Ubadiya 1
1
1Katatuy Fun Yawi at longan sa baliwas talun Idum at nafalag sas Ubadiya.
Yawi e Faurianan sas Idum
Taw Israel, nadungug watam sik longan siginans Yawi. Kanya nasugu sik taw sa sangay talun at ngay taw te, “Ani fafuli, ay fabarangyani sas Idum.” 2Yawi nalong sa sangay taw Idum te, “Dungugani! Am ban at mafanalo way am fag talun ay tagafalingunan dawdaw. 3Glong am te, ‘We mabo emi teway nu gbanwan ami si was tungud bugsul batu at ngabat fag lungud talun.’ Katanya gfandaragang way am ay gfanluk way am ayu mandi. 4Dewa am gfaabat ay fagbanwanan kabat sik biyo nu glayug ay ate gfasud galeme, gfatong kway fiya fiya ayu sas daga. Aw wan Yawi tagelongan.
5“Sik ngay takamul at fagnanbulun nganda way at naumsigan. Ay at ngay tagrabas wat ubas buwadan e nafasawad yay. Ay roro ay ngay fabarangyan faminun wa fiya fiya ayu. 6Ay sumarap Isaw at kadagdagan at ngay nanuranan ay mul wan. 7Ay tagfatarabangan ayu fag ngay talun manluk ayu. Ay tagfafagwesan ayu fag ngay talun gfabarangyan ayu, ay mayan wayu siginan ay talun. Ay tagfasfuwan ayu gfangon, kanya wan tagsuksuwanan kawat fangayon sa ayu. 8Aw wan, Yawi glong aw te, gina ban aw nanfauri ayu fag menit, gfamin kwa ban at ke fagsafulun fag ngay taw. Idum at nangayan te, Isaw at Muyud wa ban e fagsafulun. 9Ay ay ngay sundalu sas fulan Teman mudkulugan kalimu. Ay nu katanya umkate wam, fagayu am tagbanwan sas Isaw at Muyud.”
Taw Idum at Asalanan
10“Am fag ngay taw Idum, anway mason nu kalimata am Akub at kadagdagan, dewa te kanya ay ngay kalongan yay, mapla wa ban am ay mamin wa ban am fiya. 11Ay nafabayanan way am Erusalem gina tibak talun gfabarangyan anya. Ay nafabayanan way am nu gbul at nanuranan ay nu gafudan gfe fagsafulan. Kata yangay am ka fag talun Israel at ngay fabarangyan. 12Taw ro am fagfausegananun gina ay ngay kalongan taw Uda e gfaurianan? Taw ro am fagfausegananun gina e grasras? Taw ro am fagfandaragangun gina gatakan? 13Taw ro am fagnasakboun sa ku ngay taw at fulan gina gafanaliwan, ay nabul at ngay nanuranan? Taw ro am fagfausegananun gina gatakan. 14Taw ro am fagfanyaun sa sangay sagbatan dalan laman nanfate at ngay taglagyu siginans Erusalem? Taw ro am fagnafabayanun at ngay fabarangyan nu gbabo anya gina gatakan?”
Diyus e Faurianan sa sangay Talun
15“Taw Idum, makbang wan Yawi at menit. Ay nus nga setaw ay nafagbulun sa ay iba, katanya yangay ban at fagbulun sa ayu. 16Anway ku ngay taw nafaurianan sa ku mafilian fag muyud, umke faurianan yangay ban gugat gugat fagayu talun. Ay gfaurianan aw dawdaw anya anggan wa te, mamin.
Taw Israel Mabo ban
17“Ay roro taw Israel umke sawad tuwa sis Muyud Siyun, ay gdog yay ban fiya sik mafilian fag lungud talun. Ay si yay ban gugat Akub at kadagdagan at fagagbilugun fag ngay daga. 18Akub ay Use at ngay kadagdagan umkata sik afuy nu gfamin Isaw at kadagdagan, kata sik nagutan nu kalabe yud e sawad. Ay wa ban e sawad Isaw at kadagdagan. Matuyan umgurungan wa fiya. Aw wan Yawi tagelongan.
19“Taw Israel tagbanwan sas Nigib at magbilug ban Isaw at Muyud. Ay taw Israel tagbanwan sas tagbudbugsulanun fag lungud talun sas fakayabian#1:19 tagbudbugsulanun fag lungud talun sas fakayabian: Sis Fangebriyu, Sefela. at magbilug ban taw Filistiyu at talun. Ay taw Israel magbilug yangay ban Efraim ay Samarya at ngay fulan. Ay Benamin at kadagdagan at magbilug ban Gilyad fag fulan. 20Ay taw Israel at kinfoli siginans fakatabanan at magbilug ban Kanaan anggan sas Sarifat. Ay taw Erusalem at ngay kinfoli siginans fakatabanan sas Sefarad at magbilug ban Nigib at ngay fulan. 21At ngay taw tagfalfas taw Israel lumo sas Muyud Siyun laman nanmagurang tagbanwan fag ngay taw sis Isaw at Muyud! Aw wan Yawi, at tagmagurang.”
Currently Selected:
Ubadiya 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
