Kulusas 1

1Tuy fag rirukan siginan emi, Pablu ay Timutiyu. Aw, tam Fun Isus at Nasugu at sadi, anway Diyus nafili angku. 2Griruk ami sa ayu, sas Diyus at ngay taw sas fulan Kulusas, sa em ngay fadugsay at matuyan tagafanud sa tam Fun Isus.

Igdarangin aw sa tam Diyus tam Tama te, famanyuni ay fanabayani ayu.

Pablu at Taguna at Longan sas Taw Kulusas

3Faggugat guseganan tuwami sa tam Diyus, tam Fun Isus at Tama, kayu ginan ami gdarangin ayu. 4Anway nadungug ami te, gafanud tuwam sa tam Fun Isus. Ay anggan kafanyu tuwam Diyus at taw fagayu. 5Katanya tuwam, teway e fagsegun ban am gbul ay fagfanyaun at mafamasadan sas banwa. Nasaful wam sa baliwa ay fagsegun, teway nadungug wam at matuyan fag longan, kanya anwa at Masine fag Barita. 6Ay at Masine fag Barita nrapyag sas fagdaul daga ay inkayu at ngay tagafanud. Katanya yangay si ayu, siginan ay nadungug ay ay nasaful sa baliwas Diyus at famanyun. 7Epafras at nafoyung takatanya sa ayu. Kanya kata yangay emi tagfagbulun Diyus at fagbulun ay em fakesugun fag fadugsay, ay tam Fun Isus at fanuguwan at matuyan. Ay kanya wan tagungbus emi tagsibo ayu. 8Ay kanya tagfoyung sa emi sa baliwa ay fakafanyuun anway at Masine fag Falad nafaamatanganan ayu.

9Siginan ami nadungug katanya, di ami kalyam nu gdarangin ami ayu. Matvngvd nu get ami sas Diyus te, at Masine fag Falad gfon ayu ay fagsafulun ay ay fantogdungug laman sumaful ban am fiya fiya at fakaumsigun. 10Fakatanyaun em darangin, laman ay ugali masine tuwa ay maumsig sa tam Fun, ay laman gfauseganan tuwam anya. Ay mafafagbulun tuwam gugat at masine, ay kafamut tuwa ay fagsafulun sa tam Diyus baliwa. 11Ay gdarangin yangay ami te, fatvngvdi ayu siginan at tiba tungud fag fagmadaragangun, laman guseganan tuwam ay mabaris ay maafanya nus nge wain. 12Ay faggugat fauseganani tuwa tam Tama, anway kanya tagfasine ayu laman sak am mafafabul at fagafonun. Kanya at fagnanfonan ban sas Diyus at ngay taw tagsasad mayamag. 13Anway tam Diyus nafalfas wa antam siginans marum at fagmadaragangun. Ay nafalin wa antam sa at fakesugun at Baguwama at fagmagurangan taw. 14At Baguwama wan at nafalfas antam ay at nafalyam tam ngay asalanan.

Diyus at Baguwama at Ugali

15Tam Fun Isus kata yay fiya fiya Diyus tam fagyudun glag. Ay kanya at tiba tungud sas fagayu at ngay naawat. 16Ay at Baguwama at naawat fagayu nus nge wain, dewa tagsis banwa ay dewa ste swa daga, ay dewa tam fagnalagun ay dewa tam fagyudun glag, ay dewa at ngay tagmagurang. Fagayu kanya naawat laman at Baguwama e fanambagun tuwa. 17Siginan ngay ebi at Baguwama tuwa taguna fagayu nus nge wain. Ay kanya nafatvngvdun fagayu nus nge wain laman ban masine tuwa. 18Ay kanya at ngay tagafanud at alfuyu, ay at ngay tagafanud kata at bilug. Ay kanya yangay at nafasigad at ngay tagafanud at faginsadiun. Ay kanya yangay taguna at kindog gleleg siginan at fagmateanan, laman kanya lumabi fagayu nus nge wain. 19Anway Diyus kaumsig te, laman at ugali fagayu si yangay at Baguwama. 20Ay at Baguwama at fagbulun nanfasadi fagayu nus nge wain sas Diyus. Ay Diyus nafanabayan fagayu, dewa ste swa daga ay dewa sas banwa, anway at Baguwama at taguk inbusbus sas salibagan kayu.

21Ay ebi ngayayu yay am Diyus, ay at fabarangyan way am, anway sa ay fagbulun ay ay amatanganan at mauri. 22Ay katsi at Baguwama nafasadi tuwa ayu sas Diyus anway at naatean, laman nanfakbang ayu sas Diyus malayun sat masine, ay matuyan, ay di e kalag mauri si ayu. 23Dewa katanya, fatvngvdi tuwa gugat nu gafanud am, ay lag gfabayan nu malyam ay nadungug fag fagsegun siginan at Masine fag Barita. Ebi e nafoyung wan at Masine fag Barita sas fagayu taw ste swa daga. Ay aw, Pablu, at sadi at takamoyung.

Pablu Kamoyung sa sangay Tagafanud

24Katsi guseganan aw sa ku nadalan fag ngay mataka laman e fanambagun tuwam. Nu e gfauri sa ku bilug, gtarabang aw nanfatabu tam Fun Isus at ngay fagatakanun laman at bilug, at masuwad, at ngay tagafanud, e fanambagun tuwa. 25Ay aw wan at sadi at ngay tagafanud at takamoyung, anway Diyus nafili wa angku laman e fanambagun am, ay laman moyung aw fagdaul Diyus at longan. 26Ay siginan ngay ebi fag ngay taw kanya fag longan masuksukan yay. Ay katsi nsure wan, ay nafoyung wa sa sangay tagafanud. 27Ay Diyus kaumsig nanfasaful sa at ngay taw te, matvngvd dawdaw tuy fag masuksukan at fagmasineun sa at yud Udyu fag taw, anway ka fag masuksukan at masuwad te, tam Fun Isus si wa ayu. Igfanya wa long am te, umdasug wam fiya sas Diyus at fagmasineun.

28Em fagnafoyungun sa sangay taw, tam Fun Isus. Ay em fagnafatagakun sas fagayu taw. Ay anggan em fagmamatangananun nu gfoyung ami, laman fagayu taw faakbang ami sas Diyus ay sik mabul tungud ban fag taw sa tam Fun Isus. 29Ay nu katanya, nu gfagbulun aw, nasungatan aktuwa katvngvd ku fagmabitsugun, anway tam Fun Isus at fagmadaragangun si wa angku.

Currently Selected:

Kulusas 1: TAWEAST

Highlight

Copy

Compare