At Nafasure 16

Fituk Taya at Mapnu Diyus at Fandotaman

1Ay rodi, nadungug aw sik tagbiya fag longan siginans Diyus bale, glong sanya fag fituk tagfabarita te, “Loi wan, ay busbusi sas fagdaul daga ka fag fituk taya at mapnu Diyus at fandotaman.”

2Ay at fasadik tagfabarita nalo wan. Ay nabusbus at suwadan sit ba taya sas fagdaul daga. Ay fagayu taw, at ke rirukan aro fag mangimut tagfangagat at ngayan ay at tagseg sa ka fag tawtawan, inke famaga at mason dawdaw nu ganini.

3Ay at faduwak tagfabarita nabusbus at suwadan sit ba taya sasad dagat. Ay rodi dagat inraska wan, kata sik kinkate at taguk. Ay fagayu tagleleg sad dagat inkate wan.

4Ay at fatuluk tagfabarita nabusbus at suwadan sit ba taya sa sangay safa ay sa sangay bukbuwan safa. Ay fagayu inraska yangay kata sik taguk. 5Ay nadungug aw sik tagfabarita, at tagmagurang sas mamam baliwa, nu glong te, “O wan at matuyan, ay o wan ebi fag Diyus, ay anggan katsi fag Diyus. Malayun tuwo sat masine ay matuyan nu gfauri sa sangay taw. 6Ebi ka fag ngay taw nafate am ngay taw ay am ngay taglong. Ay fainum ban o at taguk sanya fag ngay taw takamate. Katanya at fanfauri ban sanya fag ngay taw.” 7Ay nadungug aw tagbiya fag longan siginans fagyagoan te, “Kin tuwa, em Fun em Diyus, at Tiba Tungud at Madaragang. Mafanud ay kasakan am nafasure am fanfauri.”

8Ay at faufat tagfabarita nabusbus at suwadan si at ba taya sas menit. Ay menit inkugat nu masugba, ay nafasugba ngay taw katvngvd sik afuy. 9Ay ka fag ngay taw kasugba dawdaw anway inkugat yay nu masugba, ay wa nafauseganan sas Diyus, fangkabat di ro, nalong way mauri sas ke fagmadaragangun, at tagfasure ka fag fanfauri, ay wa naubun at ugali at mauri.

10Ay at falimak tagfabarita nabusbus at suwadan si at ba taya sas mangimut tagfangagat at faglunggungan. Ay rodi inkarum wan sa ka fag mangimut at fagmagurangan. Ay at ngay taw kagat at dila, anway at katvngvdan nu kasait at bilug. 11Ay ka fag ngay taw nalong yay mauri tagsas banwa fag Diyus baliwa, anway at katvngvdan nu kasait at famaga si at bilug. Ay dewa katanya, wa gfabali at fagbulun at mauri.

12Ay at faunumk tagfabarita nabusbus at suwadan si at ba taya sas tagbiya fag safa Iyupratis. Ay rodi ka fag safa Iyupratis inlanggang wan, laman nanfamasadan ka fag ngay fun siginans fakamenitan at dalan. 13Ay rodi, nalag aw tuluk mafurat fag falad kata sik fiyo. Kanya nalfas siginans yaw daul at bibig, ay siginans mangimut tagfangagat at bibig, ay anggan siginans taglong at yud matuyan at bibig. 14Ay ka fag tuluk mafurat fag falad gfagbulun ngay madulawan. Ay nananlag sa sangay fun sas fagdaul daga laman nanfaful ay nanfabarangyan sas Diyus, at Tiba Tungud at Madaragang. Nu gfabarangyan gina ban Diyus nu gfauri at ngay tagfagbulun at mauri. 15-16Ay ka fag tuluk mafurat fag falad nafaful ka fag ngay fun sa sik talun, sis Fangebriyu nu gngayan, Armagidun.

Ay tam Fun Isus nalong te, “Amatangani. Umdasug ban aw kata sik takamul nu kadasug. Sik taw guseganan tuwa ginanya nu gdi gtiyug ay kamasadan tuwa at balukas, laman gina aw kadasug, kanya di malanu gina glo ay di kapla tiba.”

17At fafituk tagfabarita nabusbus at suwadan si at ba taya sas kiwang. Ay rodi gbiya nu e gelongan siginans Diyus bale, sit faglunggungan te, “Intabu wan.” 18Ay rodi nafangkilat, ay natalafun, ay nafangawangan wayu daw. Ay anggan nauwigan dawdaw tam daga. Tam daga ya batang nauwigan takatvngvd anya siginan ngay ebi ebi yud e taw sas fagdaul daga. 19Ay ka fag fulan at madaragang at ngayan Babilunya nkafud sas tuluk afud. Ay ngay fulan sas tibak talun sigon inrasras wan. Ay Diyus wa nalyam ka fag fulan Babilunya at fagfonan sik taya at maranug fag safa. At masuwad te, Diyus at fandotaman dawdaw. 20Ay fagayu furu infalyu wan. Ay anggan fagayu bugsul wa kalag. 21Ay sik ngay moyan yelu siginans kiwang intong sa sangay taw. Ay sik moyan yelu kamabiyat sik kaban bigas. Ay ngay taw nalong mauri sas Diyus baliwa anway sa ka fag moyan yelu malimu dawdaw.

Currently Selected:

At Nafasure 16: TAWEAST

Highlight

Copy

Compare