1 Pedru 1
1
Tagriruk ay at ngay Tagtap
1Tuy fag rirukan siginan angku, Pedru. Aw, tam Fun Isus at Nasugu at sadi.
Griruk aw sa ayu, am Diyus at nafili fag ngay taw, at kinrapyagan gbanwan sa sangay talun Puntus, ay Galasya, ay Kapadusiya, ay Asia, ay Bitiniya. 2Tam Diyus tam Tama dan wa nafili ayu. Ay at Masine fag Falad at famasadi ayu sas Diyus, laman ay fagfaningun sa tuwa tam Fun Isus. Ay at taguk wan at famalyam ay ngay asalanan.
Igdarangin aw sa tam Diyus te, famanyuni ay fanabayani ayu kayu menit kayu menit.
E Fagsegun Watam at Kumsure Ban
3Segi tam Diyus, tam Fun Isus at Tama. Tam Diyus nafasalug antam sa sik bagu fag leleg, teway kanya kafanyu wa fiya antam. Ay kanya nafon yangay antam sik matvngvd fag fagsegun, teway nafadog gleleg Isus, dewa nkate. 4Nu katanya, gseg tam te, mul ban tam tam Diyus at fagafonun fag famanyun: kanya di karuwas, ay di karasras, ay di malyam ka fag ngay fagmabalanun tagsas banwa. 5Tam Diyus at madaragang gbalabag wa ayu, teway gafanud tuwam sa anya. Katanya at fagbulun kaduge yud gfasure at fagafonun antam. Lumag tam ka fag fagafonun, gina ban Diyus gfalangfe antam. Kanya umgurungan wa fiya sas fakatabuwan fag menit. Diyus nafamasadan wan fagayu.
6-7Ay nu katanya, useganani tuwa, dewa nus nga setaw fag ngay famaskud sa ayu. Ay roro ka fag ngay famaskud wa ban glugo. Ay dumalan wam fiya ka fag ngay famaskud laman sumaful am te, go gafanud wam fiya. Kata yangay nu nasale sad afuy sik gintu laman sumaful te, go malayun wa fiya. Ay roro, nu gafanud am, amafanud yap sa sik gintu takalyam. Nu katanya, ay fagafanudun nu matuyan tuwa, dewa e famaskud sa ayu, Diyus guseganan ban ayu, ay gfaabat ay galang ayu. Ay umgurungan ban katanya gina umdasug tam Fun Isus, ay fagdaul daga at taw lumag ban anya. 8Kafanyu tuwam anya, dewam gyud batang glag anya. Ay gafanud tuwam anya, dewam gyud glag anya katsi. Ay nu katanya, guseganan am dawdaw. Katvngvdan, we mafafayamag. 9Mul ban am sik masine fag buwadan teway gafanud am sa anya. Ay ka fag buwadan at masuwad te: umlangfe ay falad. 10Ebi Diyus at ngay taglong nalong wan sa baliwa Diyus famanyun ban sa ayu. Ay naugatan gyasafulun te, “Tain ban Diyus nu gfalangfe taw?” 11Ay Diyus at Masine fag Falad si wa ebi fag ngay taglong. Ay kanya wan at nafoyung sanya fag ngay taglong te, tam Fun Isus matakan yay, bagu umke fagmasineun dawdaw. Nu katanya, ka fag ngay taglong gamatangan ay gsarap te, “Sinu at faglongan? Ay seduge ban fag lungud?” 12Diyus nafoyung wa sanya fag ngay taglong te, “Bunwa sa ayu ka fag foyungan, sa yay katsi ban ku ngay taw.” Ay katsi e nafoyung ayu at Masine fag Barita. Diyus nasugu at Masine fag Falad siginans banwa, laman gfadaragang sa sangay takamoyung. Dewa at ngay tagfabarita gyasafulun yay ka fag foyungan at masuwad, at fagfoyungun sa ayu.
Ugaliani sat Matuyan
13Nu katanya, mamatangani tuwa, laman mafamasadan tuwam gfagbulun Diyus at ngay fagbulun. Ay matvngvdi ay amatanganan. Ay afanudi te, mul wa ban am fiya at fagafonun fag famanyun. Umgurungan ban gina umdasug tam Fun Isus, ay sas fagdaul daga at ngay taw lumag anya. 14Diyus wam at ngay unga. Nu katanya, faningi tuwa ay Tama. Ay lag gfaning sa ay fagalabianun at mauri, kata ebi gina am gyud gsaful sas Diyus. 15Diyus at nafili ayu. Ay kanya malayun tuwa sat masine. Nu katanya, malayuni yangay sat masine fagayu ay fagbulun. 16Teway Diyus at longan glong te,
“Ani tuwa malayuni sat masine, teway malayun aktuwa sat masine.”
17Gina am gdarangin, glong am sas Diyus te, “Ku Mama.” Ay amatangani te, kanya di e filian taw. Gfaurianan wa fiya ay ate gfon at famanyun sas fagayu taw fainfaluwan at nafagbulun. Nu katanya, alimui anya kaduge am gbanwan ste swa daga kata sik ngay betaw. 18Nasaful wam te, Diyus nasali ayu laman nanfalfas ayu siginan ebi ay ngay aguyangan at ugali at yud e fanambagun. Ay at fansali bunwa pilak ay ate gintu. 19At fansali antuwa tam Fun Isus at taguk. Kanya kata sik tupa riyangan at yud e fangtat ay at yud e fanlonganan nus di sirut at naanyun sas Diyus.
20Siginan ngay yud e daga, Diyus dan wa nafili anya. Ay katsi sas fakatabuwan fag ngay menit, Diyus nafasure wa anya, laman e fanambagun am. 21Gafanud am sas Diyus teway kasakan Isus at nafagbulun. Ay gseg am sas Diyus teway kanya at nafaleleg Isus, dewa nkate, ay nafatiba tungud anya.
22Ay ngay asalanan nafalyam wan teway nafaning tuwam at matuyan. Ay katsi afanyui tuwa ay ngay fadugsay sas Isus. Fatvngvdi nu kadkafanyuwan am sa ay iba. Matuyani tuwa nu kafanyu am; lag gfalukanan, 23teway kata wam bagu nsalug. Ay roro, nu kasalug am, ay leleg bundi siginan ay ngay aguyangan at kinkate ebi. Ay bagu leleg siginan tuwa tam Diyus at longan tagfon leleg at yud e fakatabuwan. 24Teway marirukan sis Diyus at longan te,
“Fagayu taw kata way sik makmak.
Ay at ngay taw kamasinean kata way sik sariksik sasad magubat.
Ay at makmak kayango,
ay at sariksik kalangke.
25Ay roro tam Fun Diyus at longan we fakatabuwan faggugat.”
Ay kanya wan at Masine fag Barita at nafoyung sa ayu.
Currently Selected:
1 Pedru 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
