Mikas 7
7
Taw Israel at ngay Asalanan
1Mikas nalong te, “Aw, mafanalo kway! Kata kway takalunus fag taw tagsarap ngay buwadan ubas ay igus at sawad ay roro nus di sadi kwe nalag. 2Ku fagnalongun katanya teway, kwe nalag taw sis talun Israel tagfaning sas Diyus. Ay nus di sadi we taw matuyan. Saman di wa gsarap at balyavtan laman gfafate at kaiban, kata sik taw takawat litag at fangayon ngay mangimut. 3Kanya innanad wa gfagbulun mauri. Ay at ngay tagmagurang ay at ngay tagbuknga gbul way at nafanluk fag fansali. Ay gfaning way takadungug ay at madaragang fag ngay taw at fakaumsigun. Ay insadi laman wa gfasure at matuyan. 4Ay sik taw at masine at ugali, kata way sik makmak at ke dugi yud e fanambagun. Ay katsi ndasug wan at lungud Diyus nu nanfauri ka fag ngay taw, kata at nafatagak ebi siginan at ngay taglong. Ka fag ngay taglong kata sik tagtanud sat ngabat fagbantayan fag bale nu gfatagak. Katsi ka fag ngay taw wa sumaful at fagbulun.
5“At fagmauriun inkayu wan ay, lag am gafanud sa ay kaiban ay sa ay fagwes. Ay maadani tuwa nu gelongan am sa ay iba dewa sa ay mangena at nesugan. 6Anway ginanya ban fag lungud, at baguwama wa ban gumalang at tama, ay at baguyna gfamabo way ban at tina, ay anggan at nugang fag mangena gfamabo yangay ban at nugangina. Ay sik taw at faringangan at kalongan wa mandi.
7“Roro aw, mafanud aktuwa sas Yawi ku Diyus. Ay manya aw nu gfalangfe angku. Ay dumungug wa fiya ku darangin.”
Yawi Tagfalangfe Taw Israel
8Taw Israel nalong te, “Lag tam gfabayan tam ngay fabarangyan nu gfalingun antam. Ay dewa tam inlub, gdog yay tam umlunggung. Ay dewa tam sisad marum, tam Yawi wan tam salung. 9Anway nasalan watam sas Yawi, nanbaris watam at faurianan sa antam yap ngay tumarabang antam ay fasure at matuyan. Lumag watam fiya Yawi nu gfalangfe ay tumaban antam sasad mayamag. 10Tam ngay fabarangyan lumag ay mapla. Teway kanya ebi gfalingun antam glong te, ‘Dada wan Yawi tam Diyus?’ Dwa ban lumugo lumag watam nu mfaurianan. Kanya umkata wa ban sik lifak nu masiyadan sa sangaba dalan.”
11Mikas nalong sa sangay taw Erusalem te, “Sik menit ban gdog yangay am nangawat ay ngay alad, ay ginanya ban fag lungud umdaul yay ban ay daga. 12Ay ginanya yangay ban fag lungud, umdasug sa ayu taw Asirya ay ngay taw siginans talun Iptu at ngay fulan, ay siginans talun Iptu anggan wa sas Safa Iyupratis, ay anggan sigon at ngayayu fag talun. 13Umfanggalutan wan fagdaul daga anway tagbanwan sanya mauri.”
Taw Israel Gdarangin
14Taw Israel gdarangin te, “Yawi, tanudi emi am ngay taw kata sik tagtanud tupa nu gtanud at ngay tupa. Ay si em ngaba dayu fag ngay daga gbiya tuwa at fagfasabsaban at ngay balan, ay ami gbanwan way ami sis talun at yud e taw. Fadauli yap fiya em daga siginans fulan Basan ay anggan sas fulan Gilyad kata ebi. 15Falagi sa emi at madulawan fag ngay fagbulun kata am nafagbulun ebi gina o gfalfas emi siginans talun Iptu. 16Ay tibak talun nu lumag katanya mapla dewa e fagmadaragangun. Ay wa ban gdungugan ay gelongan gfalingun emi. 17Ay malafangan sa sangaba daga kata sik ubyanun katvngvdan nu kapla. Ay nu kalfas siginan at fagsuksuwanan kudkulugan kalimu emu, Yawi em Diyus. 18We tibak Diyus takatvngvd emu. Ay nafalyam tuwo at asalanan am fagagbilugun fag ngay taw at kinsawad. Ay di ban o gugat kadotama emi teway guseganan tuwo kesug emi. 19Afanyui yap fiya emi ay falyami fagayu em ngay asalanan kata nu nasiyad o ay naukas sasad dagat fagngabasadan. 20Falagi am fakafanyuun ay fagmasineun sa emi, Abrayam ay Akub at ngay kadagdagan, kata am nafatuyanan ebi sa em ngay aguyangan.”
Currently Selected:
Mikas 7: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
