At Nafasure 18

Fulan Babilunya Inrasras wan

1Ay rodi, nalag akyangay sadi yak tagfabarita at madaragang dawdaw nu kadaga siginans banwa. Ay ka fag tagfabarita masulo dawdaw ay nadamlag sas fagdaul daga. 2Ay kanya gbiya nu guro te, “Inrasras wan ka fag fulan Babilunya at madaragang. Ay sanya wan at ngay mafurat fag falad nu gbanwan, ay anggan at ngay mafurat fag taw yabi, ay at ngay mafurat ay malimata fag manuk tungud. 3Fakatanyaun, ngay taw siginans fagayu fulan nainum wa sanya ginan fag fulan at fangaranug. At masuwad te, mauri dawdaw at fagalabianun. Ay at ngay fun siginans fagdaul daga sanya at fagnanfamayunan fag fulan. Ay at ngay tagfabili siginans fagdaul daga nkayu at fagmabalanun sanya ginan fag fulan, teway ka fag fulan mason dawdaw at fagalabianun.”

4Ay rodi nadungug akyay fiya sadi yak longan siginans banwa te,

“Am, ku ngay taw, alfasi wan sanya ginan fag fulan,

laman di ban am maguyudan sanya fag ngay tagasalanan,

ay laman di ban am mataipan gina gfauri anya.

5Sanya fag fulan at ngay asalanan nu nafaful, inkayu wan anggan indasug sas banwa.

Aw, ay Diyus, dakwa ban kalyam ka fag fulan at mauri.

6Nus nga setvngvd ka fag fulan at nafagbulun sa tiba,

katvngvdi yangay anya ay fagbulun sa anya.

Ay am, duwa ginani tuwa nu gfafoli am sa anya.

Ay at nafon sa tiba nu sik taya fangaranug, am, nu gfon am sa anya, fasoni duwa ginan.

7Nus nga setaw kanya nu gfalabi at fagbulun, ay nu gfaning sas fagayu at fagalabianun, katvngvdi yangay anya nu gfasait am anya,

anway kanya gamatangan mandi anya te, ‘Sik fun aktuwa mangena, ay malunggung aw sis fanfun fag faglunggungan, ay bunakdi sik burangday, ay dakdi ban kabalu faggugat.’

8Anway katanya, sik menit way sadi umdasug ban sik ngay faurianan sa anya: famate fag daylan, ay fakabaluun dawdaw, ay fanlunus dawdaw, ay sik afuy dawdaw laman lumabe anya,

teway tam Fun tam Diyus at madaragang at nanfaurianan anya.

9“At ngay fun sas fagdaul daga, ebi at nafamayun sanya, ay at nafaning sat fagalabianun dawdaw, nu lumag ban ka fag mangena nu kalabe, muyway ban anway kabalu dawdaw. 10Ay ka fag ngay fun ngayayu yay ban nu gbantay sanya, anway kalimu dawdaw te, manfauri anggan kanya. Kanya lumong ban te, ‘O fulan Babilunya! O at madaragang dawdaw, mafanyu dawdaw nu kalag o. Sik kadugayun way sirut nafaurianan o!’

11“Ay at ngay tagfabili siginans fagdaul daga kabalu ban sa ka fag fulan, anway sanya we taw nanbili at ngay fagbiliun, 12kata ngay gintu, pilak, ay mafanud fag ngay batu, ay ngay falefe at masine, ay at maubian fag falefe ay maraska, ay anggan ngay kayu mabebanglu, ay at ngay naawat siginans elipanti bagang, ay at ngay naawat siginan at masine fag kayu, ay tansu, bakal, ay batu malagsi, 13ay famabebanglu fag lukba aninge, ay lune fili, ay tiba yak famabebanglu, ay fangaranug, ay bantika, ay arina, ay fare, ay ngay baka, ay ngay tupa, ay ngay kabayu, ay ngay karwai, ay ngay nafabili fag fanuguwan fag ngay taw. 14Ay at ngay tagfabili sanya fag fulan nalong te, ‘Fulan Babilunya, fagayu am ngay naumsigan ebi, nalyam wan. Ay fagayu am fagmabalanun ay am famasinean ebi, nalyam yangay. Wa ban o lumag kanya fagayu.’ 15Ay ka fag ngay tagfabili at kinbalan sanya ginan fag fulan, wa ban kakbang teway kalimu te, manfaurianan. Kanya fag ngay tagfabili guyway kabalu. Glong te, 16‘Mafanyu dawdaw nu kalag at kin-gurungan sanya fag fulan at madaragang! Ebi kanya gbalukasan at masine fag ngay balukas malagsi, maubian, ay maraska. Ay e ngay famasinean yangay sit bilug gintu ay mafanud fag ngay batu. 17Ay roro sik kadugayun way sirut, fagayu nalyam wan!’

“Ay fagayu balutu at ngay kapitan, ay fagayu tagsakay sa sangay balutu, ay fagayu tagfalo balutu, ay anggan fagayu tagfesali sanya gbantay sa ka fag fulan. 18Ay gina glinggat sa ka fag fulan nu kanus gina kalabe, ka fag ngay taw guro te, ‘We tibak fulan takamadaragang anya!’ 19Ay ka fag ngay taw nagalumut at madafug fag daga ay nafatsa at alfuyu. Ay ka fag ngay taw nafanguywayan, ay nafanguroan, ay nafangabaluwan. Ay glong te, ‘Mafanyu dawdaw nu kalag at kin-gurungan sa ka fag fulan at madaragang, tagfabalan at tagbilug ngay balutu! Sik kadugayun way sirut inrasras wan!’

20“Nu katanya, useganani sa at kin-gurungan sa ka fag fulan, am tagsis banwa, ay am, Diyus at ngay taw, ay am, Diyus at ngay nasugu, ay anggan am, Diyus at ngay taglong, anway Diyus nafauri wan ebi at nafauri ayu.”

21Ay rodi sik madaragang fag tagfabarita naurug sik batu tagbvt dawdaw ay naukas sasad dagat. Ay nalong te, “Katanya yangay ban ka fag fulan Babilunya at madaragang, nu e rumarasras ban, ay wa ban e lumag anya faggugat. 22Ay di ban kadungug sanya fag fulan ngay tagfaawang nu gfaawang at ngay famaawangan. Ay di ban kalag takawat nus nge wain fag fangawatun. Ay di ban kadungug nu e glubuk. 23Ay wa ban kalag salung nu gdamlag. Ay wa ban kadungug sik bagu ndaduwa nu gsulitanan. Katanya wayay, anway am ngay tagfabili gfalabi sat amatanganan, ay igfanluk fagayu taw sas fagayu talun siginan at fagmabaraun.”

24Ay kalag sanya fag fulan Diyus at ngay taglong ay at ngay taw at taguk, ay anggan fagayu at nafate ebi sas fagdaul daga at taguk.

Currently Selected:

At Nafasure 18: TAWEAST

Highlight

Copy

Compare