Unas 1
1
Unas wa Nafaning Diyus at Suguwan
1Ebi Yawi nalong sas Unas, at tama Amitay te, 2“Loi wa mafali sas Ninibi, tagbiya fag fulan, ay salagi at ngay taw sanya, anway indasug wa sa angku at ngay fagmauriun.” 3Ay roro Unas nalo wa mafali sas fulan Tarsis laman nanlagyu wa Yawi. Ay kanya nalo wa sat lod sas fulan Upa ay nalag sik balutu daul tagaloun sas Tarsis. Ay nafon wa at fansali ay nasakay wa sas balutu nafasfuwan tibak taw laman nanlagyu wa Yawi.
4Ay kanya nut siwas ngaba dagat, Yawi nafadasug sik mabitsug fag tagmara, ay gakarasrasun wan at balutu daul. 5Ay at ngay tagfagbulun sis balutu kalimu wa dawdaw, nu katanya bawat sadi get tarabang sa at ngay fagsegan mandi. Ay naukas wan at ngay fangubaun sasad dagat laman ro umkagan at balutu.
Ay Unas natsa wa tiba daga fag salug balutu ay gtiyug manabayan. 6Ay tagmagurang sis balutu nkakbang sas Unas ay nalong anya te, “Go gtiyug way o dewa kata katsi fag lungud? Alunggungi wan ay eti fanarabangun sa am fagsegan! Undain umfanyu yay antam, ay gfalangfe yay antam siginans fakateun.”
7Ay at ngay tagfagbulun sis balutu gsulitanan te, “Nanfe fagsafulan yay tam te, sinu at ke asalanan ay taw ro at fagindasugun sa antam tuy fag mauri.” Ay nu nafe fagsafulan wan, at natungul Unas at ngayan. 8Ay kanya nalong sas Unas te, “Sama, foyungi emi te, sinu at ke asalanan? Ay taw ro at fagindasugun sa antam katatuy fag mauri? Taw am fagbulun? Ay daginan o fag fulan? Ay sinu am aguyangan?” 9Ay Unas nabalus te, “Aw, sik Ebriyu aw. Ay tagseg aw sas Yawi, Diyus tagsis banwa,#1:9 Diyus tagsis banwa: Sis Fangebriyu, banwa at Diyus. At masuwad, Diyus at naawat banwa; ay ate, Diyus taglabi fagayu. at naawat dagat ay daga.” 10Ay at ngay tagfagbulun sis balutu kalimu wa dawdaw, teway Unas nalong te, “Nalagyu aw Yawi.” Ay nainto anya te, “Taw ro am fagnalagyuun?”
11Ay inkugat yay nu gtagmara, ay at ngay tagfagbulun sis balutu nainto sas Unas te, “Tain ro em fagbulun sa emu laman ro umsine at dagat ay umlangfe tam sas faurianan?” 12Ay Unas nabalus sanya fag ngay taw te, “Ukasi wa angku sasad dagat, ay umsine wa ro at dagat. Anway nasaful aw te, aw way at ke asalanan at fagindasugun takata tuy.” 13Ay ka fag ngay taw wa nafaning Unas, fangkabat, gfabulun yay nanfatsas tigyangan at balutu. Ay roro glabi yay nu gatakan anway amabitsug yap aro taw nu gtagmara. 14Nu katanya, ka fag ngay taw gdarangin sas Yawi. Glong te, “Yawi, lag gfauri emi nus nga setaw ro em fagbulun sas Unas. Ay lag gfafoli sa emi dewa yud ami ntuyan te, kanya e asalanan. Ay nasaful wami te, at kin-gurungan kata tuwa am fasadan.” 15Nu katanya, naukas Unas sasad dagat, ay insine wan at dagat. 16Ay at ngay taw matvngvd nu kalimu Yawi. Ay naanyun ay nafatvngvd at longan te, “Gfatunglus tuwa ban nu gseg ami sas Yawi.”
17Ay Yawi nasugu sik uyang daul laman tumulun Unas. Ay kanya nut sisad uyang ungdan, tuluk menit ay tuluk yabi.
Currently Selected:
Unas 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
