At Nafasure 1

At Foyungan sas Uan

1Tuy fag rirukan sa baliwas Diyus at nafalag sas Isus, at nafili fag Fun. Ay Isus nasugu at tagfabarita at sadi laman nanfoyung kanya fag nafalag sa angku, Uan, at fanuguwan. Kanya fag nafalag tagakagurunganun. 2Aw, gfoyung akwan fagayu Diyus at nafalag sa angku ay anggan tam Fun Isus at foyungan. 3Nus nga sinu tagtap ay tagdungugan tuy fag rirukan guseganan tuwa nu gfaning ste at marirukan. Ay at marirukan ste gakagurunganun wan.

Tagriruk ay at ngay Tagtap

4-5Aw Uan.

Tuy ku rirukan sa sangay tagafanud sis fituk fulan sis talun Asia.

Tam Diyus, ay at fituk Masine fag Falad,#1:4-5 fituk Masine fag Falad: at masuwad, kanya fagayu sadi way fag Falad. ay tam Fun Isus tumarabang ay nanfanabayanan tuwa ayu. Sa baliwa tam Diyus, kanya tagleleg katsi, ay ebi, ay anggan faggugat ban. Sa baliwa fituk Masine fag Falad, kanya sas ke tam Diyus at faglunggungan at akbang. Sa baliwa tam Fun Isus, kanya tagfatuyan at mafanud, ay taguna tagdog gleleg, ay anggan tagfun sas fagayu fun sas fagdaul daga. Kanya takesug antam. Ay at taguk at nafalfas antam siginan tam ngay asalanan. 6Ay kanya nafili antam sik ngay fun ay sik ngay taganyun laman nanfaning ay nanseg at Tama, tam Diyus. Kanya madaragang ay at ke fagmasineun faggugat faggugat. Kin, katanyai tuwa.

7Amatangani. Tam Fun Isus umdasug ban gasfuwan sik ngay linyabu. Ay fagayu taw lumag ban anya, ay anggan ebi at natubuk anya. Ay fagayu fulan at ngay taw muyway wa ban katvngvdan nu kalimu te, gfauri wa anya. Kin, katanyai wa fiya. Tam Fun Isus, adasugi wan.

8Tam Fun tam Diyus nalong te, “Aw wan taguna ay taguyan.” At masuwad te, aw tagleleg katsi, ay ebi, ay anggan faggugat ban, ay Tiba Tungud at Madaragang.

Uan Nalag Tam Fun Isus At Nadog Gleleg

9Aw ay fadugsay, Uan. Insadi watam sas Isus, nu katanya, aw wan ay ufud sas fagatakanun, ay sas Diyus at fagmagurangan, ay anggan sa nu gsungatan tam. Ay ku faginsungsungun katsi sas furu Fatmus, anway nafoyung aw Diyus at longan ay Isus at ngay nafagbulun. 10Gina si tam Fun at Menit, at Masine fag Falad gfaamatanganan angku, ay nadungug aw kata sik budyung siginan ku day guyuy, 11ay gbiya nu gelongan te, “Riruki am nalag laman sik fagtapan. Ay faubai sa sangay tagafanud sas fituk fulan: sas Efesu, ay sas Esmirna, ay sas Fergamu, ay sas Tiatira, ay sas Sardis, ay sas Filadelfiya, ay sas Laudisiya.”

12Ay ku faginbilingun nanlinggat aw te, taw kanya tagelongan sa angku. Ay ku nalag fituk salung at fangawat gintu. 13Ay sisad wabilug fag ngay salung e malindug kata sik taw. E balukas ngaba gdasug sat darafa, ay at famutus sit dubdub at fangawat gintu. 14Ay sit alfuyu at buk kamalagsi sik linyabu nu malagsi. Ay at duwak mata nu malinggat kata sik afuy nu gbagaan. 15Ay at darafa katvngvd sik tansu nu mafadalusan at nafaraska sasad afuy. Ay kanya nu gelongan, kadaw sik safa nu gfawas gina kadaul dawdaw. 16Ay si at siyun fag take gbitbitan fituk galeme. Ay siginan at bibig insure kata sik fiso at duwa tigyangan maruk. Ay at mata masulo dawdaw katvngvd tam menit sis wa bilug menit.

17Ay nu nalag aw anya, inlufut kway sigad sit daga salubangan. Ay kata akwa sik matean. Ay kanya nafatayuk at siyun fag take sa angku ay nalong te, “Lag kalimu. Aw wan taguna ay anggan taguyan. 18Ay tagleleg aw faggugat. Inkate akwan ebi, ay gleleg akyangay katsi anggan faggugat ban. Ay aw wan at ke fagmadaragangun dewa sas fakateun ay dewa sat matean at talun. 19Riruki tuwa am nalag katsi, ay anggan at kumdasug ban. 20Katatuy at masuksukan at masuwad sa ka fag fituk galeme, am nalag si ku siyun fag take, ay anggan sa ka fag fituk salung gintu: ka fag fituk galeme, kanya at fituk tagfabarita tagulit sa sangay tagafanud sis fituk fulan. Ay ka fag fituk salung gintu, kanya at ngay tagafanud sis fituk fulan.”

Currently Selected:

At Nafasure 1: TAWEAST

Highlight

Copy

Compare