Unas 4
4
Unas Kadotama anway Yawi Nfanyu sa sangay Taw Ninibi
1Unas mason nu kalimata Yawi nu gfalyam taw Ninibi at ngay asalanan. 2Ay Unas nadarangin. Glong te, “Yawi, ebi ngani kwa nasalan ku longan gina aw si ku talun te, kafanyu tuwo taw Ninibi nu gubun tuwa at ngay asalanan, anway gsaful kwa te, tagfangesug ay tagfangafanyu tuwo fag Diyus. Ay di mafali nu kadotama o. Ay gfabali tuwo am amatanganan laman wo gfadasug faurianan. Katanya wa ngani ku fagnalagyuun sas fulan Tarsis. 3Ay nu katanya, Yawi, fatei wa angku. Kwa kaumsig gleleg.” 4Ay Yawi nabalus te, “Taw am fakadotamaun dawdaw?”
5Ay Unas nalo wan siginan sad fulan ay malunggung sas fakamenitan baliwa. Ay naawat at fagfanlanbungan ay gfanlanbung sanya kaduge gfanya at kumgurungan sanya fag fulan. 6Ay roro Unas kasugba way gugat, ay Yawi tam Diyus nafatugbung sik tanum ngabat laman glanbung Unas. Ay Unas matvngvd nu guseganan gfanlanbung sanya. 7Ay balabag di sad surip, Diyus nafe ulud ka fag tanum ay inlangke wan.
8Ay at menit nu nsure wan, Diyus nafadasug sik masugba fag tagmara siginans fakamenitan baliwa. Ay nu ngabat wan at menit Unas at alfuyu nsugba wan. Katanya at faginlukmeun at bilug. Ay glong te, “Fatei wa angku. Kwa kaumsig gleleg.” 9Ay Diyus nalong anya te, “Taw am fakadotamaun dawdaw sat kinlangke fag tanum?” Ay Unas nabalus te, “Mason nu kadotama aw. Kwa kaumsig gleleg.” 10Ay Yawi nalong anya te, “Go sangay kafangulan o ka fag tanum at kadugayan nu gtugbung sik yabi way ay balabag di nlangke wan, dewa gyud o at natanum ay at nafatugbung? 11Aw, nu kafanyu aw sas tagbiya fag fulan Ninibi at kayuwan 120,000k taw at yud nasaful ku ngay suguwan#4:11 taw at yud nasaful ku ngay suguwan: Sis Fangebriyu, at yud gsaful go nday at wala ay at siyun. glabi yay sa ka fag tanum. Ay ngayu yangay at ngay balan.”
Currently Selected:
Unas 4: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
