Mikas 6

Diyus at Fangatulun sa sangay Taw Israel

1Mikas nalong te, “Am fag ngay taw Israel, dungugani Yawi at fagalongunun sa ayu. Katsi wan, longi wan ay ngay fanlonganan; fadungugi wa sa sangay bugsul ay sa sangay muyud ay fagalongunun. 2Ay am fag ngay bugsul ay am fagdaul daga at ngay fagmatungkudan at matvngvd, dungugani Yawi at fagfayudun sat taw Israel baliwa.”

3Yawi nalong te, “Ku ngay taw, taw fag asalanan ku nafagbulun sa ayu? Go sangay nafatakan aw ayu? Balusi tuwa angku. 4Nafalfas akwa ngani ayu siginans talun Iptu gina am gafanuguwanan. Ay nafili aw Muisis, Arun, ay Miryam tagfangguna ayu. 5Ku ngay taw, amatangani te, Balak, at fun sis Muab, nasugu Balaam laman nangelongan mauri sa ayu baliwa. Balaam at tama Beur. Ay roro kwa nafa elongan Balaam at mauri, ku nafa elongan at masine tuwa sa ayu baliwa. Ay natarabang aw ayu gina am glo siginans fulan Sitim anggan sas fulan Gilgal. Ay amatangani yangay at kin-gurungan si ayu laman sumaful am te, nafalangfe aktuwa ayu.”

6Ay sik taw Israel nabalus te, “Taw manga ban ku fanfon sas Yawi, tagsis banwa fag Diyus, gina aw nanseg anya? Go mon aw sik baka lawis, sik fagbatasun fag anyun? 7Go Yawi museganan tuwa ro manga nu mon aw ngayuk tupa ay tagbiya fag langis? Go mon kwan ku unga turungana laman ku fansali ku ngay asalanan?”

8Mikas nabalus te, “Yawi nafoyung antam at masine. Katatuy at fakaumsigun tam fagbulun: Fagbuluni sat matuyan, ay ugaliani gfangafanyu sa tam ngay iba, ay fababauni faningi sa tam Diyus.”

Diyus at Faurianan sa sangay Taw Israel

9Dungugani Yawi at longan sas fulan Erusalem. Nus nga sinu takalimu anya, kanya sik matuyan fag taw at ke fagsafulun.

“Uda at ngay kadagdagan, afuli wa sas Erusalem ay dungugani. 10Mauri way am fag ngay taw! Kwa ban kalyam ay nafaful fag ngay fagmabalanun siginan at mauri fag balyavtan. Ay ay fagfasudan wa gtungul. Kalimata akway katanya fag fagbulun. 11Kwa kaumsig nu gkilu am gfanluk. 12At mabalan fag ngay taw madotama way. Ay am, kamuwagan way am. 13Nu katanya nanfasigad kwan nanfamin ayu anway sa ay ngay asalanan. 14Dewa am nafangon, wam kapsug; kalunus way am gugat. Dewa am nafaful ay ngay nabul fag ngay buwadan, wam e natvngvdan, anway sumugu aw ay ngay fabarangyan te, buli wan at ngay nafaful. 15Dewa am natanum, wam e nabul. Dewa am naturis buwadan ulibu, wam e natvngvdan at langis. Ay dewa am nasiyad buwadan ubas, bunwa am at nainum at safa. 16Umgurungan wa fiya sa ayu katanya teway nafaning way am fun Umri ay anggan at baguwama fun Akab at mauri fag fagbulun, ay at ngay balyavtan, ay at ngay fangatulun. Nu katanya, gfauri aw ayu, ay tibak talun gfalimatan ay gfalingun ban ayu.”

Currently Selected:

Mikas 6: TAWEAST

Highlight

Copy

Compare