Santiagu 4

Lag Gfaning ste swa Daga ngay Taw at Ugali

1Nataw at fagsigadan ay fagfabarangyanun ay iba? Ay taw ro ay fagfaringanganun ay iba? Go wat siginan ay ngay fakaumsigun at yud masine? Go kin? Teway at kayuwan ay fagalabianun si ay amatanganan kata wa nu garingangan. 2Ay dewa ngap am dawdaw kaumsig, wam mafabul. Katanya ay fagfateun ay iba. Ay nu e fagyabulun am ay yud in-gurungan, garingangan way am. Ay fagyudun mafabul, teway wam get sas Diyus. 3Ay dewa am e fagetun, wam mafabul, teway ay fakaumsigun mauri, ay gfasa way am ay fagalabianun.

4Ay ugali kata way sik ngay takamayun! Go wam gsaful te, nu kaumsig am ste swa daga fag ngay ugali, sik tagfabarangyan way am Diyus? Ay gdog kyay glong te, nus nga sinu tagfaning ste swa daga fag ngay ugali, kanya gfabarangyan way Diyus. 5Go gamatangan am te, we masuwad at marirukan sis Diyus at longan te, at nafabanwan si antam fag Falad wa kaumsig nu e fagoan sat fakafanyuun? 6Ay roro tam Diyus nu kafanyu antam matvngvd tuwa, glabi yay sa tam fagalabianun. Nu katanya, marirukan sis Diyus at longan te, “Diyus gsalag way tagfalabi fag ngay taw. Ay kanya kafanyu tuwa sa sangay tagfababaun.”

7Nu katanya, faningi Diyus. Ay asalagi Satanas, ay kanya lumagyu ayu. 8Akbangi ngay sa tam Diyus, anggan tam Diyus kakbang yangay ro ayu. Am fag ngay tagasalanan, ugaliani sat masine. Ay am fag ngay taw tagfaduwa ay amatanganan, falayuni sat masine ay amatanganan. 9Abalui ay uywayi dawdaw. Lag am kase ay guseganan, fangkabat di ro, abalui way dawdaw. 10Fababauni sa tam Fun at daga salubangan. Ay kanya wa ban tagfatiba tungud ayu.

Dangai Glong Mauri sa Ay Iba baliwa

11Ku ngay fadugsay, dangai glong mauri sa ay iba baliwa. Sik taw nu glong way at mauri sat fadugsay baliwa, ay we fakafanyuun anya, ka fag taw glong way mauri sas Diyus at longan baliwa. Ay nu glong way o mauri sat longan baliwa, wo gfaning at longan, fangkabat gfayud way o at longan. 12Sadi wadi at tagfon suguwan. Sadi yangay at tagfili te, sinu at ke mauri ay sinu at yud e mauri. Kanya yangay at mafabalabag ay tagfauri. Nu katanya, sinu o laman nanfayud am iba?

Lag Gfalabi Ay Longan

13Dungugani am tagelongan te, “Katsi ay ate balabag lumo wami sa sik fulan, ay nanbanwan wami sanya sik banwa, ay nanfesali ami laman umkayu em nanuranan sanya ginan.” 14Wam gsaful at kumgurungan balabag sa ay leleg. Teway ay leleg at kadugayan kaduge way sik damug sbalabag ay rodi tv nkatat wan. 15Ay roro at masine, longi tuwa te, “Diyus nu kaumsig ay nu gleleg yay ami, katatuy em fasadan ban em fagbulun.”

16Ay roro, ay ugali wa katanya. Gfandaragang way am ay gfalabi ay longan. Fagayu takatanya fag longan mauri way. 17Ay nus nga sinu fag taw, dewa nasaful te, katanya at masine fag fagbulun, ay way gfaning, kanya e asalanan yay.

Currently Selected:

Santiagu 4: TAWEAST

Highlight

Copy

Compare