At Nafasure 14

At Kinlangfe fag ngay Taw at Danyu

1Ay rodi manlag akdi, Tupa malindug sis Muyud Siyun. Ay at ufud sanya 144,000k taw at ke rirukan Tupa at ngayan ay anggan at Tama at ngayan si at angas. 2Ay nadungug aw nu e gelongan dawdaw siginans banwa, kadaw sik safa nu gfawas gbararusan, ay kata yangay sik talafun nu gfangalung dawdaw. Ay ku nadungug fag elongan kata sik ngay famaawangan nu gawang. 3Ay ka fag 144,000k taw gdanyu sik danyu bagu sa taglabi nu masine fag faglunggungan at akbang, ay sa ka fag ufat tagleleg at akbang, ay anggan sa ka fag 24k tagmagurang at akbang. Ay we taw nasaful ka fag danyu at masuwad, dasday ka fag 144,000k taw at kinlangfe siginans fagdaul daga. 4Kayunya at yud batang sa sik mangena ay we batang e mangena. Ay kanya galo tuwa sas Tupa nus nganday nu glo. Ay kayunya at kinlangfe siginan at ngay taw, kata sik taguna fag anyun at nafon sas Diyus ay sas Tupa. 5Ay kayunya di batang kamuwagan, ay at ngay ugali malayun tuwa sat masine.

Tuluk Tagfabarita

6Ay rodi, nalag kyangay sadi yak tagfabarita nu glayug sis kiwang. Kanya gubanan at Masine fag Barita at yud e fakatabuwan ay gfoyung sas fagayu fulan taw sas fagdaul daga tagsadsamanan at ngay fanlong. 7Ay ka fag tagfabarita gbiya nu gelongan te, “Alimui tuwa Diyus ay segi anya, teway indasug wan at lungud Diyus nu nantap fagayu taw at asalanan. Segi at naawat banwa, ay daga, ay dagat, ay fagayu bulbug.”

8Ay sadi yak tagfabarita at naguyan aro taguna, ay kanya glong te, “Inrasras wan! Inrasras wan at madaragang fag fulan Babilunya, kanya at nafadasug sas fagayu talun Diyus at fandotaman, kata nu nafainum sik fangaranug fag safa, anway sa at nafamayunan.”

9Ay sadi yak tagfabarita, at naguyan at duwa, ay gbiya nu gelongan te, “Nus nga sinu tagseg sas mangimut tagfangagat, ay anggan sat tawtawan, ay anggan nafariruk ka fag mangimut at ngayan sit angas ay ate sit daluwap, 10ka fag taw minum ban ka fag safa fangaranug, at masuwad te, Diyus at fandotaman. Ay ka fag safa fangaranug we fasagbatan gina gbusbus sas Diyus at taya at fandotaman. Ay faurianan wa fiya sas afuy ay asupri sas Diyus at ngay tagfabarita at akbang, ay sas Tupa at akbang. 11Ay ka fag faurianan at anus nu kaabat faggugat wa ban. Ay kanya fag ngay taw tagseg sa ka fag mangimut ay anggan sat tawtawan, ay anggan at ke rirukan ka fag mangimut at ngayan si at angas ay ate si at daluwap, we lungud ban gfafiyan at lufuy, dewa mamenit ay mayabi.”

12Nu katanya, fagayu Diyus at taw, at tagfaning Diyus at longan, ay tagafanud sas Isus, sungatani tuwa.

13Ay rodi nadungug aw nu e gelongan siginans banwa te, “Riruki katatuy te: Siginan katsi, guseganan wan at kinkate, ebi nu masadi tuwa sa tam Fun.” Ay at Masine fag Falad nalong te, “Kin,” guseganan tuwa. Kanya gfafiyan ban at lufuy sa at nafagbulunan, ay gfon ban sik famanyun sat nafagbulun masine.

Sik Fafaskudanan sa sik Karit Maruk

14Ay rodi nalag aw sik linyabu malagsi. Ay at malunggung sanya kata sik taw, ay e sangbo gintu, ay e bitbitan sik karit maruk. 15Ay sadi yak tagfabarita at nalaklo siginans Diyus bale sis banwa. Ay guro dawdaw sa at malunggung sis linyabu te, “Gafasi wan ay buli at buwadan, inlesan wan at ngay buwadan ay indasug wan at fanganiun fag menit sas daga.” 16Ay at malunggung sis linyabu gani wan fagayu at malesan sa sangaba daga.

17Ay e sadi ya fiyak tagfabarita at nalaklo siginans Diyus bale sis banwa. Ay kanya gbitbitan yangay sik karit maruk. 18Ay e sadi ya fiyak tagfabarita at nalaklo siginans fagyagoan. Kanya at tagmagurang sas afuy baliwa, ay gbiya dawdaw nu guro sa at ke bitbitan karit maruk te, “Kariti wan ay fafuli wat ubas buwadan sas wa daga, anway malesan wan!” 19Nu katanya, kanya nabul wan ka fag ngay wat ubas buwadan, ay nafaful sas Diyus at fagturisan ubas. At masuwad ka fag fagturisan, Diyus at faurianan. 20Ay e naturis ka fag ngay buwadan ubas sas fagturisan sas day fulan. Ay sik taguk dawdaw kalimus siginan fagturisan, at kabasadan sik dufa, ay at kayayuwan 150,000k dufa.

Currently Selected:

At Nafasure 14: TAWEAST

Highlight

Copy

Compare