At Nafasure 17

Sik Mangena Tagfabili at Bilug

1Ay at sadi ka fag fituk tagfabarita at ke fituk taya nkakbang sa angku ay nalong te, “Istei, nanfalag aw sa emu at fanfauri ban sanya fag takadungug fag mangena tagfabili at bilug, at malunggung sa sangay fakagamutan safa. 2At ngay fun sas fagdaul daga kamayun sanya fag mangena, ay anggan ngay taw sas fagdaul daga kata nranug sa ka fag mangena at foyungan at yud e fanambagun.”

3Ay ka fag tagfabarita nataban angku sa sik talun at yud e taw, gina at Masine fag Falad igfaamatanganan angku. Ay sanya nalag aw sik mangena gsakay sa sik mangimut tagfangagat maraska. Ka fag mangimut e fituk alfuyu ay safuluk sunge, ay at ngaba bilug marirukan sik ngay ngayan mauri sas Diyus baliwa. 4Ay ka fag mangena at balukas maubian ay maraska. Ay ngayu at famasinean, at tiba gintu, ay at tiba mafanud fag ngay batu. Ay gbitbitan sik taya at fangawat gintu. Ka fag taya mapnu at fagmafuratun sat nafabilian at bilug. 5Ay sanya fag mangena angas marirukan sik ngayan at masuksukan at masuwad. Katatuy at marirukan, “Fulan Babilunya at madaragang. Kanya wan at tina fagayu mangena tagfabili at bilug ay at fagsigadan fagayu fagmafuratun sas fagdaul daga.” 6Ay nalag aw ka fag mangena nu karanug sat nainuman Diyus at ngay taw at taguk, at masuwad te, ngay taw tagfaning Isus.

Ay kaduge aw glinggat sa ka fag mangena, gadulawan aw dawdaw. 7Ay ka fag tagfabarita nalong angku te, “Taw ro am fagadulawanun? Nanfoyung akyay sa emu at masuwad sa baliwa ka fag mangena. Ay anggan sat fagsakayan fag mangimut at ke fituk alfuyu ay ke safuluk sunge. 8Aro am nalag fag mangimut ebi gleleg yay, ay katsi nkate wan. Ay bandi ban, kanya umsure yay fiya siginan ka fag tabyu at yud e bangsi. Ay e fadasug ban anya sas tagbiya fag faurianan. Ay ngay taw sas fagdaul daga, kayu at yud marirukan at ngayan sis fafil at ngayan te, Kayu Tagleleg Faggugat, kanya ban lumag ka fag mangimut. Siginan ngay ebi yud e fagdaul daga, ka fag ngay taw at ngayan wa batang marirukan sanya fag fafil. Ay ka fag ngay taw nu lumag ban ka fag mangimut gadulawan dawdaw, teway ebi gleleg yay ay nkate wan, ay inleleg yay fiya.

9“Mamatanganani tuwa ay asafuli sa ku longan at masuwad. Ka fag fituk alfuyu at masuwad, fituk bugsul, ka fag mangena at faglunggungan. Ay at sadi yay at masuwad, fituk fun. 10At lima sanya fag ngay fun inkate wan. Ay at sadi gleleg yay. Ay at sadi tagadasugun yay ban. Ay dewa ban umdasug, wa glugo nu gmagurang. 11Ay ka fag mangimut at tagleleg ebi ay katsi matean, kanya at fawalu wak fun. Ay ka fag fun kataip yay sa ka fag fituk fun, anway at fakadasugan sa yangay ban tagbiya fag faurianan.

12“Ay am nalag fag safuluk sunge, at masuwad te, safuluk fun at yud yay gmagurang. Ay dewa katanya, sik lungud ban sirut, ka fag safuluk fun nanmagurang ban gfasfuwan ka fag mangimut. 13Ka fag safuluk fun gdiyuganan at amatanganan. Ay kanya mon ban sa ka fag mangimut at fagmadaragangun. 14Ay ka fag mangimut ay anggan ka fag safuluk fun nanfabarangyan ban sas Tupa. Ay Tupa at mabo, teway kanya at tiba tungud fag Fun at madaragang. Ay at ngay tagufud sas Tupa, Diyus at nafili fag ngay taw, at matuyan sa anya.”

15Ay ka fag tagfabarita nalong yangay sa angku te, “Am nalag fag fakagamutan safa ka fag mangena at fagmalunggungan, kanya wa fag ngay fulan taw sas fagdaul daga tagsadsamanan at ngay fanlong. 16Ay am nalag fag safuluk sunge ay at mangimut tagfangagat umlimata ban sa ka fag mangena. Ay kanya mul ban nus nge wain ka fag mangena at nanuranan, ay anggan at balukas, laman malanu way. Ay kanya umon ban ka fag mangena at faknul, ay matas wan at sawad. 17Katanya wa ban fiya, anway Diyus wan tagfaamatanganan sa ka fag ngay sunge, laman maning Diyus at fasadan te, umsadi at amatanganan. Ay ka fag ngay sunge mon yay ban at fagmadaragangun sa ka fag mangimut laman mafamagurang yay ban anggan umgurungan Diyus at ngay fanlongan.

18“Am nalag fag mangena at masuwad te, sik fulan daul at madaragang tagmagurang sa sangay fun sis fagdaul daga.”

Currently Selected:

At Nafasure 17: TAWEAST

Highlight

Copy

Compare