Mikas 1
1
1Katatuy Yawi at longan sa baliwas fulan Samarya ay fulan Erusalem,#1:1 Samarya ... Erusalem: Samarya taglabi tibak fulan sas Israel ay gfafaskudanan fagdaul talun Israel fagmagurangan. Ay Erusalem taglabi tibak fulan Uda ay gfafaskudanan fagdaul Uda fagmagurangan. at nafoyung sas Mikas, sik taw Mureset, ebi gina Yutam, ay Akas, ay Esekiya nu gsugfunanan gmagurang sis talun Uda.
Mikas nalong te: 2Fagayu am tagbanwan sas fagdaul daga,#1:2 tagsas fagdaul daga: ate, am taw Israel tagsis Israel. dungugani fiya fiya, anway Yawi tam Fun si at bale at mafilian moyung ayu ay ngay nafagbulun at mauri.
E Faurianan sas Talun Israel ay Talun Uda
3Dungugani! Yawi umdaga siginan at fagbanwanan ay lumo sat ngabat fag ngay lungud daga.#1:3 ngabat fag ngay lungud daga: sanya nu ganyun sat ngay fagsegan. 4Ay nus nganday fag bugsul nu lumo umtuno wan kata sik salung fili nu katuno. Ay nus nganday fag datag nu lumo umke ngay tagubungan kata sik safa nu nadalan siginan sangaba tubi. 5Kanya fagayu umgurungan wa fiya anway taw Israel ay taw Uda at ngay asalanan. Taw Samarya at nataban tibak taw Israel laman maning sas asalanan. Ay taw Erusalem at nataban tibak taw Uda laman sumeg sa sangay fagsegan. 6Nu katanya, Yawi nalong te, “Rumasras aw Samarya, ay sanya ban sik fagtanuman way wat ubas. Ay ngay batu sanya gfafulid aw sasad datag. Takalag at fagmatungkudan way. 7Ay fagayu fagsegan sis Samarya umrufa wan, ay fagayu at mangama fansali sa sangay mangena tagfabili at bilug tagsis fagnansegan fag bale umbatas wan. At faginkayuun taw Samarya at fagsegan at fansali siginan ka fag ngay mangena tagfabili at bilug. Nu katanya, at ngay fabarangyan mul wan ka fag ngay pilak ay gintu at nafadafut sa sangay fagsegan laman sumali yangay sa sangay mangena tagfabili at bilug sat bale fagnansegan.”
8Ay Mikas nalong yay fiya te, “Guyway aw ay gafanalyuwan teway Samarya inrasras wan. Ay glo aw yud balukasan ay yud e sinilas, sik famasaful te, kabalu aw. Guyway aw dawdaw kata sik idu talun nu gtol ay kata sik manuk ustrits#1:8 manuk ustrits: sik manuk daul yud malayug ay matarung dawdaw. nu guni. 9Anway Samarya at naarasrasan kata sik famaga at yud kafiya, ay umgurungan yangay katanya sas Uda ay anggan sas Erusalem. Erusalem sik tagbiya fag fulan#1:9 tagbiya fag fulan: Sis Fangebriyu, sakbawan. si ku ngay kaiban.
10“Am fag ngay taw Uda, lag gfoyung tam ngay fabarangyan taw Gat te, e faurianan kadasug sa antam. Ay lag gfalagan te, guyway am. Sai yakman fulan Bet-Liapra nu gfalagan am ay fakabaluun kaduge am mafulidan sangaba daga.
11“Am tagbanwan sis fulan Safir, mapla wa ban am ay e fabulun tumaban ayu malanu. Ay taw Saanan kalimu ban glaklo siginan at fulan laman nantarabang ayu. Taw Bet-Esil wa mandi mafatarabang ayu, anway kanya guyway yangay teway e faurianan sa anya. 12At matuyan, taw Marut gsungatan tuwa gfanya nu katabu nu gbarangyan. Ay roro Yawi nafabayan at ngay fabarangyan nu kadasug sas sakbawan Erusalem.
13“Ay am tagbanwan sis fulan Lakis, sayangi ay ngay karwai sa ay kabayu ay lagyui wan. Nafaning way am taw Israel at fagbulun at mauri, ay nafe asalanan yangay am tagbanwan sis Siyun.#1:13 tagbanwan sis Siyun: Sis Fangebriyu, Siyun at unga fag mangena.
14“Am fag ngay taw Uda, foni ay fagafonun sas tagbanwan sis Mureset-Gat teway at ngay fabarangyan magbilug ban at fulan. Ay magbilug yangay ban fulan Aksib, nu katanya, wa ban e fantarabang sa ay ngay fun.
15“Am tagbanwan sis fulan Marisa, Yawi gfadasug ayu sik ngay fabarangyan laman magbilug ban ay fulan.
“Taw Uda, ay ngay tagmagurang sumuksuwan wa ban sas luwib Adulam. 16Ay mul wan ay nesugan ay ngay unga ay tumaban wa sa tibak fulan, nu katanya, katvngvdan nu mbalu am ay ngay unga, fabul am ay buk kata sik manuk uling at alfuyu.”
Currently Selected:
Mikas 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
