3 Uan 1
1
Tagriruk ay at ngay Tagtap
1Aw, sik tagmagurang aw sa sangay tagafanud. Griruk aw sa emu, Gayu. Kesug aktuwa emu.
2Ku fakesugun ku fadugsay, igdarangin aw emu, laman fagayu at kumdasug ban sa emu masine tuwa, ay laman mabitsug tuwo. Nasaful aw te, masine tuwa am amatanganan ay nu gbanwan o. 3Guseganan aw dawdaw gina tam ngay fadugsay indasug stiye ay nafoyung sa angku te, gfaning tuwo sat matuyan fag longan. 4Nu si angku, we glabi ku fagusegananun, ku ngay sisiyan nu gfaning tuwa sat matuyan fag longan.
5O, ku fadugsay Gayu ku fakesugun, matuyan am fagbulun nu gtarabang o tam ngay fadugsay at bagu kadasug dewa o yud batang glag anya. 6Am natarabang fag ngay taw at nafoyung emi ste fag bale fakafulan te, kafanyu tuwo. Nu masine di sa emu, tarabangi anya kata sa tibak taw tagfagbulun Diyus at fagbulun, laman di e fagayudanun gina glo. 7Teway kanya at fagnaloun laman nanfaning Diyus at fasadan. Ay wa gbul nus nge wain fantarabang siginan at yud gafanud. 8Nu katanya, masine nu gtarabang tam takatanya fag taw, laman katap yangay tam sa tagfamoyung at matuyan fag longan.
9Ebi nariruk aw sa sangay tagafanud sanya, ay sik taw Diutrefes, wa kaumsig gdungugan ku foyungan. At fakaumsigun anway te, kanya tuwa tagmagurang ayu. 10Ay gina ban aw umdasug, nanfoyung akyay ban ayu ka fag taw at longan mauri sa emi baliwa. Ay e glabi yay kanya, anway wa gfasakbo tam ngay fadugsay at bagu kadasug. Ay manga gsalag yangay at tiba nu nantarabang. Ay kanya gayan wan siginans bale fakafulan, nus nga sinu takaumsig nantarabang.
11O, ku fadugsay Gayu ku fakesugun, lag gfaning at mauri. Faningi tuwa sat masine. Sik taw nu masine tuwa at fagbulun, kanya anwa Diyus at taw. Ay sik taw nu mauri way at fagbulun, kanya at yud way nasaful Diyus. 12Fagayu tagafanud glong te, masine Demetrius at fagbulun. Ay kalag tuwa si at leleganan te, matuyan tuwa. Ay anggan ami gfoyung yangay ami te, masine wa ngaro fiya at fagbulun. Ay nasaful wo te, matuyan fagayu em longan.
13Ngayu yama ku fagalongunun sa ayu, roro dakwa kaumsig igriruk. 14Ku fakaumsigun bandi ban daw sik menit lumadlagan yay ta, ay gsulitanan yay ban ta.
15Tam Diyus at nanfanabayan nangus emu. Iste am ngay fagwes ginto te, “Go tain o sanya?” Ay o, intoi yangay sa tam ngay fagwes tagsanya sadi sadi te, “Go tain am?”
Currently Selected:
3 Uan 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines