Matiyu 8

Isus Nafafiya sik Ama at ke Mason fag Daylan sit Balat

(Mar. 1:40-45; Lukas 5:12-16)

1Ay Isus nu ndaga wan siginans muyud, ngayuk taw at naalo anya. 2Ay rodi sik ama at ke mason fag daylan sit balat#8:2 mason fag daylan sit balat: Sa tibak salin sas Faniganun, ketong. Sis Grigu, at masuwad te, sadsamanan fag daylan sis balat, tibak taw glong te, mafurat ay wa masine nu kaful sa tiba kata at nafaugali. Tapi Lebitiku afud 13. inkakbang sas Isus ay inlub. Ay glong te, “Ku Fun, nu kaumsig o, fafiyai yap nangus angku laman tumap yangay angku te, masine aw kata em fagfaningun fag ugali.” 3Ay Isus nated ka fag taw ay glong te, “Kin, kaumsig aw. Afiyai wan!” Ay rodi tv, infiya wa daw at daylan. 4Ay Isus nalong anya te, “Lag kamansulit sa tibak taw. Loi way fagtvngvd ay falagi am bilug sas taganyun. Ay foni am anyun, kata ebi Muisis at nasugu, laman am famasaful sa sangay taw te, infiya wo.”

Isus Nafafiya sik Fun Sundalu at Fanuguwan

(Lukas 7:1-10)

5Ay gina Isus gakadasugun sas fulan Kapernaum, e sik fun sundalu nkakbang sa anya ay matvngvd nu get te, 6“Ku Fun, ku fanuguwan matagilid way gugat ay wa malelegan sa ku bale ay gatakan wa dawdaw.” 7Ay Isus igbalus te, “Kin, sumanya akyay ro laman nanfafiya aw am fanuguwan.” 8Ay kanya fag fun sundalu gbalus Isus te, “Lagi, ku Fun. Kapla aw nu lumo o sa ku bale. E longani way fagtvngvd ay umfiya wa ro ku fanuguwan. 9Gsaful aw te, si aw ku fun at daga fagmadaragangun, ay e fagmagurangun akyangay sik ngay sundalu. Ay nu nalong aw sa ku fanuguwan at sadi te, loi sanya, gfaning tuwa. Ay nu nalong aw at sadi te, stei, kanya kakbang tuwa. Ay nus nga setaw ku suguwan kanya gfaning tuwa.” 10Ay Isus nu nadungug at longan, naylatan dawdaw. Ay nalong sat ngay tagalo anya te, “Matuyan iglong aw ayu te, kwa batang e nadungug at tagafanud takatvngvd anya sis Israel. 11Ay iglong akyangay ayu te, ngayu bank taw at kumdasug siginans fakamenitan ay fakayabian, ay nanfasfuwan Abrayam, ay Isaak, ay Akub gfangon sas Diyus at fagmagurangan taw. 12Ay roro ngayuk taw Udyu satu takatap sas Diyus at fagmagurangan taw at maukasan sasad marum dawdaw. Ay sanya guyway wa ban dawdaw ay gfaringgitan at bagang.” 13Ay Isus nalong sanya fag fun sundalu te, “Ulii wan. Ay umgurungan wa ro am fagetun katvngvd am fagafanudun.” Ay gina Isus gelongan, ginanya yangay fiya fiya fag lungud ka fag fanuguwan infiya wan.

Isus Nafafiya Pedru at Nugangina

(Mar. 1:29-34; Lukas 4:38-41)

14Ay Isus nalo sas Pedru at bale, ay nu ndasug wan, kanya nasakbo ay nalag Pedru at nugangina sisad igyan matagilid anway masugba at bilug. 15Ay Isus nated ka fag mangena at daluwap ay infiya wan. Ay kanya nlindug ay nafamasadan Isus at fakonun.

16Ay nu gakayabiun wan, e nataban sas Isus at ke mafurat fag falad fag ngay taw. Ay Isus sayginan way gelongan nafaayan wan ka fag ngay mafurat fag falad. Ay fagayu at ke daylan nafafiya wan. 17Fagnafagbulunun katanya laman umgurungan Isayas sik taglong at nafoyung ebi te,

“Tam fagmamomuyun, kanya nafalyam wan.

Ay tam ngay daylan, kanya nafafiya wan.”

Isus Nafaskud Duwak Ama Takaumsig Tagaaloun Anya

(Lukas 9:57-62)

18Ay Isus nu nalag sik ngay taw ayuwayu sa at ngaba dayu, kanya nalong sat ngay tagadal te, “Bastam, suma watams dife lino.” 19Ay e sik tagfoyung Muisis at Suguwan at kinkakbang sas Isus ay nalong te, “Em Takamoyung. Nangalo akwa emu nus nganday nu glo o.” 20Ay Isus nabalus te, “Sik idu talun e faglutan tuwa mandi sasad magubat. Ay sik manuk tungud e fugad tuwa mandi. Ay roro aw, Taw at Baguwama, kwe bale mandi ku fagfafiyan.” 21Ay at tagadal at sadi nalong sas Isus te, “Em Fun, nu masine di sa emu guli akyay sa em bale laman nanlibing akyay ku mama.” 22Ay Isus nalong anya te, “Aloi wa angku. Fabayani wa at ngay matean taglibing at ngay kinkate.”

Isus Nafatuwas at Tagmara ay at Lumbak

(Mar. 4:35-41; Lukas 8:22-25)

23Ay Isus nasakay wa sas balutu, ay at ngay tagadal nangufud anya. 24Ay gina si sangaba lino, indasug sik magong dawdaw fag tagmara. Ay katvngvdan nu gtagmara at lumbak gatabunun wa bangan at balutu. Ay kadugenya Isus gtiyug way. 25Ay at ngay tagadal inkakbang sas Isus ay gfulo ay glong te, “Em Fun! Em Fun! Falangfei emi! Umkafuy wa ro tam!” 26Ay Isus iglong te, “Taw ro ay fakalimuun? Wa ngaro matvngvd ay fagafanudun!” Ay Isus inlindug ay nafatuwas at tagmara ay at lumbak. Ay rodi tv insine wan. 27Ay at ngay tagadal nadulawan ay nalong te, “Sinu tuy fag taw takatvngvd anya at fagbulun? Madyay dewa at tagmara ay at lumbak nafaning tuwa at longan!”

Isus Naayan at ngay Mafurat fag Falad siginans Duwak Ama

(Mar. 5:1-20; Lukas 8:26-39)

28Ay Isus ay at ngay tagadal indasug sas dife lino sas taw Gerasa at talun. Ay sanya e duwak ama at ke ngay mafurat fag falad at nafablang Isus. Ka fag duwama siginan sangay faglibingan fag luwib. Ay kanya malimu dawdaw, we taw malangfe sanya. 29Ay ka fag duwama guro dawdaw sas Isus te, “Taw ro am fagnastiyeun sa emi, o Diyus at Baguwama? Go am fagnastiyeun nanfauri wa ro o emi, dewa yud indasug sas fagfaurian fag menit?” 30Ay sit dayu sirut e butan ayuwayu malfasan. 31Ay ka fag ngay mafurat fag falad matvngvd nu glong sas Isus te, “Nu gayan wo emi, fasakboi way emi isnay fag ngay butan.” 32Ay Isus nalong te, “Kin, loi wan!” Ay ka fag ngay mafurat fag falad nalfas wa fiya ay nasakbo wa sa sangay butan. Ay rodi tv ka fag ngay butan nafantarungan sat lod, ay taba wa intong inkafuy wa sasad lino.

33Ay ka fag ngay tagtanud butan natarung wa sas fulan. Ay nafamansulit sa tibak taw aro at nalag fagayu ay anggan sa ka fag duwama ke ngay mafurat fag falad. 34Nu katanya, fagayu taw nananlag sas Isus ay matvngvd nu glong te, “Loi wan ste ginan em talun.”

Currently Selected:

Matiyu 8: TAWEAST

Highlight

Copy