Santiagu 3

Tam Dila

1Ku ngay fadugsay, lag am ngayu takaumsig nangasik takamoyung, teway ami fag ngay takamoyung, Diyus nu gtap em asalanan, glabi yay nu gyud sik takamoyung. 2Fagayu tam, malayun way nu gsalan tam. Ay roro sik taw nu gdi e nasalan gina gelongan, kanya sik matvngvd wa fiya fag taw nu gafanud. Ay kanya mabaris tuwa fagdaul at bilug. 3Kata nu nasiyuk tam sik kabayu at bibig, laman gfaning tuwa nus nganday tam fakaumsigun. 4Ay amatangani yangay sik balutu daul. At tagfarabing anya sik kayu sirut malafi sit iyug. Ay dewa magong at tagmara, at fun sis balutu mafarabing tuwa nus nganday at fasadan at fakadasugan.

5Katanya yangay tam dila. Dewa sik afud sirut sa tam bilug, kanya gfalabi dawdaw.

Amatangani: Siginan sik afuy sirut, mafalabe way dewa sik gubatan dawdaw. 6Tam dila kata sik afuy sirut. Ay ngayuk elongan mafurat sanya ginan fag afud bilug. Ay anggan kanya tagfafurat fagdaul tam ugali. Kanya kata sik afuy siginans lino afuy, ay mafalabe fagdaul tam leleg.

7Sik taw mafafagup tuwa nus nge wain: tenday, mangimut, ay anggan manuk, ay anggan tagalafang, ay anggan tagleleg sad mamam. 8Dewa katanya, we taw mafafagup at dila. Ay wa katuwas nu glong at mauri, teway mapnu fangkate.

9Siginan tam dila, gfamauseganan tam Fun tam Tama. Ay kanya yangay tam fangabalo sa tibak taw. Tenday, glong tam te, “Diyus faurii anya.” Kanya fag taw dewa Diyus naawat kata anya. 10Dewa sadi tam bibig, mafafasure at masine fag longan ay manga at mauri fag longan. Ku ngay fadugsay, wa masine nu katanya. 11Go sik bulbug mafafasure sik safa masine gasfuwan at mayat fag safa? Go yaya? 12Ku ngay fadugsay, go sik tanum igus gbuwadan tuwa ulibu? Ay ate sik ubas gbuwadan tuwa igus? Go yaya? Ay go yangay e safa mayat siginan safa masine?

Duwak Fagsafulun Gsadsamanan

13Sinu si ayu at mamatanganan ay at ke fagsafulun fag taw? Nu nalong o te, e fagsafulun tuwo, falagani am iba am ugali at masine. Nu e fagsafulun tuwo, gfababaun yangay o. 14Ay nu galabian yay am ay gfalabi, lag gfandaragang te, sik mamatanganan am fag taw. Teway nu katanya yay am fagbulun, wam gfaning sat matuyan fag longan. 15Takatanya fag fagsafulun wat siginans Diyus ay Masine fag Falad. Siginan ways fagdaul daga ay Satanas. 16Teway nus ngandaginan at ngay taw fagalabianun ay fagfalabiun, sanya yangay fagayu at mafanggalutan, ay anggan nus nga setaw wa fag ngay mauri.

17Ay roro at ke fagsafulun tagsiginans Diyus, at ugali tiba tungud malayun tuwa sat masine, ay gfanabayan tuwa, ay malukme tuwa, ay gfababaun tuwa, ay gfangafanyu tuwa dawdaw at tiba, ay masine tuwa ayuwayu at fagbulun, ay di e filian taw ay di gfanluk fagayu at fagbulun. 18Ay sik taw tagfanabayan kata sik tagtanum. Kanya nu gfanabayan kata sik tagfangukasan at fantanum. Ay mul ban at masine.

Currently Selected:

Santiagu 3: TAWEAST

Highlight

Copy

Compare