Matiyu 19

Isus At Longan sa baliwa at Naubun at Mangena

(Mar. 10:1-12)

1Ay Isus nu ntabu wa nu gfoyung, nalo wan siginans talun Galiliya ay nalo wa sa sik ngay fulan sas talun Udiya sas dife Safa Urdan. 2Ay sik ngay taw ayuwayu naguyan Isus, ay kanya nafafiya at ke daylan sanya.

3Ay tibak taw Parisiyu nkakbang sas Isus ay nafaskud te, “Go sik mangama nu naubun at mangena dewa nus nga setaw at fanlonganan, go katanya gfaning manga Muisis at Suguwan?” 4Ay Isus nabalus te, “Go sangay yam natap te, ebi siginan ngays fagsigadan Diyus naawat taw, sik ama ay sik ina?” 5Ay nalong te, “Nu katanya, sik mangama mubun ban at tama ay at tina ay nanfaudgufudan sat mangena. Ay kanya fag duwa nsadi wan; 6ay bunwa duwa, sadi wan. Ay nus nga sinu Diyus at nafasadi, lag ban e nanfasadsamanan.” 7Ay ka fag ngay taw Parisiyu nabalus sas Isus te, “Nu katanya, taw ro ngani ebi Muisis at fagnalongun te, ‘Sik mangama nu gubun wan at mangena, bagu gfalo foni yap at mangena sik famasaful te, gsadsamanan wan’?” 8Ay Isus nabalus te, “Muisis at nalong te, kin, anway gfaning way am gugat ay fasadan. Ay wa katanya Diyus fasadan siginan ngay ebi taguna. 9Nu katanya, glong aw sa ayu te, nus nga sinu at naubun at mangena, ay ka fag mangena nu gdi kamayun, ay at mangama ndaduwa yay sa tibak mangena, ka fag mangama kamayun wan.”

10Ay Isus at ngay tagadal nalong sa anya te, “Ay nu katvngvd wa ngap anya, masine sik taw sesadiani way anggan bandi.” 11Ay Isus nalong sat ngay tagadal te, “Tibak taw wa gadunguganun ka fag longan. Kayu way Diyus at nafaamatanganan, kayunya way at tagadunguganun. 12Wa kata at sadi sik taw at fanlonganan at fagyudun kadaduwa. Tibak mangama wa mafatsa sik mangena, anway katanya wan siginan ngay insalug. Ay tibak mangama at fagyudun kadaduwa, anway nafaluwasan wan. Ay tibak mangama fagyudun kadaduwa, laman ban sas Diyus at fagmagurangan taw. Nus nga sinu tagadunguganun, dungugani tuwa.”

E Nataban sik ngay Sisiyan sas Isus

(Mar. 10:13-16; Lukas 18:15-17)

13Ay rodi e nataban sik ngay sisiyan sas Isus, laman Isus gted gdarangin anya fagayu. Ay Isus at ngay tagadal nasalag ngay tagtaban ka fag ngay sisiyan. 14Ay Isus igbaya at ngay tagadal te, “Fabayani wan ka fag ngay sisiyan nu kakbang sa angku. Lag gsalag, anway takatanya fag ngay sisiyan katap sas Diyus at fagmagurangan taw.” 15Ay Isus nu nated wa ka fag ngay sisiyan ay nadarangin, rodi Isus nalo wan sanya ginan.

Sik Mabalan fag Baguwama Nangakbang sas Isus

(Mar. 10:17-31; Lukas 18:18-30)

16Ay ginanya sik baguwama nkakbang sas Isus ay ginto te, “Takamoyung, tain manga ku fagbulun at masine laman e leleg aktuwa at yud katabu?” 17Ay Isus nabalus anya te, “Taw ro at masuwad am fagnangintoun angku sa baliwa at masine? Sadi way at masine. Nu kaumsig o gleleg faggugat, faningi ngay suguwan.” 18Ay ka fag baguwama nainto yangay te, “Nataw ngani ban ka fag ngay suguwan ku fagnanfaningun?” Ay Isus nabalus te, “Lag o gfate. Ay lag o kamayun. Ay lag o kamul. Ay lag o kamuwagan nu gfoyung o sa am iba tibak taw at fagbulun. 19Ay esugi tuwa am mama ay am mina. Ay esugi tuwa am iba katvngvd nu kesug o emu.” 20Ay ka fag baguwama nabalus Isus te, “Nafaning kwan kayunya. Ay nataw ya manga ku fagbulun tiba?” 21Ay Isus nabalus yangay te, “Nu kaumsig o te laman Diyus kaumsig am ugali fagayu, loi wan, ay fabilii am nanuranan fagayu. Ay foni am nafabul sa sangay taw at yud e kwa, laman e fagmabalanun yangay o sas banwa. Ay nu nafagbulun wo, aloi wa angku.” 22Ay ka fag baguwama nu nadungug Isus at longan, nalo wan mabaluwanan, anway mabalan dawdaw.

23Ay Isus nalong sat ngay tagadal te, “Matuyan iglong aw ayu te, mataka ban dawdaw sik mabalan fag taw nu kaful sas Diyus at fagmagurangan taw.” 24Ay iglong akyangay sa ayu te, “Nu mataka sik kamelyu nu gsulun sa sik fansulbung at sulung, amataka yap sik mabalan fag taw nu kaful sas Diyus at fagmagurangan taw.” 25Ay at ngay tagadal namatanganan dawdaw nu nadungug Isus at longan. Nu katanya nainto te, “Ay nu katvngvd wa anya am longan, sinu ban at kumlangfe?” 26Ay Isus nalinggat at ngay tagadal ay nalong te, “Nu sik taw way, wa mafafabul. Ay roro Diyus mafafabul tuwa fagayu.”

27Ay rodi Pedru nalong sas Isus te, “Ami, naubun wami fagayu ay naalo wami emu. Ay tain ban emi em fanambagun?” 28Ay Isus nalong sat ngay tagadal te, “Matuyan iglong aw ayu te, am wan at tagalo angku. Ay gina ban nafabagu fagayu, ay gina ban aw, Taw at Baguwama, malunggung sa ku faglunggungan at tiba tungud, anggan sigon am, umlunggung yangay ban am sas labi duwak fag faglunggungan at tiba tungud. Ay am wan tagmagurang taw Israel fag labi duwak fulan taw. 29Ay nus nga sinu fag taw at naubun at bale, ay at ngay fadugsay, ay at tama, ay at tina, ay at ngay sisiyan, ay at gamasun, kanya mul ban glabi ebi ataw at naubun, ay e leleg tuwa ban at yud katabu. 30Ngayuk taw at tiba tungud katsi, ay roro kanya wa ban at tiba daga. Ay ngayuk taw at tiba daga katsi, ay roro kanya tuwa ban at tiba tungud.”

Currently Selected:

Matiyu 19: TAWEAST

Highlight

Copy