Amus 9
9
We Maalagyu siginans Diyus at Faurianan
1Amus nalong te, “Nalag aw Fun Diyus nu malindug makbang sas fagyagoan ay nalong te, ‘Falangi Yawi bale at ngay fungfung turuk laman at ugun umlafi ay at ngay taw mafalangan. Ay at kumsawad tagleleg umkate wa sas fagbarangyanan, ay nus di sadi we mlagyu ay we mlangfe. 2Dewa sumuksuwan sasad daga ay sat ngay matean at talun, mul akyangay. Dewa sumas banwa, gumuyud akyangay sas daga. 3Dewa sumuksuwan sas tungud Bugsul Karmil, sumarap akyangay ay gumamat. Dewa sumuksuwan sasad dagat fagngabasadan, sumugu aw sik ubyanun te, sangdui. 4Dewa at ngay fabarangyan tumaban, gfafate kwa fiya. Anway kaumsig kwa dawdaw gfamin ay lag gtarabang.’ ”
5Amus nalong yay te, “Fun Yawi at Madaragang nu nated sas daga, at daga muwigan ay fagayu tagbanwan sanya manguywayan. Ay nu muwigan kata sis talun Iptu fag Safa Nilu nu kadaul ay nu kasirut.
6Diyus wan at naawat at fagbanwanan mandi sas banwa.
Ay naawat yangay kiwang sis tungud daga.
Ay nafasungo dagat sa sangay linyabu ay nafamoyan sas daga.
Kanya at ngayan, Yawi.”
7Ay Yawi nalong te, “Nu gtap aw ayu am fag taw Israel kata way am taw Itiupya.#9:7 Itiupya: Sis Fangebriyu, Kus. Nute ngap nafalfas kwa ayu siginans talun Iptu, ay roro nafalfas akyangay taw Filistiyu siginans fulan Kaptur ay taw Aram#9:7 Aram: ate, Sirya. siginans fulan Kir. 8Aw wan Fun Yawi, glag kwan ay fagmagurangan tagasalanan. Ay gfamin kwa ayu anggan wa te, wam e sawad sas fagdaul daga. Ay roro dewa katanya sis Akub at kadagdagan umke sawad yay. Aw wan Yawi tagelongan. 9Linggati nu kin! Sumugu kwan! Nanfasiri aw ayu, taw Israel, gfasfuwan fagayu talun at ngay taw, kata nu gfasiri sik fare. Ay nus nga setaw sik ngay batu sirut nu gyud kabulsu sis fagfasirian, 10katanya yangay am at mauri fag ngay taw, wam umlangfe siginan ku faurianan. Fagayu am umkate wa sas fagbarangyanan. Kanya fag ngay taw taglong te, we mdasug faurianan sa emi.”
Talun Israel Gdog yay Intvngvd
11“Sik menit ban gdog kyay mawat Dabid at fagmagurangan kata sik bale sirut at kinrasras. Gdog kyay nanfasine siginan at naarasrasan kata ebi taguna, 12laman taw Israel magbilug yangay taw Idum daga at sawad ay tiba yak talun ebi at nabul, ku nalong te, angku. Aw wan Yawi tagelongan. Ay magbulun aw katanya.”
13Ay Yawi nalong yay sa baliwas taw Israel te, “Bandi umkayu ban at ngay nabul buwadan ubas; ya ntabu nu gbul at buwadan, gfadog wa gugat kali. Ay ya ntabu nu gturis at buwadan, gfadog wa gugat tanum. Ay nu nalag te ngayu wa dawdaw at buwadan ubas sa sangay muyud ay sa sangay bugsul, kata wa wat ubas safa nu kalimus. 14Ay gdog akyangay fafoli ku taw Israel sa at ngay talun siginan at fakatabanan. Ay kanya gdog yangay mawat at ngay fulan at kinrasras ay sanya wan nu gbanwan. Ay tumanum yangay ubas ay minum at safa. Ay tumanum yangay at ngay fananumun ay umon at ngay nabul. 15Ay gdog akyangay gfabanwan si ku nafon anya fag daga ay we gayan anya.” Katanya Yawi tam Diyus at longan.
Currently Selected:
Amus 9: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
