At Nafasure 13

Sik Mangimut Tagfangagat

1Ay rodi, nalag aw sik mangimut tagfangagat nu kasure siginan sad dagat. Fitu at alfuyu ay safulu at sunge. Ay fagayu sunge e sangbo, kata sik fun at sangbo. Ay at marirukan sit ngay alfuyu, sik ngayan tagfalingun sas Diyus baliwa. 2Ay ka fag mangimut at bilug kata sik balan liupardu. Ay at ngay darafa kadaw sik balan usu#13:2 usu: kata sik idu daul. darafa. Ay at bibig kadaw sik liyun bibig. At yaw daul nafon at fagmadaragangun sa ka fag mangimut ay anggan at faglunggungan, laman madaragang nu gmagurang. 3Ay ka fag mangimut at alfuyu at sadi e fakarukan arvs gakateun wan, ay roro nfiya wan. Ay fagayu taw sas fagdaul daga nadulawan dawdaw ay nafaning sa ka fag mangimut, 4ay anggan naseg sa ka fag yaw daul, anway kanya tagfon at fagmadaragangun sanya fag mangimut. Ay naseg yangay sa ka fag mangimut te, “We katvngvd ka fag mangimut! Ay we gbabo anya!”

5Ay e nafanusetaw yay sa ka fag mangimut laman gfalabi at longan sas Diyus baliwa, ay laman gmagurang ban 42k magdanun. 6Ay ka fag mangimut igfasigad wa glong mauri sas Diyus baliwa, ay sas Diyus at ngayan, ay sas Diyus at fagbanwanan, ay anggan sas fagayu tagbanwan sas banwa baliwa. 7Ay e nafanusetaw yangay ka fag mangimut laman igfabarangyan ay mabo Diyus at ngay taw. Ay e nafon yangay anya fagmadaragangun gmagurang sas fagayu fulan taw sas fagdaul daga tagsadsamanan at ngay fanlong. 8Ay fagayu taw sas fagdaul daga at yud marirukan at ngayan sis fafil at ngayan te, Kayu Tagleleg Faggugat, sumeg ban sa ka fag mangimut. Siginan ngay ebi yud e fagdaul daga, ka fag ngay taw at ngayan wa marirukan sanya fag fafil, at tagbilug Tupa ebi at nafate.

9Nu e talinga tuwam, dungugani tuwa. 10Nus nga sinu at nafatuyanan te, umsungsung, umsungsung wa fiya. Ay nus nga sinu at nafatuyanan te, umkate sa sik fiso, umkate wa fiya sa sik fiso. Nu katanya, fagayu Diyus at ngay taw sungatani ay fatvngvdi ay fagafanudun.

11Ay rodi, nalag akyangay sadi ya fiyak mangimut tagfangagat siginan sad daga. Kanya kata sik tupa e sunge duwa. Ay kanya gelongan tuwa kata fiya fiya ka fag yaw daul. 12Ay kanya nafaning taguna fag mangimut at fagmadaragangun laman gfaning anya. Ay gfabulun sas fagayu taw sas fagdaul daga te, segi sa taguna fag mangimut, at kinke fakarukan arvs gakateun wan, ay roro nfiya wan. 13Ay ka fag faduwak mangimut gfasure sik ngay madulawan fag fagbulun, tenday nu gfasure sik afuy ste swa daga siginans banwa, laman taw lumag at fagmadaragangun. 14Teway taguna fag mangimut nafafagbulun sa anya sik ngay madulawan fag fagbulun, kanya nafanluk ngay taw sas fagdaul daga. Ay nasugu te, awati sik tawtawan, fafaningani at taguna fag mangimut, at nabasingan fiso, ay dewa katanya nleleg yay. 15Ay e nafanusetaw yangay sa at faduwak mangimut, laman gfon engasan sa ka fag tawtawan, laman ro ka fag tawtawan gelongan tuwa, ay mafasugu tuwa te, “Fatei at yud gseg angku.” 16Ay at faduwak mangimut gfabulun ban fagayu taw nu gfe fagtoglagan si at siyun fag daluwap ay ate si at angas, dewa sa sik taw takadungug ay at yud kadungug, ay dewa sa sik mabalan fag taw, ay sat yud mabalan, ay dewa yud sik fanuguwan, ay sa sik fanuguwan. 17Sik taw wa mafasali ay wa mafafesali nu dway e fagtoglagan ka fag mangimut taguna at ngayan ay ate at numiru.

18Ay katanya wayay, mamatanganani tuwa. Ay nus nga sinu at mamatanganan, asafuli tuwa ka fag mangimut taguna at ngayan ay at numiru, anway kanya sik fagtoglagan sik taw at ngayan. At numiru, 666.

Currently Selected:

At Nafasure 13: TAWEAST

Highlight

Copy

Compare