Udas 1

1Tuy fag rirukan siginan angku, Udas. Aw, tam Fun Isus at fanuguwan at sadi. Santiagu ku fadugsay. Tam Diyus tam Tama at nafili ayu laman si anya. Am, tam Fun Isus at fakesugun ay fagdingdingun fag ngay taw.

2Tam Diyus taglabi tagfangafanyu ayu ay tagfanabayan ayu. Katanyai!

Matagakani at Yud Matuyan fag ngay Takamoyung

3Ku fakafanyuun ku ngay fadugsay, satu kaumsig kwa dawdaw gananrirukun sa ayu sa baliwa tam tagfalangfe, ay roro gamatanganan aw te, nanriruk akyay ngap sa baliwa tagfatvngvd tam fagafanudun laman matagakan tuwa tam sat yud matuyan fag ngay foyungan, laman di ban e faduwanun sa tam fagafanudun. Ka fag ngay foyungan Diyus nafon sa tagfaning anya fag ngay taw, ay wa masine gfabali. 4Griruk aw sa ayu anway tibak taw at yud gfaning Diyus, dewa maful ayu kata ay fadugsay, at amatanganan masuksukan way. Madyay nu gfoyung gfasaman way sa baliwas Diyus nu kafanyu. Madyay wa kalimu Diyus, ay manga gfaning yay sat bilug at fagalabianun at mauri. Ay anggan sigon gafayudun way te, tam Fun Isus bunwa at tiba tungud fag Fun. Siginans fagsigadan marirukan wan sis Diyus at longan te, sa ban takatanya fag ngay taw e faurianan wa ban fiya sa anya.

5Katsi gdog kyangay fiya nanfaamatang ayu, dewa ebi e nafasaful ayu tuy fag foyungan. Ebi ebi dewa tam Fun Diyus at nafalfas at ngay taw siginans talun Iptu, bandi kanya yay at nafate fagayu at yud gafanud at nafalfas sanya ginan fag talun. 6Ay amatangani te, at ngay tagfabarita ebi at yud gfagbulun Diyus at nafon anya fag fagbulun, ay at naubun at fagbanwanan, Diyus nasiyuk wa anya ay nasungsung wa sat ngabasad ay sat marum fag tabyu, yap ngay umdasug at menit te, umfaurianan ban. 7Ay katanya yangay sas fulan Suduma ay sas fulan Gumura, ay anggan sat tagsafungan fag ngay fulan. Kanya fag ngay taw tagfaning at bilug at fagalabianun ay at mauri. Nu katanya, fagayu tagsanya nlabe wa sasad afuy daul at yud e fakatabuwan. Kayunya sik famatagak sas fagayu taw.

8Katanya yangay sa baliwa ku nalong fag ngay taw at maful sa ayu at masuksukan at amatanganan. Kanya gtaginfanan laman nanfaning at bilug at fagalabianun at mauri. Ay kanya kamabo sas Diyus, ay anggan gfalingun yangay Diyus at madaragang fag ngay awatan sis banwa. 9Mikael, at ngay tagfabarita at fun. Ay dewa kanya wa nafagbulun takatanya. Gina gfaringangan Satanas sa baliwas Muisis at bilug, kanya di naamatangan gfalingun Satanas. At longan glong way te, “Fun Diyus at maya emu!” 10Ay roro, ka fag ngay taw tagfalingun nus nge wain at yud nasaful at fagalongunun. Kanya kata way sik ngay mela at yud e amatanganan sa tiba, ay gfaning way mandi at fakaumsigun. Ay at fakaumsigun wan at tumaban ka fag ngay taw sas faurianan. 11E nanfauri wa ban fiya anya, anway nafaning Kain ugali. Ay anggan nafaning Balaam fagbulun tagalabian singku. Ay ka fag ngay taw kamabo yangay kata Kura, nu katanya, umkate yangay ban kata anya. 12Ay manga ka fag ngay taw at ugali mapla way dawdaw gina am maful ayuwayu gfangon. Ka fag ngay taw we fagamatanganun bunway at balyu. Ka fag ngay taw kata way at yud e moyan fag linyabu, ay kata yangay sik kayu at mafulidan ay anggan at lalid nagulad wan, anway dewa ndasug fanbuwadanun fag lungud wa gbuwadan. 13Ay ka fag ngay taw kata yangay dagat nu glafas gina glumbak ayu daw, ay at ugali at mapla kata ka fag lafas nu kalag. Ay kanya kata yangay sik galeme takalyam. Ay Diyus nafamasadan sik ngabasad ay sik marum fag lusung sa anya ay sanya way gugat.

14Sik taw at ngayan, Inuk. Kanya fafituk sugfun siginans Adan. Ebi kanya at naguna nafoyung te, “Dungugani, tam Fun umdasug ban gfasfuwan sik ngay tagfabarita ayuwayu, 15laman nantap fagayu taw at asalanan, ay anggan nanfauri fagayu taw at yud gfaning sas Diyus. Anway ka fag ngay tagasalanan ngayu at mauri fag fagbulun gina dawdaw kamabo Diyus. Ay anggan ngayu at mauri fag longan sas Diyus baliwa.”

16Ay ka fag ngay taw faggugat gfalingun way at tiba, ay gfayud. Ay kanya faggugat gfaning way at bilug at fagalabianun. Ay anggan igfalabi at longan sat usama. Ay anggan gfaumsiganan at tiba dewa gfanlamangan at longan, laman gamatangan te, kanya tuwa at ke fanambagun.

Udas at Longan ay at Famatvngvd sa Tagtap

17Ay am, ku fakesugun ku ngay taw, amatangani tuwa tam Fun Isus at ngay nasugu fag ngay taw at foyungan ebi taguna. 18At longan sa ayu te, “Sa bans fakatabuwan fag ngay menit, umdasug ban sik ngay tagfalingun. Ay kanya gfaning way nus nga setaw at bilug fakaumsigun at mauri.” 19Kanya fag ngay taw at nanfasadsamanan at ngay tagafanud, ay tagfaning ste swa daga at fakaumsigun. Ay yud si anya at Masine fag Falad. 20Ay am, ku fakesugun ku ngay taw, fatvngvdi tuwa ay fagafanudun at mafanud. Ay gina am gdarangin, faningi at Masine fag Falad. 21Ay faggugat sii tuwa Diyus at fakafanyuun. Ay fanyai tam Fun Isus, at fon ban ayu leleg at yud katabu. 22Ay tarabangi tuwa tibak tagafanud at yud matvngvd at amatanganan. 23Ay balabagi ay iba kata nu gbul am tagakalabeun sad afuy. Ay afanyui tuwa dewa at mauri dawdaw fag ngay taw ay roro matagakani tuwa sat mauri fag ngay fagbulun. Ay alimatai ka fag taw at mafurat at balukas anway sat fagmafuratun.

Sik Fanseg fag Danyu

24Tam Diyus mafadingding ayu laman di am gasalanan. Ay kanya yangay at mafafalayun ayu sat masine laman tumaban ayu sat daga salubangan guseganan dawdaw. 25Kin. Gseg watam sa tam Diyus tam Tagfalangfe, anway sa tam Fun Isus. Kanya at madaragang, takadungug, at ke fagmasineun, ay tagmagurang fagayu nus nge wain, ay ke fagmadaragangun siginan ngay yud e daga, ay anggan katsi, ay faggugat ban.

Kin, katanyai tuwa.

Currently Selected:

Udas 1: TAWEAST

Highlight

Copy

Compare