Matiyu 20

Isus At Fafaskudanan sa sik Tagbilug Tanuman Wat Ubas

1Ay Isus nalong yangay te, “Diyus nu gmagurang taw kata yangay sa sik tagbilug tanuman wat ubas. At tagbilug masurip nu nansarap at ngay tagfagbulun sat tanuman. 2Ay nu e nalag wan, tagbilug ay at ngay tagfagbulun nadiyuganan te, kayunya ban at fon sa sik menit at nafagbulunan. Ay tagbilug nasugu at ngay tagfagbulun sat tanuman. 3Ay gina sis fasiyam sbalabag, at tagbilug nalo yangay ay nalag tibak taw at maayayagan yud e fagbulun, sas fulan fagfabilian. 4Ay at tagbilug nalong te, ‘Am sigon, loi wan nanfagbuluni sa ku tanuman wat ubas. Ay sumali kyay ban kasakan sa ay nafagbulunan.’ 5Ay ka fag ngay taw nalo wa fiya sat tanuman wat ubas. Ay nu swa bilug menit wan, ay anggan nut siwas fatulu sfafun, at tagbilug nalo yangay laman nansarap yay fiya tagfagbulun at tiba kata aro ataw fag ngay tagfagbulun. 6Ay nu sfalima wa sfafun, at tagbilug nalo yangay fiya ay nalag sik ngay taw nu maayayagan yud e fagbulun. Ay nalong te, ‘Taw ro ay fagayayagun fagngabak menit?’ 7Ay ka fag ngay taw nabalus te, ‘Anway we gtaban emi nu gfagbulun.’ Ay tagbilug nalong te, ‘Ay kin, nu katanya, fagbuluni sa ku tanuman wat ubas.’

8“Ay nu gafalyuun wan at menit, ka fag tagbilug nalong sat tagtanud te, ‘Fastei wan ngay tagfagbulun sa ku tanuman, ay foni wan at ngay nalufuyan. Taguna am fagsaliun taguyan fag fulan taw at kindasug ay anggani wa taguna fag fulan taw.’ 9Ay at ngay kindasug sis falima sfafun fag fulan taw, kanya nabul at nalufuyan sa sik menit at nafagbulunan. 10Ay at taguna fag fulan taw at kindasug nu gfasad, ‘Ayu yap ro nangus at fon emi.’ Ay roro at fon kayu way gugat at nafon sa taguyan fag fulan taw. 11Ay taguna fag fulan taw gfaringangan sa tagbilug gina nabul at nalufuyan. 12Ay glong sa tagbilug te, ‘At kindasug taguyan fag fulan taw wa nalugo sirut nu gfagbulun. Ay ami nu gfagbulun ami, fagngabak menit wan dewa dawdaw masugba. Ay gsudan way daw em nalufuyan!’ 13Ay at tagbilug nabalus sat sadi te, ‘Sama, kwa gfanluk emu. Tepngawan kayu way niya tam nafatuyanan, go kin? 14Kanya ku fansali buli wan, kayu wa fiya anya. Ay ulii wan, anway gfasudan akway nu gsali aw sa taguyan fag fulan taw ay anggan sa emu. 15Go sangay wo nasaful te, aw way at ke fagmadaragangun gfon ku singku? Go kadotama o sa am amatanganan te, nafagbulun aw masine sam iba?’ ” 16Ay Isus nalong yay fiya te, “Katanya yangay ban, e ngay taw tiba daga way katsi, ay roro kanya tuwa ban at tiba tungud. Ay e ngay taw tiba tungud katsi, ay roro kanya wa ban at tiba daga.”

Isus At Fatulu Ginan nu Gfoyung nu Mkate ban

(Mar. 10:32-34; Lukas 18:31-34)

17Ay Isus nu si sangaba dalan wan sas Erusalem, nataban at tagadal fag labi duwa sat dayu ay glong te, 18“Amatangani, katsi sa watams Erusalem. Ay sanya ban e moyung ban angku, Taw at Baguwama, sa sangay taganyun daul ay sa sangay tagfoyung Muisis at Suguwan. Ay ka fag ngay taw wa ban at lumong te, ‘Fatei wa anya.’ 19Ay e tumaban yangay ban angku sat yud Udyu fag ngay taw. Ay kanya wa ban fag ngay taw at malingun ay malang angku, ay anggan tumuktuk ban angku sas salibagan kayu. Ay dewa katanya, sas fatuluk menit gdog kyay ban gleleg.”

Sebidiyu Mangena at Fagetun

(Mar. 10:35-45)

20Ay Sebidiyu mangena nkakbang sas Isus, gtaban at baguwama fag duwa. Ay kanya natudan sas Isus anway e fagetun sa anya. 21Ay Isus ginto anya te, “Nataw am fagetun?” Ay ka fag mangena nabalus te, “Satu nu gmagurang wa ban o, falunggungi ku baguwama fag duwa, at sadi si am siyun fag tigyangan, ay at sadi si am wala fag tigyangan.” 22Ay Isus nabalus te, “Yaya. Wam gsaful ay fagetun at masuwad. Go sangay mabaris tuwam ku fagnanbarisun ban?” Ay kanya nabalus te, “Kin. Mabaris tuwami.” 23Ay Isus nabalus te, “E kin. Nus nga ro te, mabaris tuwam. Ay roro bunwa aw tagfili te, go sinu ban at kumlunggung sa ku siyun ay sa ku wala baliwa. Ku Mama tuwa at ke fasadan at kumlunggung sanya.”

24Ay at safuluk tagadal nu nadungug katanya, indotama sa ka fag dugsay. 25Ay Isus nafaful at ngay tagadal sa anya ay nalong te, “Nasaful wam te, at ngay tagmagurang sa sangay talun e fagmadaragangun nu gsugu at ngay taw, ay nus nga setaw at fakaumsigun, at ngay taw gfaning wan. 26Ay roro dangay am katanya. Nus nga sinu am takaumsig nanmagurang, afanuguwanani ay iba. 27Ay nus nga sinu am takaumsig tagfangguna, afanuguwanani ngani ay iba. 28Katanya akyangay, Taw at Baguwama. Ku fagindasugun bundi te, ku iba nantarabang angku, antuwa te, laman nantarabang aw at ngay taw. Ay nanfon aw ku leleg, laman ku naatean nanfalangfe at ngay taw sas faurianan.”

Isus Nafafiya Duwak Mangama at yud Glag

(Mar. 10:46-52; Lukas 18:35-43)

29Ay gina Isus ay at ngay tagadal nalo siginans fulan Eriku, sik fulan taw ayuwayu naguyan anya. 30Ay sanya e duwak ama yud glag malunggung sis day dalan. Ay ka fag duwama nu nadungug te, Isus galangfeun, kanya nauro te, “Em Fun, afanyui yap emi, o fun Dabid at kadagdagan!” 31Ay sanya fag ngay taw matvngvd nu gsalag ka fag duwama laman umragang. Ay fangkabat glabi yay aro ataw nu guro te, “Em Fun, afanyui yap emi, o fun Dabid at kadagdagan!” 32Ay rodi Isus intuwas yay nu glo, ay nainto sa ka fag duwama te, “Tain ay fakaumsigun ku fagbulun ro sa ayu?” 33Ay ka fag duwama nabalus Isus te, “Em Fun, kaumsig ami nangus nu gfafiya o em mata laman glag tuwami!” 34Ay Isus kafanyu ka fag duwama ay nated at ngay mata. Ay rodi tv, ka fag duwama glag wa fiya ay naalo wa Isus.

Currently Selected:

Matiyu 20: TAWEAST

Highlight

Copy