Filipus 3

Bundi Tam Nafagbulun Tagfalangfe Antam. Antuwa Tam Fun Isus.

1-2Ku ngay fadugsay, useganani dawdaw, teway itam wan tam Fun at ngay taw. Ay roro tibak taw igfoyung way te, “Nu dyay am nafatuli, bunwa am Diyus at taw.” Ay roro katanya fag elongan we fanambagun. Taw ro manga fakaumsigun dawdaw gananbasingun tiba, ay wa ngap e fanambagun?

Ebi ginan, glong kwa ayu, te tagaki tuwa kanya fag ngay taw. Lag galukan at foyungan. Ay katsi glong kyay fiya ayu te lag galukan. Dakdi gananadan nu glong aw ayu katanya, laman di am kataban sanya fag ngay taw at foyungan.

Ay kanya fag ngay taw, igfalingun way at yud faning taw Udyu at ugali. Glong way te, “Si ayu ay ugali, mafurat way.” Ay roro, taglong way katanya at ke ugali mafurat. Katvngvdan nu mafurat at ugali, kata wa sik idu talun tagfangagat. Igfalimatan dawdaw tibak taw, ay igfagbulun way at mauri.

3Lag dungugan at foyungan, teway itam wan tam Diyus at ngay taw. Ay Masine fag Falad tuwa tagfaamatanganan antam, laman mafafaning tuwa tam tam Diyus. Ay tam Fun Isus tuwa tam fagsegun, te kanya wa fiya tagfalangfe antam. Bundi tam nafagbulun mandi.

4Ay satu ro, nu gtungul way ro tibak taw ayupan, te tam nafagbulun way mandi tagfalangfe antam, aw long ro umlangfe aktuwa. Labon tibak taw gamatangan te, insak wan si anya at nafagbulun. Ay roro si angku glabi yay. 5Nu kasalug aw, si tuwa fiya fiya taw Udyu fag talanan. Taw Israel tuwami. Ay ku aguyangan Benamin tuwa. Ay siginan aw insalug, natuli wa angku sis fawaluk menit. Ay gina aw indaul, insik taw Parisiyu aw. At masuwad, igfaning aktuwa dawdaw tam Diyus suguwan sas taw Udyu. 6Ay igfabulun kyangay dawdaw tibak taw te, faningi tuwa kanya fag ngay suguwan. Katvngvdan nu gfabulun aw, igfauri aktuwa tam Fun Isus at ngay taw. Tibak taw ro nu glag angku ginanya, nafafaningun aktuwa fiya fiya tam Diyus suguwan sas taw Udyu.

7-8Sadaw ebi, kanya fagayu e fanambagun tuwa sa angku. Ay roro ngaro, yaya. Ku ngay fakadaragangun ebi, we fanambagun ay we masuwad sa angku. At ke fanambagun sa angku, antuwa tam Fun Isus, tam Fagsegan. Sumaful aktuwa nangus fiya fiya anya. Kanya tuwa at mafanud fiya fiya.

Katsi, naubun akwan fagayu ku nadaragangan ebi. Inlimata kwan, teway ku fakaumsigun, tam Fun Isus tuwa tagsi angku, 9ay umsadi aktuwa sa anya. Teway nasaful aw te, dewa aw gfaning dawdaw kanya fag ngay suguwan, wa mafafalyam ku asalanan. Ay roro nu gafanud aktuwa sa tam Fun Isus, kanya igfalyam tuwa ku asalanan. Ay katsi katanya kwa fiya. Gafanud aktuwa sa tam Fun Isus, ay tam Diyus nu glag angku, kata kwa nu gyud e asalanan.

10Katsi aw, mafamasadan aw nangalo sa tam Fun Isus at dalan. Mafamasadan aw nangatakan kata ebi tam Fun Isus nu gatakan. Ay mafamasadan kyangay nangate kata ebi tam Fun Isus nu nanangate. Ay kaumsig kyangay glag tam Diyus at ngay fagbulun at madulawan, kata tam Diyus nafagbulun gina gfaleleg tam Fun Isus. 11Ay kanya fagayu, kaumsig aw nandalan, teway gafanud aw te, bandi ban sik menit, tam Fun Isus faleleg yangay ban angku.

12-13Ku ngay fadugsay, kya fiya fiya inkata tam Fun Isus. Tiba ku ugali, ya fiya fiya masine. Ay dewa katanya, gugatan kyay igfaning tam Fun Isus ugali. Teway kanya wan at ke fasadan, laman umkata aktuwa nangus anya.

Ay si angku ku fakaumsigun ku fagbulun katsi, umkata aw sik ngay taw taggudgunan. Kanya fag ngay taw, wa glinggat sat ngaba guyan. Anway nan-guna nangadasug nanbul at famanyun. Ay katanya kyangay. Kwa gamatangan ebi ataw ku ngay nafagbulun. Ku amatanganan, sa way ku fagbulun katsi ban baliwa. 14Nangugatan kway nanfaning tam Fun Isus at ngay ugali, laman fabul aw tam Diyus famanyun sa angku.

Teway igsaful aw te, gina ban intabu tuy ku leleg, tam Diyus igtaban wa ban angku sas banwa, teway aw wan tam Fun Isus taw at sadi. Ay nu sanya kwa ban, tam Diyus nanfon angku sik famanyun, at famauseganan sa ku ngay nafagbulun ebi.

15Ku ngay fadugsay, nu matvngvd wan nu gafanud am sa tam Fun Isus, ay ngay amatanganan fakatai tuwa aro ginan ku longan. Ay nu dyay katvngvd anya ay amatanganan, tam Diyus yay ban tagfoyung ayu. 16Anway te, dewas nga sinu tam, faningi tuwa tam Diyus nafadasug at foyungan sa antam.

Famaningi at Masine ay Tagaki at Mauri

17Ku ngay fadugsay, aro ginan igfoyung aw ayu ku amatanganan ay ku ugali. Ay katsi am, tarabangani famaningi. Ay nu e nalag am sik taw, te kata yangay si emi at leleganan, faningi yangay kanya. 18-19Teway ngayuk taw at yud gfaning em ugali. Fakatanyaun ay, kalimata way tam foyungan sa baliwa tam Isus at naatean.

Ku ngay fadugsay, iglayun wan nu gfatagak aw ayu sanya baliwa fag ngay taw. Ay dewa katanya, gdog kyay fiya glong ayu. Teway takatanya fag ngay taw, at fagbulun si way at naumsigan mandi, ay at amatanganan, si way at fagnalagun. Ay nus nga mapla at fagbulun, wa kapla. Fangkabat kadaragang yadi. Ay takatanya fag ngay taw, at fakadasugan sa ways faurianan.

Ku ngay fadugsay, kanya fag foyungan igfabaluwanan dawdaw angku. Katsi ngani guyway kway.

20Ay roro itam, di tam kata kanya fag ngay taw. Dewa tam gbanwan ste swa daga, roro tam fagbanwanan fiya fiya, sa tuwas banwa. Ay itam, e fagfanyaun tuwa tam takadaga siginans banwa, laman kanya at nanfalangfe antam. Kanya tam Fun Isus wan, tam Fagsegan. 21Ay tam Fun Isus fabali wa ban tam bilug, laman ban tam bilug, sik masine tuwa dawdaw, iglabi tuwa ebi ginan tam bilug gina tam iste swa daga. Kata yangay si tam Fun Isus gina nadog gleleg.

Tam Fun Isus, mafafagbulun wa fiya katanya, teway kanya e fagmadaragangun tuwa. At katvngvdan nu madaragang, kanya wa ban tagmagurang fagayu fagayu.

Currently Selected:

Filipus 3: TAWEAST

Highlight

Copy

Compare