Ebriyu 1
1
Diyus nu Gfoyung Antam siginan tuwa At Baguwama
1Ebi ataw baliwa, ngayu ginan wan Diyus nu gfasadsamanan nu gfadasug at fagalongunun sa tam ngay aguyangan. Ay at tagfadasug at ngay taglong. 2Ay roro ngap katsi fag ngay menit, Diyus nafabukngan sat baguwama nu gelongan sa antam. Ay at baguwama yangay at ufud ebi gina kawat fagdaul daga. Ay kanya yangay at nafili tagbilug fagayu at naawat. 3Diyus at damlag at masulo kalag wa sat Baguwama. Nus nga setaw Diyus, katanya yangay at Baguwama. Ay kanya madaragang nu gelongan, ay gfatvngvdun tuwa nus nge wain. Ay nu ntabu wan nu gfalyam tam asalanan, kanya malunggung sit faglunggungan taglabi nu mauseganan sat Madaragang fag Diyus day tigyangan sas banwa. 4Nu katanya, Diyus nafatiba tungud at Baguwama ay anggan at ngayan, glabi yay at ngay tagfabarita.
At Baguwama Amadaragang yap Sat ngay Tagfabarita
5Anway Diyus wa batang glong sat tagfabarita te,
“O wan ku Baguwama,
ay aw am Mama.”#1:5 Danyu 2:7.
Ay anggan wa batang glong sat tagfabarita baliwa te,
“Aw wa long ban at Tama,
ay kanya wa long ban ku Baguwama.”#1:5 2 Samwel 7:14.
6Ay roro katatuy Diyus at longan gina nafasure at Turungana ste swa daga te,
“Fagayu ku ngay tagfabarita, segi ku Baguwama.”#1:6 Diyuterunumyu 32:43.
7Ay roro katatuy at nalong sat ngay tagfabarita baliwa te,
“Diyus nafakata sik tagmara at ngay tagfabarita.
Ay nafakata sik ngay igang at ngay fanuguwan fag tagfabarita.”#1:7 Danyu 104:4.
8Ay roro sat Baguwama, kanya nalong te,
“Diyus nu gmagurang o, di ban e fakatabuwan.
Ay matuyan tuwa nu gmagurang o am ngay taw.
9Kaumsig tuwo sat masine fag fagbulun.
Ay kalimata o sat mauri fag fagbulun.
Ay nu katanya, am Diyus at nafili emu.
Ay nafon emu sik fagusegananun,
glabi yay sam ngay ufud nu guseganan.”#1:9 Danyu 45:6-7.
10Sas Diyus at rirukan nalong yangay te,
“O ku Fun, siginan ngays fagsigadan naawat o fagdaul daga.
Ay am daluwap wan at naawat banwa.
11Kanya fagayu malyam wan, ay o, sanya tuwo faggugat.
Kata sik balukas fagayu karuwas way,
12ay lumut o kata sik umut, ay tumubus o kata sik balukas.
Ay o, sanya tuwo faggugat.
Ay anggan ban am ngay menit
di e fakatabuwan faggugat faggugat.”#1:12 Danyu 102:25-27.
13Diyus wa batang glong sat ngay tagfabarita te,
“Malunggungi sas faglunggungan taglabi nu mauseganan si ku day tigyangan,
anggan aw gfatsa am daga fagmadaragangun am ngay fabarangyan.”#1:13 Danyu 110:1.
14Yaya! Anway fagayu tagfabarita sik ngay falad tagfagbulun sas Diyus, kanya at nasugu laman nantarabang sat kumlangfe ban fag ngay taw.
Currently Selected:
Ebriyu 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
