Matiyu 7

Isus At Foyungan sa baliwa Tagfansulup

(Lukas 6:37-38,41-42)

1“Lag am gamatangan sa baliwa ay iba te, mauri at fagbulun, laman ban Diyus di gfoyung te, mauri yangay ay fagbulun. 2Anway nus nga setaw ay amatanganan at mauri sa ay iba, katanya yangay ban ay iba at amatanganan sa ayu. 3Taw ro am fagnalongun sa am fadugsay te, ‘Ganamata wo,’ ay si emu ngap am namata sik kayu tuwa daw. 4Setain ro nu mafafalong o sa am fadugsay te, ‘Igtarabang kwa emu gbul am namata,’ ay si emu ngap am namata sik kayu tuwa daw. 5Tagfanluk way o fag taw! Buli yap taguna ka fag kayu si am mata, ay nu nabul tuwo si emu am namata, glag tuwo fiya fiya nu nanbul o am iba namata.

6“Lag gfon sa sangay idu Diyus at ngay fagekwaun, manfoli ay maagat ayu. Ay lag kukas at ke fanambagun fag ngay dalag sa sangay butan, teway gfansiyadan way.”

Eti, ay Sarapi, ay Atuki

(Lukas 11:9-13)

7“Eti sas Diyus, kanya mon sa ayu. Sarapi, ay lumag am. Atuki, ay e lumuwang sa ayu. 8Anway fagayu taget, mafafabul wa fiya. Ay fagayu tagsarap, lumag wa fiya. Ay fagayu takatuk, e lumuwang wa fiya sa anya. 9Am at ngay magurang, fagalay ay sisiyan get sik tinafay, go mon am anya sik batu? 10Ay nu get yangay ayu sik uyang, go mon am anya sik kubra? 11Ay dewa am sik ngay mauri fag taw, gsaful tuwam gfon at masine sa ay sisiyan, ay ay Tama sas banwa glabi yay fiya fiya nu gfon. Ay nus nga sinu taget sa anya, kanya gfon tuwa nus nge wain at masine.

12“Ay nus nge wain ay fakaumsigun ay iba at fagbulun sa ayu, katanyai yangay ay fagbulun sa anya. Katanya tuwa tagfaning Muisis at Suguwan ay Diyus at ngay taglong ebi at ngay foyungan.”

Isus At Foyungan sa baliwa at Sirut fag Sakbawan

(Lukas 13:24)

13“Sakboi sat alay fag sakbawan, anway tagbvt fag sakbawan ay marafad fag dalan sa ways fakateun, ay ngayu at taglo sanya fag dalan. 14Ay roro at alay fag sakbawan ay at mataka fag dalan sa tuwas leleg at yud e fakatabuwan, ay wa ngayu taglo sanya fag dalan.”

Isus At Fafaskudanan sa sik Kayu ay sat Buwadan

(Lukas 6:43-44)

15“Tagaki sa at yud matuyan fag ngay taglong. Kanya kakbang ayu kata sik tupa magup, ay roro at matuyan, kanya kata way tagfangagat sik idu talun. 16Ay sumaful ban am at ugali anway kalag sat ngay fagbulun. Sik sabinit wa gbuwadan masine. 17At masine fag kayu gbuwadan tuwa masine, ay at yud masine fag kayu wa gbuwadan masine. 18At masine fag kayu wa gbuwadan yud masine. Ay at yud masine fag kayu wa gbuwadan masine. 19Ay fagayu kayu nu dway gbuwadan masine, e muwan wa ban ay e mukas wa sasad afuy. 20Nu katanya, sumaful am at ugali anway kalag sat ngay fagbulun te, kanya at yud matuyan fag taglong.”

Tagfagbulun Mauri Diyus wa Gtoglag Anya

(Lukas 13:25-27)

21“Bunwa ban fagayu at nalong sa angku te, ‘Ku Fun, ku Fun,’ at kumful sas Diyus at fagmagurangan taw. At kumful kayu way ban fiya fiya tagfaning sa ku Mama sas banwa at fakaumsigun. 22Ay gina ban igtap asalanan fag menit, ngayu bank taw at lumong sa angku te, ‘Em Fun, em Fun, sa am ngayan gfoyung tuwami am longan, ay gayan ami ngay mafurat fag falad ay gfagbulun ami at ngay madulawan.’ 23Ay gbalus kban te, ‘Ayayui angku anway kwa gtoglag ayu, am tagfagbulun mauri.’ ”

Isus At Fafaskudanan sa sik Duwak Taw Takawat Bale

(Lukas 6:47-49)

24“Nus nga sinu tagdungugan ay tagfaning ku ngay foyungan, kanya kata sik taw at ke fagsafulun nu gbale, at turuk mafatungkudan tuwa sa sik batu. 25Ay dewa gbiya dawdaw nu gmoyan, ay at safa nu kadaul, ay at tagmara nu gdalan at bale di mfuwan, anway at turuk mafatungkudan tuwa sa sik batu. 26Ay nus nga sinu tagdungugan ku ngay foyungan ay nu dway gfaning, kanya kata way sik taw at yud e fagsafulun nu gbale sisad lagnas. 27Ay nu gbiya wa dawdaw nu gmoyan, ay at safa nu kadaul, ay at tagmara nu gdalan at bale, at bale nagfuwan, taba wa nrasras.”

28Ay Isus nu ntabu wa nu gfoyung katanya, at ngay tagdungugan nadulawan at foyungan, 29teway Isus nu gfoyung, kata tuwa sik fun at ke fagmadaragangun, ay di kata at ngay tagfoyung Muisis at Suguwan nu gfoyung.

Currently Selected:

Matiyu 7: TAWEAST

Highlight

Copy