Naum 1
1
1Tuy fag rirukan sa baliwas fulan Ninibi Yawi at nafoyung sas Naum, sik taw Elkus.
Yawi Kalimata Fulan Ninibi
2Yawi tam Diyus wa kaumsig ngay taw nu gseg way sa tibak fagsegan. Kanya kalimata sat ngay fabarangyan ay gfabali sat nafagbulun at mauri. 3Ay di mafali nu kadotama, ay madaragang tuwa, ay gfaurianan wa fiya ngay tagasalanan. Ay kanya nu gdalan kata sik mabitsug fag bagyu. Ay ngay linyabu kata way sik dafug si at darafa nu kanus gina glo. 4Ay nu naelongan wan, ngay dagat ay ngay safa kalanggang. Ay kalangke ngay tanuman sis fulan Basan, sis Bugsul Karmil, ay sis talun Lebanun. 5Ay fagdaul daga guwigan wan sat daga salubangan, anggan ngay muyud ay ngay bugsul. Ay ngay taw sas fagdaul daga kudkulugan kalimu. 6Sinu at mabaris Yawi at fandotaman? Ay gina kalimata kata nu gfalfas afuy siginan at bibig, ay ngay batu karufa sat daga salubangan.
7Yawi matuyan tuwa, ay matvngvd fag fagsegan gina e mataka fag lungud, ay gfatvngvdun tuwa at ngay tagafanud sa anya. 8Ay kanya kata sik famanas at nanfamin at ngay fabarangyan, ay malo anggan wa gfate. 9Am fag ngay taw Asirya, nu e fasadanan am mauri sas Yawi at ngay taw, Yawi sumalag wan, ay wa ban am gdog. 10Kata way am sik taw takaranug at kinsayang sis wa madugi fag ngay makmak. Ay e famin ayu kata sik nagutan nu kabatas. 11Ay ay tagmagurang at sadi gfasadanan mauri sas Yawi at ngay taw, ay mauri way nu gfangatulun.
12Katatuy Yawi at longan sa sangay taw Uda te, “Dewa ay ngay fabarangyan taw Asirya ngayu ay madaragang, gfamin akwan ay kwa gfasawad. Dewa aw nafatakan ayu, dakwa ban gdog. 13Ay katsi gfatuwas kwan taw Asirya nu gmagurang ayu.”
14Katatuy yangay Yawi at longan sa sangay taw Asirya te, “Mamin wa ban ay ngay kadagdagan ay rumasras kwan ay ngay tawtawan fag kayu sa ay fagsegan fag bale. Nanfamasadan kwan ay faglibingan anway kwa kaumsig nu gleleg am.”
15Am fag ngay taw Uda, bantayi sa sangay muyud! Kadasug wan sik tagfoyung laman nanfoyung at masine fag barita te, “E fagmanabayanun sa ay fulan.” Nu katanya, nangasfuwani useganani gina am e fagmafulun, ay fagurungani ay ngay fatuyanan sas Yawi, anway at mauri fag talun Asirya at ngay taw wa ban nanfabarangyan ayu, teway mamin wa fiya fiya.
Currently Selected:
Naum 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
