Mikas 4
4
E Fagmanabayanun tuwa ste fag Daga
(Isa. 2:2-4)
1Sa bans fakatabuwan fag ngay menit, Yawi bale at fagmatungkudan fag muyud glabi yay ban kamafanud sa tibak muyud. Ay at ngay taw nus ngandaginan fag talun mangadasugan ban sanya. 2Ay lumong te, “Bastam wan, glo watam sas Yawi at muyud, sas Akub Diyus bale. Sanya nu gfoyung antam at ngay suguwan laman sumaful tuwa tam gfaning anya.”
Nu katanya, ngay taw nu mangulian wan siginans Siyun, at masuwad te, fulan Erusalem, gamatangan Yawi at ngay foyungan. 3Ay siginan at suguwan, fasadi ban at ngay talun, ay anggan at ngayayu fag ngay talun at madaragang. Nu katanya, at ngay talun di ban gbarangyan, ay di ban e fagnanfaadalun at ngay sundalu laman nanfabarangyan. Ay at fiso mawat wa lasayan aradu ay at bangko mawat wa at fantabas. 4Ay kayu taw malunggung ban si at daga tanuman wat ubas ay kayu igus yud e nalimuwan. Ay umgurungan wa ban fiya katanya, teway Yawi at Madaragang at naelongan. 5Ay dewa tibak taw maning sa at ngay fagsegan mandi, ami gfatunglus wami maning sas Yawi em Diyus faggugat ban.
Taw Israel Kafoli wa sat Fulan Siginan at Fakatabanan
6-7Yawi nalong te, “Ginanya ban fag ngay menit, gfaful aw ku ngay taw ku nafaurianan. Kanya kata sik ngay tupa tagfilayan ay nafansaruwayanan. At ngay kinsawad gfasik talun aw at madaragang. Ay siginan ginanya fag menit, aw wan tagmagurang anya sas Muyud Siyun faggugat ban. 8Siyun#4:8 Siyun: Sis Fangebriyu, Siyun at unga fag mangena. kata sik ngabat fag bale fagbantayan ngay balan gdog yangay ban fiya e fagmadaragangun. Siyun, fulan Erusalem, gdog yangay ban fiya lumabi sas fagayu fulan Israel kata ebi taguna.
9-10“Am tagbanwan sis Siyun,#4:9-10 Am tagbanwan sis Siyun: Sis Fangebriyu, Siyun at unga fag mangena. Katanya yangay sis tapan 13. taw ro ay fagfanguniun kata sik mangena nu gfasalug? Madyay sanya yay ay ngay fun, ay gleleg yay ay ngay tagfangatulun. Ay atakani wan kata sik mangena nu gfasalug, teway wa ban lumugo mubun wam ay fulan ay manwan wa ban am sas wabilug talun, ay sanya ginan e tumaban wa ban ayu sas talun Babilunya. Ay dewa katanya gfalangfe akyay ban ayu siginan ay ngay fabarangyan. 11Ngayu bank talun at kumsadi laman gfabarangyan ayu. Kanya glong te, ‘Nanfaplan#4:11 Nanfaplan: ay ate, Gfafurat. watam fulan Siyun! Ay nanlinggat tam te katvngvd anya nu kapla.’ 12Ay roro ka fag talun wa nasaful ku amatanganan. Ay wa gsaful ku fasadanan te, ku fagnanfafulun anya nanfauri aw, kata sik nafaful fag fare laman at fagrabasun.
13“Am tagbanwan sis Siyun, famasadani ay faminuni wan fagayu ay ngay fabarangyan kata nu gani am fare. Anway gfakata aw ayu sik ngay baka tama at ke ngay sunge bakal ay at ke ngay gu tansu. Ay faminuni wan ka fag ngay talun at masadi laman nanfabarangyan ayu. Ay at nabul fag ngay nanuranan siginan at fagmauriun anyuni wa sa angku, at Fun Diyus sas fagdaul daga.”
Currently Selected:
Mikas 4: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
