Mikas 3
3
Mikas Nasalag Israel ay Uda at ngay Tagmagurang ay at ngay Taglong
1Mikas#3:1 Mikas: Sis Fangebriyu, Aw. nalong te, “Israel ay Uda#3:1 Israel ay Uda: Sis Fangebriyu, Akub ay Israel. at ngay tagmagurang, dungugani! Go sangay bunwa am tagfagurungan at matuyan? 2-3Ay roro wam kaumsig at masine, ay ay fakaumsigun sa way at mauri. Gfalingun way am ku ngay kaiban; kata wa nu gbalat am anya, ay nu gbul am at faknul siginan at butul, ay natabtab at ngay butul, ay naramyuk at ngay faknul ay nasewud wam ay naon. 4Gina gfaurianan ayu fag menit, met ban am tarabang sas Yawi, ay roro wa tumarabang ayu. Fangkabat mayan way ayu anway sa ay ngay nafagbulun at mauri.
5“Katatuy Yawi at longan sa sangay taglong tagfasaruwayan at ngay taw ay gfatuyan te, masine nu gbanwan at ngay tagfon anya fakonun, ay roro gfalimuwanan way sa at yud fon fakonun: 6Anway nafasaruy am ku ngay taw kwa ban e fagfalagun ayu ay wam mafafatuganan. Ay kata way am sisad marum yud kalag. 7Am fag ngay taglong ay am fag ngay tagfatuganan tumabun am ay mata katvngvdan nu kapla am, teway wam e foyungan siginans Diyus.
8“Ay roro Yawi at Falad si wa angku. Kanya tagfon angku fagmadaragangun laman igfagurungan aw at matuyan, ay anggan tagfaamatanganan angku laman mafalong aw sa sangay taw Israel ay taw Uda te, ‘Gsalan wam.’
9“Israel ay Uda at ngay tagmagurang, dungugani! Wam kaumsig at masine, ay kalimata way am sat matuyan. 10Gfaawat am Siyun, at masuwad te, fulan Erusalem sat mauri fag balyavtan. Katvngvdan nu gaawatun am mafamasadan am nanfate. 11Ay gfadiyuganan way am sa tagfon ayu sik nafanluk fag fansali. Ay am fag ngay taganyun, nu gfoyung am gfe sali yangay am. Ay katanya yangay am fag ngay taglong, gfatuganan am anway sas singku. Ay gseg yangay am te, Yawi tumarabang ayu, teway glong am te, ‘Yawi tagufud emi. Nu katanya, nus nga setaw fag mauri wa long umdasug sa emi!’ 12Anway katanya wayay ay ngay fagbulun, e rumasras wa ban Siyun, at masuwad te, fulan Erusalem. Ay umkata wa sik daga at maaraduwan, ay ate umkata wa sik ngay bugsul at ngay bale dan nakarasrasan. Ay Yawi bale at fagmatungkudan fag muyud umgubat wan.”
Currently Selected:
Mikas 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
