At Nafasure 15

Fituk Tagfabarita e Uba Fituk Fanfauri

1Ay rodi nalag akyangay fiya sadi yak madulawan dawdaw sis banwa, fituk tagfabarita e uba fituk fanfauri. Ay ka fag fituk fanfauri at fakatabuwan wa Diyus at fandotaman.

2Ay nalag akyangay kata sik dagat maliyo gsagbatan afuy. Ay ebi at ngay nababo sa ka fag mangimut tagfangagat ay anggan sat tawtawan malindug sanya, ay e bitbitan ngay famaawangan Diyus at nafon sa anya fagayu. Kanya at ngay nababo we rirukan ka fag mangimut at ngayan at kayuwan. 3Ay kanya fagayu gdanyu, Diyus at fanuguwan Muisis at danyu, ay anggan Tupa at danyu. Katatuy at danyu,

“Em Fun em Diyus, at Tiba Tungud at Madaragang.

Am ngay fagbulun

madaragang ay madulawan.

Ay am ngay ugali

matuyan ay mafanud.

Ay o wan fagayu taw at Fun.

4Em Fun, fagayu taw kalimu emu.

Ay fagayu taw igseg emu te,

‘O at tiba tungud at madaragang.’

O way fagsadi at malayun sat masine.

Fagayu talun at ngay taw umkakbang ban sa emu ay sumeg ban,

teway nalag am nafagbulun at masine.”

5Ay rodi nalag aw Diyus bale tagsis banwa nu kaluwang. Sanya sad basad at Fagsuwadan Fatuyanan. 6Ay nalag aw ka fag fituk tagfabarita at ke uba fituk fanfauri nu nalaklo sanya ginan. Ay gbalukasan sik namasine ay masulo fag balukas, ay e madafutan gintu sit dubdub. 7Ay aro fag ufat tagleleg at sadi nafon sa ka fag fituk tagfabarita fituk taya gintu. Sanya fag taya mapnu Diyus at tagleleg faggugat at fandotaman. 8Ay Diyus at fagmasineun ay at fagmadaragangun inkapnu sit bale. Ay we masakbo sanya yap ngay namin ka fag fituk tagfabarita at nauba fag fanfauri.

Currently Selected:

At Nafasure 15: TAWEAST

Highlight

Copy

Compare