayu manuk tungud taglayug sas kiwang te, “Stei. Afuli sas Diyus at nafamasadan ban fag yafun daul. 18Oni ban ngay fun at faknul, ay anggan ngay fun sundalu, ay at ke fagmadaragangun fag ngay taw, ay anggan ngay kabayu. Oni fagayu taw at faknul, dewa sik fanuguwan ay sik yud fanuguwan, dewa sik madaragang ay sik yud madaragang fag taw.”

19Ay nalag aw tagfangagat fag mangimut ay anggan fagdaul daga at ngay fun ay at ngay sundalu nu maful. Ay at fagmafulun sanya laman nanfabarangyan sa sangay tagsakay sis kabayu malagsi ay anggan at ngay sundalu. 20Ay nagamat wa ka fag mangimut, gfasfuwan ka fag taglong at yud matuyan. Kanya ebi at nafasure sik madulawan fag ngay fagbulun sa ka fag mangimut at akbang. Sat nafagbulun fag ngay madulawan, kanya nafanluk ngay taw at ke rirukan si at bilug ka fag mangimut at aninu ay anggan tagseg sat aninu. Ay ka fag mangimut ay anggan ka fag taglong at yud matuyan e naukas anya gleleg sas lino afuy sa tagdararungan fag asupri. 21Ay tagsakay sit malagsi fag kabayu nafate wan at sawad fag ngay taw, ay at famate sik fiso takasure siginan at bibig. Ay fagayu manuk tungud napsug wa dawdaw nu kon gugat gugat ka fag ngay kinkate at bilug.

Currently Selected:

At Nafasure 19: TAWEAST

Highlight

Copy

Compare