Filipus 4

1Ku ngay fagwes, kamasine tuwa anya tam fagfanyaun siginan tam Fun. Nu katanya, matvngvdi tuwa gugat nu gafanud tam sa anya.

Ku ngay fadugsay, kesug aktuwa dawdaw ayu, ay gyalagun kyangay ayu, ay guseganan aktuwa dawdaw ayu. Guseganan aw te, inke fanambagun tuwa ebi ku nafoyungan ayu.

Masinei tuwa nu Gfaygaluwan Tam Tam Iba

2E fagalongun kyay sa tam duwena, Yudya ay Sintiki, te, fasinei wan ay aringangan, teway am fagduwa, gafanud tuwam sa tam Fun. 3Ay e fagetun kyangay sa ku sama tagtarabang fiya fiya angku ebi ginan. Get aw te, tarabangi tam duwena nu gfasine at aringangan.

Teway ebi tam duwena, ku fatarabangan yangay nu gfamoyung Masine fag Barita. Ay kanya fag duwena gsungatan tuwa nu gfamoyung. Ay roro ginanya, ngayu tuwami tagtarabangan. At sadi, tam usama Klimin. Ay deyud aw nariruk at ngayan at natarabang angku, kanya fagayu e ngayan tuwa si tam Fun Isus at fafil. Ay nus nga sinu at ke ngayan sanya, e leleg tuwa at yud katabu.

4Ku ngay fadugsay, glong aw ayu te, useganani tuwa gugat si tam amatanganan, teway tam Fun watam at ngay taw. Ay glong kyay fiya ayu te, useganani wa fiya. 5Ay masinei tuwa nu gfaygaluwan am, dewas nga sinu fag taw. Ay amatangani tuwa gugat te, tam Fun kadasug wan.

Tam Diyus at Fon Antam fag ngay Amatanganan

6Lag e nafanawaan. Dewas nga setaw tam nadalan, fangkabat, foyungi tuwa sa tam Diyus tam ngay fagetun. Fandarangini, eti tarabang siginan anya, ay foyungi tam fagusegananun sa anya. 7Ay tam Diyus igfon wa fiya antam sik manabayan fag amatanganan. Teway labon gamatangan tam te, “Nu katvngvd wa long tuy tam fagdalanun katsi, wa long ro tam manabayan.” Ay roro muwag, tam Diyus mafafanabayan fiya fiya antam. Teway fakatanyaun, tam Fun Isus watam at ngay taw.

8Ku ngay fadugsay, taguyan ku fangatulun ayu, sa baliwa tam fagfasakboun sa tam amatanganan. Tam fagfasakboun, antuwa at matuyan, ay at tagtungul fag ngay amatanganan. Lagi at mapla ay anggan at ke sagbat mauri. Intoi tuwa emu mandi, te go tuy ku amatanganan sik maumsig tuwa sa ku iba, ay go di e kafayud. Fagayu at masine ay at maumsig, katanya tuwa fag ngay amatanganan tam fagfasakboun sa antam.

9Ku ngay fadugsay, faningi tuwa ku foyungan ayu. Dewa ebi ginan ku foyungan ayu, ay dewa katsi ku rirukan, faningi tuwa gugat. Ay dewa ebi ginan ay nalag ku ugali, faningi tuwa. Ay glong aw ayu te, tam Diyus wan tagufud ayu, teway kanya wan tagfanabayan antam.

Pablu Fagusegananun sas Taw Filipus at Natarabang Anya

10Ku ngay fadugsay, guseganan aw dawdaw sa ayu ay nafon angku famanyun. Igsaful aw te, ebi ginan, kafanyu wam fiya angku. Anway te, sik kadugayun, wam e nafalag ay faran laman gtarabang angku. Ay guseganan aw sa tam Fun, te, nafalag tuwam ay faran.

11-12Ay dewa aw glong katanya, kwa glong ayu te, e nayudanan kyay. Teway ngayu wan ku nadalan ebi ginan kaduge aw gfaning tam Fun Isus. Ay nu katanya katsi, dewas nga setaw ku fagdumalanun, maabanwan aktuwa. Dewa aw e fagbarisun, ay deyud aw e fagbarisun, maabanwan aktuwa. Dewa ngayu ku fagekwaun, ay deyud aw e kwa, maabanwan kyangay. Dewa aw mapsugan, ay dewa aw kalunus, katanya yangay. 13Dewas nga setaw ku fagdumalanun, maabanwan aktuwa, teway e gfatvngvd tuwa ku amatanganan.

14Dewa ngaro aw glong katanya, guseganan aw dawdaw ay nafon angku, teway natarabang tuwam angku gina aw gatakan.

15Katanya ay nafagbulun, kata tuwa ebi ginan ay fagbulun. Siginan ngay ebi ebi, gina bagu kadasug sa ayu at Masine fag Barita, igfantarabang wam. Madyay ebi gina aw glo siginan ay talun, nafon am angku sik famanyun. Ay gamatang yay ro am te, kayunya ku fagfoyungan, am yay at nafon angku famanyun ginanya.

16Ay ebi, gina aw sis fulan Tesalunika, bundi sayginan nu gtarabang am angku. 17Ay dewa katanya ku longan ayu, kwa glong ayu te, katsi tarabangi yap fiya angku. Glong kway te, tam Diyus nangus tumarabang tuwa dawdaw ayu, teway igtarabang tuwam angku.

18Ebi daw ngaro ay nafon angku fag famanyun, ngayu tuwa dawdaw. Glabi yay fiya fiya ku ngay nayudanan. Ay tam usama Ipapruditu, nafadasug wa fiya sa angku fagayu ay famanyun. Ay taguseganan kanya fag famanyun, bundi aw fagtvngvd. Anggan tuwa tam Diyus. Tam Diyus kaumsig tuwa glag kanya fag famanyun, teway kanya fag famanyun masine tuwa sa anya.

19Tam Diyus wa ban tagfon ayu ay ngay nayudanan, teway si anya ngayu tuwa dawdaw at fagmabalanun. Ay kanya wa ban tagfon ayu, teway am, tam Fun Isus tuwam at taw. 20Ay faggugat ban, itam, fauseganani tuwa gugat tam Diyus, tam Tama. Kin, fauseganani tuwa gugat anya.

At Fakatabuwan fag Longan

21Longi ngaro sa tam ngay iba, sa tam Fun Isus at ngay taw sanya si ay fulan, te deyud aw iglag ayu, gamatang aktuwa ayu. Ay anggan ngaro iste tam ngay fadugsay, deyud iglag ayu, gamatang yangay ayu. 22Ay anggan iste fag fulan taw, tam Diyus at ngay taw fagayu gamatang tuwa gugat ayu. Ay tibak taw ngaro, tam ngay fadugsay tagfagbulun sis fun daul at bale, mason nu glong te, gamatang tuwa gugat ayu.

23Ay igdarangin kyangay sa tam Fun Isus, tam Fagsegan, te, laman kanya igfalag tuwa gugat ayu at fakafanyuun. Kin, katanyai wa fiya. Ste wa kabat ku rirukan.

Currently Selected:

Filipus 4: TAWEAST

Highlight

Copy

Compare