Santiagu 5

Sik Famatagak sat Mabalan fag ngay Taw

1Amatangani, kayu am at mabalan fag ngay taw. Uywayi mabaluwanan teway e mdasug sa ayu sik ngay mataka. 2Ay ngay fagmabalanun umruwas wa ban. Ay ay ngay lanbung mauludun wa ban. 3Ay anggan ay ngay salafi ay nasuksuk we fanambagun, kata wa nu nanenayun. Ay ay ngay fagmabalanun gfalyam ban ay leleg, kata sik afuy nu glabe sik bale. Ay kanya fagayu umrasras wan ay kanya tagfatuyan te, sik ngay takamilug way am. Teway nafaayu am ay fagmabalanun, dewa makbang at fakatabuwan fag ngay menit.

4Am at mabalan fag ngay taw, amatangani. Gfanluk way am sa ay ngay tagfagbulun, teway wam nafon anya at nalufuyan. Ay at nauroan indasug sas Madaragang fag Diyus. 5Kaduge am gbanwan ste swa daga, mafabul wam fagayu ay fakaumsigun ay fagayu ay fagalabianun. Kata am sik balan at fagfatabaun ay wa gsaful te, bandi gfate wam. 6Nalong am sat matuyan fag taw te, “E asalanan way o,” ay nafate wam anya, dewa yud gfabarangyan ayu.

Sungatani ay Darangini

7Ku ngay fadugsay, sungatani tuwa yap ngay tam Fun umfoli ste swa daga. Amatangani at ngay tagtanum at fagbulun. Kanya gsungatan tuwa gfanya taguna fag moyan, ay at fadogan fag moyan, ay at tanum nu gbuwadan. 8Ay katanyai yangay anggan am: Sungatani yangay. Ay fatvngvdi ay amatanganan, teway makbang wan tam Fun nu kafoli. 9Ku ngay fadugsay, dangai dawdaw gfayud ay iba, laman ban Diyus di gfauri ayu, anway gadasugun wan tagfili te, go sinu at fagfauriun ay go sinu at fagfalangfeun.

10Ku ngay fadugsay, amatangani ebi fag ngay taglong nu nafoyung tam Fun at longan. Kanya sik masine fag fagulitan sa ayu teway gsungatan tuwa, dewa e gfauri anya. 11Amatangani: Sik taw tagsungatan, glong tam te, kanya at mul at famanyun. Ay go nasaful wam sik taw at nasungatan at ngayan Ub? Ay anggan go nasaful wam tam Fun at nafon bandi ataw sa anya? Teway tam Fun masine ay tagfangafanyu.

12Ku ngay fadugsay, amatangani dawdaw tuy ku longan: Lag gfatvngvd ay longan. Lag sak glong te, tam banwa wan, ay tam fagdaul daga wan at nasaful ku longan. Ay roro nu glong am, anyakman te, “Kin,” nu kin. Ay “Yaya,” nu yaya, laman ban Diyus di gfauri ayu.

Afanudi tuwa nu Gdarangin Am

13Nu e gatakan si ayu, darangini. Ay nu e guseganan, danyui segi sas Diyus. 14Ay nu e gadaylan, fatsanyai at ngay tagmagurang bale fakafulan, laman gdarangin sat ke daylan. Grarus sik langis ay gdarangin anya sa tam Fun at fagmadaragangun. 15At ngay tagafanud at darangin mafafiya at ke daylan. Ay tam Fun gfabitsug yangay anya. Ay at ke daylan nu e asalanan, gfalyam yangay at asalanan. 16Nu katanya, fodfoyungani ay asalanan sa ay iba. Ay fandaranginani yangay ay iba, laman umfiya am. Teway at masine fag taw at darangin madaragang ay mafanud wa fiya.

17Katanya yangay ebi Diyus at taglong at ngayan Elyas. Kanya sik taw way kata antam. Ay roro, kanya matvngvd dawdaw nu gdarangin, laman we moyan. Ay wa ngani namoyan sanya fag talun tuluk banwa kalati. 18Ay bandi kanya gdarangin yangay sas Diyus te, “Katsi femoyani wan.” Ay rodi gmoyan wan. Ay bandi gdog yay e gtugbung nus nge wain, ay anggan inke buwadan.

19Ku ngay fadugsay, at sadik taw sa ayu nu nfanalo way nu gafanud sat matuyan fag longan, masine nu e nantarabang anya laman kanya fag taw mafanud yangay sat matuyan fag longan. 20Amatangani: Tagtarabang sik tagasalanan, laman di tumunglus sat mauri fag ugali, kanya nabalabag tagasalanan siginans faduwak fakateun. Ay nu katanya nafalyam wan ngayuk asalanan.

Currently Selected:

Santiagu 5: TAWEAST

Highlight

Copy

Compare