Matiyu 21

Isus nu Kadasug sas Erusalem kata wa sik Fun

(Mar. 11:1-10; Lukas 19:29-38; Uan 12:12-19)

1Isus ay at ngay tagadal gina gdalan fulan Betfage sis Bugsul Ulibu makbang Erusalem, Isus nasugu at tagadal at duwa. 2Ay nalong te, “Nanlagi sanya am dayu fag fulan. Ay nu mdasug am sanya, lumag ro am sik asnu masiyukan ay e riyangan ay masiyukan yangay. Ay luwasi wan at siyuk ay tabani ste. 3Ay gina am gluwas, nu e gsalag ayu, longi anya te, ‘Em Fun gayudan at fagsakayan katsi.’ Ay fataban wa fiya sa ayu.”

4At fagin-gurunganun katanya laman umgurungan Diyus at taglong ebi at longan te,

5“Longi wa sas Erusalem at ngay taw te,

‘Linggati, gadasugun wan ay Fun.

Kanya malukme tuwa, ay igsakay sa sik asnu lawis.’ ”#21:5 Sakariyas 9:9.

6Ay at tagadal at duwa nalo wan gfaning Isus at longan. 7Ay kanya nataban sanya fag asnu ay anggan at riyangan. Ay kanya nasagmak at ngay balukas sat tungud asnu guyuy. Ay Isus malunggung sanya. 8Ay nangayu fag taw nasagmak at ngay balukas sa sangaba dalan. Ay tiba at fanagmak nauba falungfung kayu. 9Ay at ngay taw, dewa at naguna Isus ay dewa tagaguyanan, gfanguroan te, “Gseg watam fun Dabid at kadagdagan takadasug. Masine tuwa kanya at fagindasugun, at fagmadaragangun siginan was Diyus.#21:9 Danyu 118:25-26. Gseg watam kanya tagsiginans banwa.”

10Ay Isus gina bagu kadasug sas Erusalem, fagayu at taw sanya glinggat dawdaw ay gidgintoan te, “Sinu siring kanya fag taw?” 11Ay tibak taw nabalus te, “Kanya Isus, sik taglong siginans fulan Nasaret sis Galiliya fag talun.”

Isus Nalanu Diyus Bale

(Mar. 11:15-19; Lukas 19:45-48; Uan 2:13-22)

12Ay Isus nasakbo sas Diyus bale ay naayan at tagfabili ay anggan at tagbili sanya ginan. Ay Isus nafalub at ngay tagfabangsi singku at ngay fagfatungkudan, ay anggan at ngay tagfabili linatad at ngay faglunggungan. 13Ay Isus nalong tagsanya fag ngay taw te, “Sis Diyus at longan marirukan te, ‘E nafangayan wa ku bale sik Bale Daranginan.’#21:13 Isayas 56:7. Ay roro mangaro ku bale nafasik fagsuksuwan way am ngay takamul”#21:13 Eremyas 7:11.

14Ay at ngay yud glag ay at ngay yud malo nkakbang sas Isus sis Diyus bale, ay Isus nafafiya wan. 15Ay ngay taganyun daul ay ngay tagfoyung Muisis at Suguwan nalag Isus at madaragang fag fagbulun. Ay e nadungug yangay sik ngay sisiyan nu guro te, “Gseg watam fun Dabid at kadagdagan!” Ay ka fag ngay taw matvngvd nu kalimata. 16Ay nainto sas Isus te, “Go wo nadungug ka fag ngay sisiyan at uroan?” Ay Isus nabalus te, “Muwag. Nadungug kwan. Ay am, go wam natap te, ‘Dewa ngay sisiyan ay anggan ngay ngenge gseg tuwa emu’#21:16 Danyu 8:2.?” 17Ay Isus nalo wan sanya ginan fag ngay taw ay anggan siginans Erusalem, ay nasa was fulan Betaniya ay sanya wan nu gtiyug.

Isus Nafayango sik Kayu at yud e Buwadan

(Mar. 11:12-14,20-24)

18Ay balabag di, gina Isus noli sas Erusalem, kalunus wan. 19Ay kanya nalag sik kayu sis day dalan, ay inkakbang yama. Ay roro manlag di we buwadan, at don wadi. Ay Isus nalong sa ka fag kayu te, “Wa ban o muwadan faggugat!” Ay rodi ka fag kayu nyango wan. 20Ay at ngay tagadal nu nalag, nadulawan te, “Taw ro at faginyangoun daw?” 21Ay Isus nabalus sat ngay tagadal te, “Matuyan iglong aw ayu te, nu gafanud tuwam, ay nu gdi am gadayuwan sa ay amatanganan, anggan ban am, mafafagbulun wam ku nafagbulun sa ka fag kayu. Ay bundi katanya fagtvngvd, nu nalong am sa sik muyud te, ‘Alini wan sanya ginan ay loi sasad dagat,’ malin wa ro fiya ka fag muyud. 22Ay nus nge wain ay fagetun gina am gdarangin, nu gafanud tuwam, gfafabul wam fiya.”

Sinu at Nasugu Isus?

(Mar. 11:27-33; Lukas 20:1-8)

23Ay Isus indasug sas Diyus bale, ay kaduge kanya gfoyung, ngay taganyun daul ay taw Udyu at ngay tagmagurang inkakbang ay ginto te, “Daginan am fagmadaragangun nu gfagbulun o takatanya? Sinu at nasugu emu te, fagbuluni takatanya?” 24Ay Isus nabalus te, “Ginto akyangay ayu. Ay nu nabalus tuwa ro am ku fagintoun, anggan aw, igbalus akyangay ayu te, sanya ginan ku fagmadaragangun ku fagmafabulun katanya. 25Ay katatuy ku fagintoun ayu, go daginan Uan Tagfasurung at fagmadaragangun nu gsurungun taw? Go siginans banwa, ay go siginans taw?”

Ay kanya fag ngay taginto gsulitanan yay gadayuwan sit dayu te, “Nu lumong maro tam te, siginans banwa, kanya malus ro antam te, taw madyay ay fagyudun gafanud sas Uan at longan? 26Ay nu lumong maro tam te, siginans taw, umlimata wa antam fag ngay taw, anway at ngay taw gafanud te, Uan Diyus taglong.” 27Nu katanya at ngay taginto nabalus Isus te, “Yaya, wami nasaful te, go daginan.” Ay Isus nalong yangay te, “Ay kin, anggan aw, dakwa gfoyung ayu te, sanya ginan ku fagmadaragangun ku fagmafabulun katanya.”

Isus At Fafaskudanan sa sik Dugsay

28“Ay go tain nu gamatangan am at masuwad tuy fag fafaskudanan? E sik taw at unga duwak ama. Ay at tama nananlag sat taguna fag unga ay nalong te, ‘Loi wan katsi sa tam tanuman wat ubas ay fagbuluni way sanya.’ 29Ay kanya nabalus te, ‘E sek!’ Ay roro dewa kauri, nalo yay sanya. 30Ay at tama nananlag fiya sat ariyan, ay gsud yay at longan. Ay at ariyan nabalus te, ‘Kin!’ Ay roro dewa nakin, wa nalo sanya. 31Inday kanya fag dugsay tagfaning at tama at longan?”

Ay at ngay taw nabalus te, “At kaka.”

Ay Isus nalong yangay te, “Matuyan iglong aw ayu te, at ngay taget buwis ay at ngay fakamayunan fag mangena gumuna yay ayu nu gsakbo sas Diyus at fagmagurangan taw. 32Madyay ebi Uan Tagfasurung indasug wa sa ayu, laman nanfoyung wa ayu te, ‘Katatuyi tuwa ay fagbulun at masine.’ Ay roro wam gafanud sa anya. Ay ngay taget buwis ay ngay fakamayunan fag mangena ngap gafanud tuwa anya. Ay dewa am nalag ka fag ngay taw tagafanud sas Uan, am, wam gfasaman ay amatanganan ay wam yangay gafanud sa anya.”

Isus At Fafaskudanan sa sik Tagbilug Daga ay sat Tagtanud

(Mar. 12:1-9; Lukas 20:9-19)

33Isus nalong yangay te, “Dungugani sadi ya ku fafaskudanan. Ebi e sik tagbilug daga natanum sik ngay wat ubas sat gamasun. Ay anggan naalad at natanum, ay naawat sik fagturisan at buwadan, ay anggan naawat sik bale ngabat, sik fagbantayan. Ay kanya nafatanud at tanuman wat ubas sa sik ngay tagtanud ay nalo wan sa sik talun ngayayu. 34Ay nu makbang wan fanrabasan, at tagbilug nasugu tiba at fanuguwan sat ngay tagtanud at tanuman laman nanbul si anya fag afud. 35Ay at ngay tagtanud nagamat ka fag ngay fanuguwan. Ay at sadi nafalang. Ay at sadi nafate wan. Ay at sadi nafalang batu. 36Ay at tagbilug gdog yay nasugu tiba yak fanuguwan, ayu yap aro taguna. Ay gsud yay at ngay tagtanud at fagbulun sa ka fag ngay fanuguwan. 37Ay at fakatabuwan, at tagbilug nasugu wa at baguwama ay gamatangan te, ‘Ku ngay fanuguwan gumalang yay ro ku baguwama.’ 38Ay roro at ngay tagtanud nu nalag wa at baguwama, gsulitanan sit dayu te, ‘Kanya wan at baguwama at nangagbilug ban at tama at daga. Bastam, nanfate watam anya, laman antam wa ban at daga.’ 39Ay katanya wayay, kanya nagamat ka fag baguwama ay nataban sas day fagtanuman wat ubas ay nafate wan.”

40Ay rodi Isus ginto te, “At tagbilug nu ndasug, tain ro at fagbulun sanya fag ngay tagtanud?”

41Ay ka fag ngay taw nabalus te, “At tagbilug gfate wa ban fiya yud e nafanyuwan kanya fag ngay tagtanud at mauri. Ay nanfatanud yangay ban at tanuman sa tibak tagtanud, laman nu e buwadan wan, mon ban sa anya sik afud.” 42Ay Isus nalong te, “Go yam natap Diyus at longan?

‘Dewa at ngay takawat bale inlimata ka fag batu at fangawat bale,

katsi kanya tuwa fag batu at famatvngvd fagdaul at bale.

Katanya wan tam Fun at fagbulun.

Ay nu nalag tam, nasaful tam te, madaragang wa fiya at fagbulun!’#21:42 Danyu 118:22-23.”

43Nu katanya, glong aw ayu te, “Wa ban am umful sas Diyus at fagmagurangan taw. Tibak taw way ban tagfaning Diyus at fakaumsigun at kumful. [44Ay nus nga sinu at kumtong sanya fag batu, kanya mangasluwan wan. Ay at mafalangan ka fag batu, kanya umyamas wan.”]

45Ay at ngay taganyun daul ay at ngay taw Parisiyu nu nadungug Isus at fafaskudanan, gamatangan te, “Sa wa siring emi baliwa at longan.” 46Ay dewa kaumsig ganan-gamatun Isus, kanya kalimu way ngay taw sanya, anway ngay taw gayup te, Isus, Diyus at taglong at sadi.

Currently Selected:

Matiyu 21: TAWEAST

Highlight

Copy