Mikas 2
2
Yawi Gfaurianan Tagfalingun sat Yud E Kwa
1Sek am at yud katiyug katvngvdan nu gfasadanan am sat mauri. Ay nus balabag wan gfagbulun wam ay nafasadanan teway e fagmadaragangun wam. 2Ay gbul wam ay fakaumsigun fag ngay daga ay anggan fag ngay bale. Ay gfanluk wam at ngay taw laman gfabul am at ngay bale ay at fagagbilugun fag daga. 3Nu katanya, katatuy Yawi at longan sa ayu te, “Dungugani! Gfamasadan kwa nanfaurianan ayu ay wa ban am umlangfe. Ay wa ban am mafafandaragang teway indasug wan at lungud nu gfaurianan aw ayu. 4Ay ginanya ban fag menit, at ngay taw malingun ayu ay melongan at mafanalyuwan. Glong te, ‘Gfamin wa fiya fiya emi! Yawi nabul wan em ngay daga ay nafon wa sa sangay tagfanluk.’ ”
5Nu katanya, wa ban am e kadagdagan at magbilug ka fag daga gina Yawi at ngay taw gafudan ka fag daga. 6Ay katsi kamoyung yay am emi. Glong am te, “Lag kamoyung emi sa baliwa takadasug fag faurianan, teway wami e fakaplaun. 7Taw ro Yawi fagfauriun Akub at kadagdagan? Go sangay Yawi mafali nu kadotama? Go sangay at fagbulun gfanfauri way?”
Katatuy Yawi at famalus, “Satu ro ay fagbulun nu masine di mul tuwa ban am ku ngay famasegan sa ayu. 8Ay roro ay fagbulun, gfabarangyan way am ku ngay taw at yud e kwa kata sik ngay fabarangyan. Kanya nu gfasad, nu noli wa sa at fulan inlangfe wan siginans fagbarangyanan, ay roro mangaro nangago way am ku ngay taw at balukas. 9Ay naayan wam at ngay mangena siginan at nesugan fag ngay fagbanwanan. Ay ku ngay famanyun sa at ngay unga nabul wam, nu katanya, malyam wa ban siginan anya faggugat ban. 10Nu katanya, loi wan ste ginans talun Israel teway ste wa ban am manabayan, anway ay ngay asalanan nafafurat wan ste. Ay wa ban e fanambagun tuy fag fulan ay umrasras wan. 11Ay ay fakaumsigun tagfoyung ayu tagfanluk way, ay takamuwagan ay we fanambagun. Ay kanya glong ayu te, ‘Umkayu ban ay fanginum wat ubas safa ay tiba yak fanginum.’ ”
Taw Israel ay Taw Uda nu Kalfas
12Yawi nalong te, “Am fag ngay taw Israel ay taw Uda#2:12 Israel ... Uda: Sis Fangebriyu, Akub ay Israel. at kinsawad, faful kwa fiya ayu kata sik ngay tupa sisad fagtiyugan ay ate kata sik ngay balan sis fagfasabsaban. Katanya yangay ban at taw gdog yangay umkayu si ay fulan. 13Lumuwang aw at nataban ayu fag ngay taw at sakbawan fulan, ay aw wan tagfangguna ayu gina am glaklo. Aw wan, Yawi ay Fun, tagfangguna ayu.”
Currently Selected:
Mikas 2: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
